HAI ROU!

Ahwo A jẹ Ruawa Gaga Evaọ Ukpe 2023—Eme Ebaibol na Ọ Ta?

KPORO

Evaọ 2023, eware nọ e via evaọ akpọ na i dhesẹ vevẹ nọ ma be rria etoke nọ Ebaibol na o se “edẹ urere na.” (2 Timoti 3:1) Eware nọ e be via enẹna yọ eware nọ Ebaibol na ọ ta nọ e te via evaọ oke mai na.

Oware nọ Ebaibol na ọ ta gbe eware nọ e be via

“Emo gbe usi emo.”—Matiu 24:6.

“Eria nọ a be jọ ru ozighi je fi ẹmo evaọ akpọ na i bi dhe ebuebu.” a

Se izoẹme nana “Ono O ti Siwi Ahwo Gheghe Na?” gbe “Ugho nọ A be Raha Fihọ Ẹmo Evaọ Akpọ na U Bu Vi Edọla Imaima Ivẹ No.”

“Etọ i ti nuhu no oria ruọ oria.”—Mak 13:8.

“No anwọ emuhọ 2023 ze, etọ nọ i nuhu gaga no i te ikpegbesa no, yọ onana họ unu nọ o mai bu kpaobọ nọ a kere fihotọ no evaọ ukpe ọvo.” b

Se uzoẹme na “Otọ U Nuhu Raha Eware Gaga je Kpe Ahwo Evaọ Turkey gbe Syria.”

“Eware idudu.”—Luk 21:11.

“Okenọ ma jẹ hae rọ ta nọ ẹrrorro ọgaga ọ rrọ o vrẹ no; enẹna o wọhọ ẹsenọ ma rrọ eva ame ọrrorro nọ ọ be họrọ.”—António Guterres, UN secretary-general. c

Se uzoẹme na “Ivo Egaga 2023 E be Lẹliẹ Eria Kpobi Rrorro.”

“Ohọo u ti mu.”—Matiu 24:7.

“2023: Wọhọ ikpe efa nọ e vrẹ, ukpe nana o jọ bẹbẹ kẹ ahwo re a kuọ uviuwou rai.” d

Se uzoẹme na “Ẹbẹbẹ Emu Ọ Rrọ Akpọ na Soso Fiki Ẹmo gbe Eware nọ I bi Nwene Evaọ Ehru Na.”

“Oke obẹbẹ nọ o rẹ bẹ ẹria o te jọ.”—2 Timoti 3:1.

“Evaọ akpọ na soso, omọvo evaọ usu imaree a be mọ ẹyao iroro.” e

Se uzoẹme na “Izoge nọ E be Mọ Ẹyao Iroro I bi Dhe Ebuebu.”

Ẹvẹ eware e te jọ evaọ 2024?

Ohwo ọvo ọ riẹ epanọ eware e te jọ evaọ 2024 họ. Rekọ eware nọ e be via evaọ akpọ na i dhesẹ nọ Uvie Ọghẹnẹ, nọ o rrọ egọmeti nọ Ọghẹnẹ o ro mu evaọ obọ odhiwu o te ze kẹle. Uvie na o te raha egọmeti ahwo-akpọ no, yọ u ti si eware kpobi nọ e be wha uye-oruẹ gbe awaruọ ze no.—Daniẹl 2:44; Eviavia 21:4.

Bọo oke yena, nọ ma tẹ be ruawa, ma sae rẹroso Ọghẹnẹ inọ o ti fiobọhọ kẹ omai. Ebaibol na ọ ta nọ:

“Nọ ozọ u te bi mu omẹ, me re fievahọ owhẹ.”—Olezi 56:3.

Ẹvẹ ma sai ro dhesẹ nọ ma fievahọ Ọghẹnẹ? Iviena gbe wuhrẹ kpahe eyaa nọ Ọghẹnẹ ọ ya evaọ Ebaibol na kpahe okenọ uye-oruẹ o gbẹ te jọ họ. Uwuhrẹ Ebaibol ọvọvẹ mai nana o sai fiobọhọ kẹ owhẹ avọ ahwo uviuwou ra riẹ epanọ wha sai ro wo erere no eware nọ Ọghẹnẹ ọ ya eyaa rai ze evaọ Ebaibol na.

a Foreign Affairs, “A World at War: What Is Behind the Global Explosion of Violent Conflict?” onọ Emma Beals avọ Peter Salisbury a kere, Akpe 30, 2023.

b Earthquake News, “Year 2023: Number of Major Earthquakes on Course for Record,” Asoi, 2023.

c United Nations, “Secretary-General’s Opening Remarks at Press Conference on Climate,” Ahrẹ 27, 2023.

d World Food Programme, “A Global Food Crisis.”

e World Health Organization, “World Mental Health Day 2023,” Akpe 10, 2023.