IRUẸRU MAI ERỌ OKE NỌ U KPEMU
A be Jọ Akpọ na Soso Wuhrẹ Ahwo Epanọ A re ro Se je Kere
Agostinho nọ ọ be rria Brazil ọ ta nọ: “Iruo ẹwọ ma je ru yọ oria nọ udhu mai ọ rrọ ma jẹ rria. Ma yogbe gaga. Mẹ siọ isukulu ba re me fiobọhọ kẹ ọsẹgboni mẹ rẹrote uviuwou mai.” Agostinho ọ kpako te ikpe 33 no taure ọ tẹ te riẹ epanọ a re se je kere. Ọ ta nọ: “Fikinọ me wuhrẹ epanọ a re se je kere na, oma o gbẹ be vuọ omẹ enẹna ha.”
O vrẹ ikpe 70 no nọ Isẹri Jihova a bi ro wuhrẹ idu ahwo buobu epanọ a re se je kere, yọ Agostinho omọvo rai jọ. Fikieme Isẹri Jihova a bi ro wuhrẹ ahwo epanọ a re se je kere? Ẹvẹ ewuhrẹ nana o ro fiobọhọ kẹ ahwo no?
Ohwo Ọ gbẹ Riẹ Epanọ A re Se je Kere He, Ọ rẹ Sai Wuhrẹ Oware Ziezi Hi
Evaọ ukpe 1935, Isẹri Jihova a jẹ ta usi uwoma evaọ erẹwho nọ i bu te ẹgba ọvo gbe ikpegbisoi (115). Re a sae ta usi uwoma kẹ ahwo nọ a be ta evẹrẹ sa-sa, imishọnare a je kporo evuẹ Ebaibol nọ a rekọdo kẹ ahwo, yọ evaọ ẹsejọ a jẹ hae kẹ ahwo ebe nọ a fa fihọ evẹrẹ ahwo na. Dede nọ ahwo buobu a gwọlọ nọ a re wuhrẹ Ebaibol na, o jọ bẹbẹ kẹ ae keme a riẹ epanọ a re se je kere he.
Ahwo a gbe wuhrẹ epanọ a re se Ebaibol na kẹ omarai hi, o rẹ jọ bẹbẹ kẹ ae re a fi ehri-izi Ebaibol nọ a bi wuhrẹ họ iruo. (Joshua 1:8; Olezi 1:2, 3) O rẹ jọ bẹbẹ kẹ esẹgbini re a rẹrote owha-iruo nọ Ọghẹnẹ ọ kẹ rai. Wọhọ oriruo, otẹrọnọ ọsẹgboni a riẹ epanọ a re se he, o rẹ jọ bẹbẹ kẹ ae re a wuhrẹ emọ rai oware nọ Ebaibol na ọ ta. (Iziewariẹ 6:6, 7) Yọ o rẹ jọ bẹbẹ kẹ ahwo ọkpokpọ nọ a kurẹriẹ ziọ ukoko Isẹri Jihova re a rọ Ebaibol na wuhrẹ ahwo otẹrọnọ a riẹ epanọ a re se he.
A Mu Ahwo Họ Ewuhrẹ Epanọ A re ro Se je Kere
Evaọ etoke ikpe 1940 gbe 1950, Brọda Nathan H. Knorr avọ Milton G. Henschel nọ e jọ usu enọ e jẹ kobaro evaọ iruẹru Isẹri Jihova oke yena a te je kpohọ erẹwho sa-sa re a to iruo usi uwoma ota na họ evaọ obei. Evaọ erẹwho nọ ahwo buobu a jọ riẹ epanọ a re se je kere he, a tuduhọ iwou ogha rai awọ re a mu ahwo họ ewuhrẹ epanọ a re se je kere evaọ ikoko rai.
Evaọ ukpe 1954, a jọ okokohọ nọ a ru evaọ Chingola nọ ọ rrọ Zambia siobọno obe jọ nọ a re ro wuhrẹ ẹvẹrẹ Cinyanja
Iwou ogha a te vi ekpọvio se ikoko sa-sa kpahe epanọ a re ro ru ewuhrẹ nana. Evaọ erẹwho jọ, egọmeti u wo ebe gbe eware efa nọ Isẹri Jihova a sai ro wuhrẹ ahwo epanọ a re se je kere. Wọhọ oriruo evaọ Brazil, egọmeti o vi ebe gbe eware efa se uwou ogha rai, kẹsena a te vi eware nana se ikoko sa-sa. Rekọ evaọ erẹwho efa, inievo na ọvo a rẹ gwọlọ eware nọ a re ro wuhrẹ ahwo.
Uwuhrẹ na o jọ rọkẹ ahwo kpobi, te ezae te eyae, te emaha te ekpako. A je wuhrẹ ahwo na epanọ a re se ẹvẹrẹ obọrai, yọ ẹsejọ evẹrẹ nọ a re wuhrẹ ahwo evaọ ukoko ọvo e rẹ jọ buobu.
Ewuhrẹ nọ O re Fiobọhọ kẹ Ahwo
Ẹvẹ ewuhrẹ nana o ro fiobọhọ kẹ ahwo no? Osẹri Jihova jọ evaọ obọ Mexico ọ ta nọ: “Obọnana mẹ be sai wo otoriẹ Ebaibol na, yọ onana u bi ru Ẹme Ọghẹnẹ duobọte omẹ udu. Enẹna nọ mẹ riẹ ese no na, mẹ be sae ta usi uwoma kẹ amọfa lọlọhọ, yọ me fiobọhọ kẹ ahwo buobu wuhrẹ uzẹme Ebaibol na no.”
Orọnikọ Ebaibol na ọvo ewuhrẹ na o bi fiobọhọ kẹ ahwo wo otoriẹ riẹ hẹ. Isaac nọ ọ rrọ ohwo Burundi ọ ta nọ: “Fikinọ mẹ riẹ epanọ a re se je kere, u fiobọhọ kẹ omẹ wuhrẹ iruo ebabọ no. Iruo ebabọ me bi ru enẹna, yọ a be hae kẹ omẹ iruo ebabọ ilogbo nọ mẹ rẹ rẹrote.”
A bi wuhrẹ ẹvẹrẹ Chichewa evaọ Ọgwa Uvie nọ ọ rrọ Lilongwe evaọ Malawi evaọ ukpe 2014
Ikpe 49 Jesusa nọ ọ rrọ ohwo Peru ọ jọ evaọ okenọ a ro mu ei họ ewuhrẹ epanọ a re se je kere. Ọ ta nọ: “Me te kpobọ eki, o gwọlọ nọ mẹ rẹ riẹ odẹ gbe unuigho nọ a kere fihọ eware nọ mẹ gwọlọ dẹ keme mẹ yọ aye uwou-orọo. Vẹre vẹre, o jẹ hae jọ bẹbẹ kẹ omẹ. Eva e were omẹ gaga fiki ewuhrẹ na keme enẹna udu u re bru omẹ hẹ nọ me te kpobọ eki nyae dẹ oware.”
Nọ oke o be nyaharo na, egọmeti erẹwho buobu a jiri Isẹri Jihova fiki oma nọ a be dawo re a wuhrẹ ahwo epanọ a re se je kere. Nẹnẹ, Isẹri Jihova a gbẹ be rọ ebe gbe eware efa nọ a ru woma vi epaọ anwẹdẹ no wuhrẹ ahwo epanọ a re se je kere. A printi ibroshọ nọ i bu te enwenọ ima egba ivẹ gbe udhegbene (224,000,000) evaọ evẹrẹ egba ihrẹ gbe udhe (720) no re a sai wuhrẹ ahwo epanọ a re se je kere. *
^ edhe-ẹme 11 Wọhọ oriruo, a fa ibroshọ Apply Yourself to Reading and Writing na fihọ evẹrẹ ẹgba ọvo gbe udhegbesa (123) no, yọ a fa ibroshọ Gaviezọ kẹ Ọghẹnẹ na fihọ evẹrẹ egba ezeza gbikpe (610) no.