HAI ROU!
Egba-Eriariẹ A Go Obọ Ughọjọ Ẹdẹ Ọraha Kparo—Eme Ebaibol na Ọ Ta?
Evaọ Ọvo 24, 2023, egba-eriariẹ a ta nọ a go obọ ughọjọ ẹdẹ ọraha nọ a re se Doomsday Clock a kẹle udevie aso vi epanọ o jọ vẹre, onọ a rri nọ u bi dhesẹ oke nọ akpọ na o ti ro kuhọ.
“A rọ ughọjọ ẹdẹ ọraha nọ a se ‘Doomsday Clock’ na dhesẹ nọ ahwo-akpọ ọvo a te raha akpọ na gbe eware nọ e riẹe eva kpobi no. Evaọ Edivẹ-Oka, egba-eriariẹ a te go obọ ughọjọ na kẹle udevie aso vi epanọ o jọ vẹre fiki eware nọ e be via, wọhọ ẹmo Ukraine na, ozọ ekwakwa-ẹmo nọ a ku no, gbe oghẹrẹ nọ eware i bi ro nwene evaọ ehru na.”—AFP International Text Wire.
“Evaọ Edivẹ-Oka, egba-eriariẹ a ta nọ a go obọ Ughọjọ Ẹdẹ Ọraha na kẹle udevie aso gaga vi epanọ o jọ no, onọ u dhesẹ nọ ahwo-akpọ ọvo a be te raha akpọ na no riẹriẹriẹ kẹle.”—ABC News.
“Utu egba-eriariẹ jọ nọ i no erẹwho sa-sa ze a ta nọ o rrọ vevẹ gaga enẹna inọ ahwo-akpọ ọvo a te raha omarai no fiki eware nọ a bi ru.”—The Guardian.
Kọ a te raha ahwo-akpọ kpobi gbe otọakpọ na no kẹle? Kọ o gwọlọ nọ ozọ oware nọ o te via evaọ obaro u mu omai? Eme Ebaibol na ọ ta?
Eme ọ te via evaọ obaro?
Ebaibol na ọ ta nọ, “Otọakpọ na o rẹ jọ bẹdẹ bẹdẹ” yọ ahwo “a te rriae bẹdẹ bẹdẹ.” (Ọtausiuwoma Na 1:4; Olezi 37:29) Fikiere, ahwo-akpọ a sae raha otọakpọ na ha, yọ a te sai ru otọakpọ na soso fihọ epanọ a gbẹ rọ rriae he he.
O make rrọ ere na, Ebaibol na ọ ta nọ akpọ na o ti kuhọ ẹdẹ jọ. Wọhọ oriruo, ọ ta nọ “akpọ na ọ be vrẹ.”—1 Jọn 2:17.
Re who wuhrẹ kpahe oware nọ Ebaibol na ọ ginẹ ta kpahe ekuhọ akpọ na, se uzoẹme na “Kọ Akpọ na O Muhọ Ekuhọ No? Eme Họ Apocalypse?”
Re who wuhrẹ oware nọ Ebaibol na ọ ta kpahe okenọ eware nọ e te via evaọ akpọ na e te rọ via, se uzoẹme na “Oke Vẹ Akpọ na O ti ro Kuhọ?”
Rẹro nọ eware i ti woma
Ebaibol na ọ sai fiobọhọ kẹ omai rẹro nọ eware i ti woma, je ru omai wo evawere ghelọ epanọ eware e rrọ evaọ akpọ na obọnana kẹhẹ. Evaọ oghẹrẹ vẹ?
Ebaibol na o wo ehrẹ buobu nọ e sai fiobọhọ kẹ omai evaọ uzuazọ kẹdẹ kẹdẹ. (2 Timoti 3: 16, 17) Wọhọ oriruo, se uzoẹme na “Eware nọ Who re Ru re Who Gbe Roro Iroro Ga Hrọ Họ” re whọ ruẹ epanọ Ebaibol na ọ sai ro fiobọhọ kẹ owhẹ gbẹ wereva ghelọ ebẹbẹ nọ i bi te owhẹ kẹhẹ.
Ebaibol na ọ kẹ omai ẹruore nọ eware i ti woma evaọ obaro. (Ahwo Rom 15:4) Ọ ta eware nọ ma sai rẹro nọ e te via enẹna gbe evaọ obaro, onọ u re fiobọhọ kẹ omai nọ ozọ eware nọ e be via evaọ akpọ na u gbe ro mu omai hi.
Re who wuhrẹ eware buobu evaọ Ebaibol na, kpohọ oria nọ ma ruẹrẹ fihọ nọ whọ sai jo wuhrẹ Ebaibol na kẹ omara.
a “Ughọjọ ẹdẹ ọraha nọ a se Doomsday Clock na yọ oware nọ a ru nọ a be rọ vẹvẹ ahwo unu inọ mai ahwo-akpọ ọvo ma te rehọ eware nọ ma bi ku rọ raha akpọ na no riẹriẹriẹ. Nọ ẹme odẹme nọ a ro dhesẹ ebẹbẹ nọ u fo nọ ahwo-akpọ a re ru oware jọ kpahe re ma sae gbẹ rria otọakpọ na.”—Bulletin of the Atomic Scientists.