Ẹdẹjọ ọmọtẹ ọsese jọ ọ tẹ ruẹ iwiri nọ i bi kuye no ehru idhe ekọmpene jọ ze, yọ e ma ekpalekpa wọhọ ẹgho. O te roro nọ ekọmpene na o bi ru ẹgho fihọ ehru na. Otoriẹ othọthọ oyena nọ ọmọtẹ ọsese yena o wo na, o rẹ sai fou ohwo họ ehwẹ. Rekọ ma te wo otoriẹ othọthọ kpahe eware nọ e mai wuzou evaọ uzuazọ, o rẹ sai kpomahọ omai yoyoma. Wọhọ oriruo, ma gbe wo otoriẹ ẹme nọ a kere fihọ ugbogbo ibi-imu hu, o rẹ sae wha uye se omai.

O rẹ tubẹ mai yoma otẹrọnọ ma wo otoriẹ othọthọ kpahe Ẹme Ọghẹnẹ. Wọhọ oriruo, ahwo jọ a wo otoriẹ othọthọ kpahe iwuhrẹ Jesu jọ. (Jọn 6:​48-68) Ukpenọ a re gbe wuhrẹ mi Jesu re a wo otoriẹ oware na ziezi, a tẹ siọ eware kpobi nọ Jesu o wuhrẹ. U yoma kẹhẹ!

Kọ who bi se Ebaibol na re ọ kpọ uzuazọ ra? O tẹ rrọ ere, kiyọ whọ be daoma. Kọ o sae jọnọ who bi wo otoriẹ eware jọ thọ nọ who bi se Ebaibol na? O be via kẹ ahwo buobu re. Roro kpahe eware esa jọ nọ ahwo a bi wo otoriẹ rai thọ.

• Ahwo jọ a bi wo otoriẹ othọthọ kpahe uzi Ebaibol nọ o ta inọ ma “dhẹozọ Ọghẹnẹ.” A re roro nọ idudu epanọ Ọghẹnẹ ọ rro te họ ozodhẹ nọ Ebaibol ọ ta na. (Ọtausiuwoma Na 12:13) Rekọ Ọghẹnẹ ọ gwọlọ nọ ohwo kpobi nọ ọ be gọe o roro nọ ere ọyomariẹ ọ rrọ họ. Jihova ọ ta nọ: “Ozọ umu owhẹ hẹ, keme mẹ avọ owhẹ a gbẹ rọ, who nyuhẹ hẹ, keme mẹ họ Ọghẹnẹ ra. Mẹ te kẹ owhẹ ogaga, me ti fiobọhọ kẹ owhẹ.” (Aizaya 41:10) Re ma dhozọ Ọghẹnẹ u dhesẹ nọ, ma re wo adhẹẹ odidi kẹe.

• Ahwo jọ a re wo otoriẹ othọthọ kpahe oria Ebaibol nana inọ: “Koware koware kpobi ọvuọ ezi riẹ, . . . oke eyẹ, oke uwhu.” A re ku ei họ nọ Ọghẹnẹ o fi oke uwhu họ kẹ ohwo kpobi. (Ọtausiuwoma Na 3:​1, 2) Rekọ oria Ebaibol oyena o be ta kpahe eware nọ e rẹ sae via kẹ ohwo nọ ọ rrọ uzuazọ, yọ uwhu o rrọ usu eware yena. Ebaibol na o te je wuhrẹ omai inọ iroro nọ ma jẹ, e rẹ sai kpomahọ epanọ ma rẹ rria akpọ kri te. Wọhọ oriruo, Ebaibol na ọ ta nọ: “Ozodhẹ kẹ ỌNOWO na u re ru uzuazọ krẹkri.” (Itẹ 10:27; Olezi 90:10; Aizaya 55:3) Evaọ oghẹrẹ vẹ? Wọhọ oriruo, ma te rri Ẹme Ọghẹnẹ ghaghae, o rẹ wọ omai whaha iruemu nọ e rẹ sai fi uzuazọ mai họ ọza wọhọ idieda-thomawa gbe ọfariẹ-ogbe.​—1 Ahwo Kọrint 6:​9, 10.

• Ahwo jọ a rẹ rehọ ẹme kpobi nọ Ebaibol na ọ ta ehruehru, wọhọ oria Ebaibol nọ o ta nọ “a vu idhiwu gbe otọakpọ nọ e rrọ enẹna wa kẹ erae.” Fikiere a re roro nọ Ọghẹnẹ ọ te raha otọakpọ na no riẹriẹriẹ. (2 Pita 3:7) Rekọ Ọghẹnẹ ọ ya eyaa nọ ọ te raha otọakpọ na no vievie he. Ọghẹnẹ o “fi etọhotọ akpọ na họ, re e seba ekpoho.” (Olezi 104:5; Aizaya 45:18) Ahwo omuomu nọ a rrọ akpọ na ae Ọghẹnẹ ọ te raha no riẹriẹriẹ orọnikọ otọakpọ na ha, nwane wọhọ epanọ erae e rẹ mahe oware no riẹriẹriẹ. Ẹsejọ nọ Ebaibol na ọ tẹ ta ẹme kpahe odhiwu, o sai dikihẹ kẹ idadeghe na, ehrugbakpọ na, hayo oria nọ Ọghẹnẹ ọ be rria. Rekọ Ọghẹnẹ ọ te raha eria nana ha.

Wọhọ epanọ ma ruẹ evaọ iriruo nọ ma ta kpahe evaọ obehru na, ahwo jọ a re wo otoriẹ othọthọ kpahe eria Ebaibol nọ a se. Rekọ fikieme Ọghẹnẹ ọ rọ kuvẹ re ahwo a wo otoriẹ eria jọ Ebaibol na thọ? Ahwo jọ a re roro nọ: ‘Otẹrọnọ Ọghẹnẹ o wo areghẹ gaga jẹ riẹ eware kpobi, ọ hae kẹ omai obe nọ a kere vevẹ ziezi nọ ohwo kpobi o re wo otoriẹ riẹ lọlọhọ. Kọ fikieme Ọghẹnẹ o gbe ru ere he?’ Joma ta kpahe eware esa jọ nọ ahwo jọ a bi ro wo otoriẹ Ebaibol na thọthọ.

1.   A kere Ebaibol na evaọ edhere nọ ahwo nọ a wo omaurokpotọ gbe enọ e gwọlọ wuhrẹ ọvo a sai ro wo otoriẹ riẹ. Jesu ọ ta kẹ Ọsẹ obọ odhiwu riẹ nọ: “Mẹ be jọ iraro ahwo jiri owhẹ, Ọsẹ, Olori odhiwu gbe otọakpọ, keme whọ nabe ko eware nana dhere no iwoareghẹ gbe enọ e riẹ ikpebe, who te rovie ae via kẹ emaha.” (Luk 10:21) A kere Ebaibol na evaọ edhere nọ ahwo nọ a wo emamọ eva ọvo a sai ro wo otoriẹ riẹ. Ahwo nọ a wo omorro, koyehọ uruemu nọ whọ rẹ ruẹ evaọ oma “iwoareghẹ gbe enọ e riẹ ikpebe,” a rẹ sai wo otoriẹ Ebaibol na gbagba ha. Rekọ ahwo nọ a wo ọkpọ uruemu “emaha,” koyehọ enọ i wo omaurokpotọ jẹ gwọlọ wuhrẹ, ae ọvo a rẹ sai wo otoriẹ Ebaibol na. Edhere nọ Ọghẹnẹ o ro kere Ebaibol na u gbunu kẹhẹ!

2. A kere Ebaibol na evaọ edhere nọ ahwo evezi nọ a gwọlọ obufihọ Ọghẹnẹ a sai ro wo otoriẹ riẹ. Jesu o dhesẹ nọ ahwo a te gwọlọ obufihọ re a sai wo otoriẹ eware nọ o wuhrẹ i rai. Ẹvẹ a te sai ro wo obufihọ onana? Jesu ọ ta nọ: “Ofiobọhọ na, ẹzi ọfuafo na, nọ Ọsẹ na o ti vi ze evaọ odẹ mẹ, ọyena o ti wuhrẹ owhai eware kpobi.” (Jọn 14:26) Fikiere Ọghẹnẹ ọ rẹ rọ ẹzi ọfuafo riẹ fiobọhọ kẹ ahwo wo otoriẹ eware nọ a se evaọ Ebaibol na. Rekọ, ahwo nọ a fievahọ iẹe kẹ obufihọ họ, Ọghẹnẹ ọ rẹ rọ ẹzi ọfuafo riẹ kẹ ai hi, fikiere a rẹ sai wo otoriẹ Ebaibol na ha. Yọ ẹzi ọfuafo na ọ rẹ wọ Ileleikristi nọ i wo otoriẹ Ebaibol na fiobọhọ kẹ ahwo nọ a gwọlọ obufihọ re a wo otoriẹ Ebaibol na.​—Iruẹru Ikọ 8:​26-35.

3. Ẹsejọ u re wo oke nọ Ọghẹnẹ o fihọ nọ ahwo a re ro wo otoriẹ eria Ebaibol jọ. Wọhọ oriruo, Ọghẹnẹ ọ ta kẹ Daniẹl ọruẹaro na re o kere eruẹaruẹ jọ nọ a ti wo otoriẹ riẹ evaọ obaro fihọ otọ. Ukọ-odhiwu jọ ọ ta kẹe nọ: “Daniẹl, ruru eme na, whọ gba obe na di, bọwo oke urere.” Anwọ ikpe buobu ze na, ahwo buobu a se obe Daniẹl no, rekọ a be sai wo otoriẹ riẹ hẹ. Makọ Daniẹl dede o wo otoriẹ eware jọ nọ o kere he. Ọ ta avọ omaurokpotọ nọ: “Me yo, rekọ mẹ gbẹ riẹ otọ riẹ hẹ.” Rekọ, ahwo a ti wo otoriẹ eruẹaruẹ nana nọ Ọghẹnẹ ọ rọ ẹkwoma Daniẹl kere na evaọ oke nọ Ọghẹnẹ o fihọ. Ukọ-odhiwu na ọ ta kẹ Daniẹl nọ: “Nyavrẹ, Daniẹl, keme a ruru eme na jẹ gba ai di bọwo oke urere.” Kọ amono a ti wo otoriẹ eruẹaruẹ nana? Ebaibol na ọ ta nọ: “Orumuomu ọvo o reti vuhu muẹ hẹ; rekọ enọ i wo areghẹ a reti vuhu muẹ.” (Daniẹl 12:​4, 8-10) Fikiere Ọghẹnẹ o re dhesẹ otofa eria Ebaibol jọ via ha bọwo oke nọ o fihọ.

Kọ Isẹri Jihova a wo otoriẹ eria jọ Ebaibol na thọ no okejọ fikinọ ẹruoke na u ri te he? Ee. Rekọ oke nọ Ọghẹnẹ o fihọ re a wo otoriẹ riẹ u te, Isẹri Jihova a te nwene eriwo rai kpahe otoriẹ nọ a wo vẹre. A tẹ rọ enẹ dhesẹ nọ a be rọ aro kele ikọ Jesu evaọ oke anwae, enọ e rọ omaurokpotọ ru inwene kpahe otoriẹ othọthọ nọ a wo nọ Jesu ọ tẹ kpọ ae vi.​—Iruẹru Ikọ 1:​6, 7.

Otoriẹ othọthọ nọ ọmọtẹ ọsese nọ ma fodẹ evaọ obehru na o wo kpahe oria nọ ẹgho o bi no ze na, u te oware ovo ho. Rekọ, ma te wo otoriẹ othọthọ kpahe oware nọ Ebaibol na o wuhrẹ yọ okpoware. Ovuẹ Ebaibol na u wuzou vi oware nọ ohwo ọvo o re se, o ve wo otoriẹ riẹ kẹ omariẹ. Fikiere gwọlọ obufihọ re whọ sai wo otoriẹ oware nọ who bi se na. Gwọlọ obufihọ ahwo nọ a be rọ omaurokpotọ wuhrẹ Ebaibol na, enọ e rẹroso ẹzi ọfuafo Ọghẹnẹ re a sai wo otoriẹ Ebaibol na, enọ u mu ẹro inọ oke nọ Ọghẹnẹ ọ gwọlọ nọ ahwo a re ro wo otoriẹ Ebaibol na vi epaọ anwẹdẹ ma rrọ na. Whọ sae ta kẹ Isẹri Jihova re a fiobọhọ kẹ owhẹ, hayo whọ sai se ebe rai nọ a nabi ru ekiakiẹ kpahe ziezi evaọ oria evuẹ Itanẹte rai nọ a re se www.pr418.com/iso. Ebaibol na ọ ya eyaa nọ: “Otẹrọnọ who bo kẹ orimuo . . . , [whọ te] ruẹ eriariẹ Ọghẹnẹ.”​—Itẹ 2:​3-5.