A be dhẹ na yọ edo ithihawọ rai i bi ru edo gaga! Oghẹrẹ nọ a ro dhesẹ enyenya ilogbo ene na avọ ahwo nọ a be dhẹ ae, o wọhọ oware nọ o be via evaọ aruakpọ! Anyenya ọsosuọ na ọ rrọ fuafo, yọ a rehọ ọnọ ọ be dhẹe na mu ovie obọ. Anyenya avivẹ ọ rrọ wawae wọhọ erae, yọ ọnọ ọ be dhẹe na o bi si udhedhẹ no akpọ na. Anyenya avesa nọ o lele i rie ọ rrọ biebi kpri, yọ ọnọ ọ be dhẹe na o kru oware nọ a rẹ rọ wawọ eware họ obọ avọ urru nọ u bi whowho nọ emu o re no. Anyenya avene ọ rrọ viẹviẹ, ọ be wha oghoghẹrẹ eyao lele oma, yọ odẹ ọnọ ọ be dhẹe họ Uwhu. Yọ uki o rọ kpahe iẹe ukuke, be lọ ahwo nọ uwhu u bi kpe na!​—Eviavia 6:1-8.

“Oke ọsosuọ nọ me ro se kpahe edhẹ-enyenya ene na, ozọ u mu omẹ gaga. O jọ omẹ oma nọ Ẹdẹ Oziẹobro ọ be tha, yọ nọ mẹ re ruẹrẹ oma kpahe he na, mẹ te sae zọ họ.”​—Crystal.

“Nọ me se kpahe edhẹ-enyenya ene nọ i wo ọvuọ ekọlọ riẹ na, mẹ tẹ gwọlọ riẹ eware nọ i dikihẹ kẹ. Nọ me wo otoriẹ eruẹaruẹ na no, mẹ tẹ riẹ oware nọ o be lẹliẹ eware sa-sa via evaọ akpọ na.”​—Ed.

Kọ o rrọ owhẹ oma wọhọ epanọ o jọ kẹ Crystal nọ o se kpahe edhẹ-enyenya ene na no? Manikọ o rrọ owhẹ oma wọhọ epanọ o jọ kẹ Ed? Oghẹrẹ kpobi nọ o rrọ owhẹ oma kẹhẹ, ikuigbe edhẹ-enyenya ene na yọ iku nọ e viodẹ gaga evaọ obe Eviavia nọ o rrọ obe urere Ebaibol na. Kọ whọ riẹ nọ whọ rẹ sai wo erere no eruẹaruẹ nana ze nọ who te wo otoriẹ rai? Evaọ oghẹrẹ vẹ? Ọghẹnẹ ọ ya eyaa nọ who ti wo uvi evawere nọ who te se, wuhrẹ, je ru lele eware nọ a kere fihọ obe eruẹaruẹ nana.​—Eviavia 1:1-3.

Dede nọ ozọ u re mu ahwo jọ nọ a te se kpahe eruẹaruẹ edhẹ-enyenya ene na, orọnikọ a kere eruẹaruẹ na re e lẹliẹ ozọ mu owhẹ hẹ. Evaọ uzẹme, eruẹaruẹ nana e bọ ẹrọwọ ima ahwo buobu ga no, jẹ lẹliẹ ai wo ẹruore kpahe obaro na. O sae jọ epọvo na kẹ owhẹ re! Iviena gbe se haro.