HAI ROU!
Nọ Ma Ruọ 2023 no na, Ẹvẹ Ma rọ Riẹ nọ Eware I ti Woma—Eme Ebaibol na Ọ Ta?
Nọ ukpe 2023 o muhọ no na, mai kpobi ma bi rẹro nọ eware i ti woma kẹ omai gbe ahwo uviuwou mai. Fikieme ma sai ro gine roro ere?
Ebaibol na o re ru ohwo wo ẹruore
Ebaibol ọ ta nọ ebẹbẹ nọ i bi te omai nẹnẹ na e te jọ bẹdẹ bẹdẹ hẹ. Ọghẹnẹ o ti ku ai họ kẹle. Eme nọ e rrọ Ebaibol na “a kere ai re ma wuhrẹ no ai ze, re ma rọ ẹkwoma. . . omosasọ nọ u re no Ikereakere na ze wo ẹruore.”—Ahwo Rom 15:4.
Re whọ gbẹ riẹ kpahe eyaa efa nọ e rrọ Ebaibol na, rri uzoẹme na, “Ẹruore nọ Ma Wo Kpahe Obaro Na.”
Oghẹrẹ ẹruore nọ ọ rẹ sai fiobọhọ kẹ owhẹ enẹna
Ma sae ta nọ ẹruore nọ ma re wo nọ ma te se Ebaibol na ọ wọhọ “umuokọ rọkẹ uzuazọ mai.” (Ahwo Hibru 6:19) Ẹruore nana ọ sai ru udu te omai otọ. O re fiobọhọ kẹ omai thihakọ ebẹbẹ nọ i bi te omai nẹnẹ, ma ve je rẹro nọ eware i ti woma. O re je ru nọ ma gbẹ sae rọ wereva nẹnẹ. Wọhọ oriruo:
Ebaibol na o fiobọhọ kẹ ọzae jọ nọ ọ jọ ọgba-idi. Rri ividio na, Uzuazọ Mẹ O tẹ Vẹso Omẹ.
Rri whọ ruẹ epanọ ẹruore nọ ma re wo nọ ma te se Ebaibol na ọ sai ro fiobọhọ kẹ omai thihakọ nọ ohwo mai jọ o te whu. Rri ividio na, Oware nọ O rẹ Sasa Ahwo nọ A Rrọ Uweri Oma.
Hai ru eware nọ e rẹ lẹliẹ ẹruore nọ who wo ga
Ahwo buobu a gwọlọ nọ eware i woma kẹ ai, rekọ u bi mu ai ẹro vievie he sọ eware i ti gine woma ẹdẹjọ. Dede na, ẹruore nọ ma re wo nọ ma te se Ebaibol na ọ rrọ ere he. Ẹvẹ ma rọ ta ere? Ma te ere keme eyaa nọ e rrọ Ebaibol na, obọ Jihova Ọghẹnẹ a i no ze, yọ Jihova “ọ rẹ sae ta ọrue he.” (Taitọs 1:2) Jihova ọvo họ ohwo nọ ọ rẹ sai ru eyaa nọ ọ ya kpobi gba. Ọ rẹ sai ru “oware kpobi nọ o were riẹ.”—Olezi 135:5, 6.
Ma gwọlọ nọ who wo ẹruore nọ o no obọ Ọghẹnẹ ze na. Whọ sai wo ẹruore yena nọ whọ tẹ “be romatotọ kiẹ Ikereakere na riwi kẹdẹ kẹdẹ.” (Iruẹru Ikọ 17:11) Whọ sae vuẹ Isẹri Jihova re a wuhrẹ Ebaibol na kugbe owhẹ. Evaọ ukpe 2023 nọ ma ro obọ na, hai roro kpahe emamọ ẹruore nọ ma wo kpahe obaro.
a Jihova họ odẹ Ọghẹnẹ.—Olezi 83:18.