Ẹmo nọ a bi fi evaọ obọ Ukraine na avọ eware nọ i bi nwene evaọ ehru na i gbe bi ru nọ emu o gbẹ riẹ tere he evaọ akpọ-soso. Onana o be mae via evaọ ekwotọ nọ ahwo buobu a be jọ ruẹ emu re tere vẹre he.

•   “Ozighi, ẹmo, ehru nọ o bi nwene, epẹtiro nọ e be ghare gbe eware efa i bi ru nọ emuore o gbẹ riẹ tere he.”—António Guterres, Ọnowuzou UN, Ahrẹ 17, 2023.

•   “Egọmeti Russia u siomano ọtamuo nọ a ru inọ Ukraine ọ rẹ sae fa emuore wọhọ eka gbe iwhiti se erẹwho efa ababọ ozọ. Egba-eriariẹ a bi roro nọ oware nana nọ Russia u ru na o te lẹliẹ ẹbẹbẹ emu nọ ọ rrọ akpọ-soso na ga vi epaọ anwẹdẹ, jẹ te tubẹ lẹliẹ emu ghare gaga maero evaọ erẹwho nọ i wo ugho tere he evaọ North Africa gbe Middle East.”—Atalayar.com, Ahrẹ 23, 2023.

 Wuhrẹ oware nọ Ebaibol na ọ ta kpahe ẹbẹbẹ emu gbe obaro akpọ na.

•   Jesu ọ ruẹaro nọ: “Orẹwho o te kpareso orẹwho, uvie o te kpareso uvie, yọ no oria ruọ oria ohọo u ti mu.”—Matiu 24:7.

•   A jọ obe Eviavia evaọ Ebaibol na dhesẹ edhẹ-enyenya ene nọ i dikihẹ kẹ eware sa-sa. Ọjọ rai o dikihẹ kẹ ẹmo-ofio. Ọnọ o bi lele iei o te dikihẹ kẹ ohọo nọ u ti mu. Koyehọ etoke nọ emu ọ te jariẹ tere he, yọ emu ọ te ghare thomawa. Oria Ebaibol na o ta no, “Mẹ tẹ ruẹ esi obiebi jọ, yọ ọnọ ọ be dhẹ e na owawọ-eware o rọ obọ riẹ, me te yo edo nọ ọ wọhọ uru . . . nọ o ta nọ, ‘Omodhe eka họ osa iruo okpẹdẹ; imidhe esa ẹgu-ọka họ osa iruo okpẹdẹ.’”—Eviavia 6:5, 6, Ebaibol Ẹri Na.

 Eruẹaruẹ Ebaibol nana nọ e ta kpahe ẹbẹbẹ emu na i bi rugba evaọ oke nana nọ Ebaibol na o se “edẹ urere na.” (2 Timoti 3:1) Re who gbe wuhrẹ kpahe “edẹ urere na” gbe oghẹrẹ nọ edhẹ-enyenya ene na e be dhẹ, rri ividio na Akpọ na O Nwene No Anwọ Ukpe 1914 Ze Na, who ve je se uzoẹme na “Edhẹ-Enyenya Ene Na—Yọ Amono?”

•   Obọdẹ ehrẹ nọ i re fiobọhọ kẹ ohwo e rrọ Ebaibol na. E sai fiobọhọ kẹ omai riẹ oware nọ ma re ru nọ eware e tẹ rrọ yoyoma, te emuore nọ e be ghare gbe emu nọ ọ riẹ tere he. Whọ te ruẹ ehrẹ jọ evaọ uzoẹme na “Epanọ Whọ Sae rọ Maneji Ugho.”

•   Ebaibol na ọ tẹ jẹ kẹ omai ẹruore inọ eware i ti woma. Ọ ta nọ oke o be tha nọ “emu ọ te dafia evaọ otọakpọ na,” ohwo kpobi o ve ti wo emu nọ ọ rẹ re ziezi. (Olezi 72:16) Re who gbe wuhrẹ kpahe ẹruore nana nọ ọ rrọ obaro na, gbe oware nọ ma sai ro fievahọ iẹe, se uzoẹme na “Ẹruore nọ Ma Wo Kpahe Obaro Na.”