Ukoko Omokpokpọ Akpọ-Soso nọ a re se World Health Organization (koyehọ WHO) o ta nọ, rite Asoi 23, 2022, ahwo nọ a bu te ima ezeza gbe idu egba ivẹ gbe udhosa-gbikpe (6,270,000) ẹyao COVID-19 o kpe no. Rekọ, evaọ iyẹrẹ nọ a siobọno evaọ Asoi 5, 2022, WHO ọ ta nọ ahwo nọ ẹyao COVID-19 na o kpe no a bu vi ere thethabọ. O ta nọ no ukpe 2020 rite 2021, “ahwo nọ ẹyao COVID-19 na o kpe dẹẹ gbe ahwo nọ a whu fiki ebẹbẹ efa nọ ẹyao na ọ wha ze . . . a bu te oware wọhọ ima ikpegbene gbe idu egba izii (14,900,000).” Kọ Ebaibol na ọ ta oware jọ nọ u dhesẹ nọ ahwo a ti whu bu te enẹ?

•   Jesu ọ ta nọ ikpeyao hayo “ikpehre eyao” nọ i re vo, e te jariẹ evaọ etoke nọ Ebaibol na o se “edẹ urere na.”—Luk 21:11, Ebaibol Contemporary English Version; 2 Timoti 3:1.

 Eruẹaruẹ Jesu i bi rugba nẹnẹ. Whọ tẹ gbẹ gwọlọ riẹ kpahe eware efa, se uzoẹme na “Eme Họ Oka ‘Edẹ Urere’ Hayo ‘Oke Urere’ Na?”

•   Ebaibol na ọ ta nọ Ọghẹnẹ yọ “Ọghẹnẹ omosasọ kpobi, . . . ọ rẹ sasa omai oma evaọ edawọ mai kpobi.”—2 Ahwo Kọrint 1:3, 4.

 Ahwo buobu nọ ahwo rai a whu no, a wo omosasọ no ovuẹ nọ o rrọ Ebaibol na ze. Whọ tẹ gbẹ gwọlọ riẹ kpahe eware efa, se izoẹme nana “Eware jọ nọ E rẹ Sai Fiobọhọ kẹ Ohwo nọ Ọ Rrọ Uweri Thihakọ—Oware nọ Whọ rẹ Sai Ru Nẹnẹ” gbe “Ehrẹ nọ E Mai Woma nọ I re Fiobọhọ kẹ Ahwo nọ A Rrọ Uweri.”

•   “Jọ Uvie ra o ze. Jọ oreva ra u rugba evaọ otọakpọ na, wọhọ epanọ o rrọ evaọ obọ odhiwu.”—Matiu 6:10.

 Kẹle na nọ “uvie Ọghẹnẹ” o tẹ ze no, “ohwo ọvo nọ ọ [te] rria ẹkwotọ na nọ ọ te ta nọ, ‘Mẹ be mọ’ ọ te jariẹ hẹ.” (Mak 1:14, 15; Aizaya 33:24) Rri ividio na Eme Họ Uvie Ọghẹnẹ? re whọ riẹ kpahe egọmeti nana nọ ọ rrọ obọ odhiwu na, gbe eware nọ u ti ru.

 Ma bi zizie owhẹ nọ who gbe wuhrẹ Ebaibol na, re whẹ avọ ahwo uviuwou ra wha wo erere no emamọ ehrẹ nọ e rrọ eva riẹ ze. Eghale nọ Ọghẹnẹ ọ ya eyaa rai na i ve ti te owhai re.