Evaọ edẹ udhegbihrẹ amara Ọvo, 2023, ahwo buobu a ti ru ekareghẹhọ nọ a re se International Holocaust Remembrance Day. O vrẹ ikpe udhosa gbe ikpegbisoi no nọ egọmeti Nazi a ro kpe ahwo buobu gbidi gbidi. Ẹsejọhọ oware nana o te lẹliẹ owhẹ nọ inọ: ‘Kọ fikieme Ọghẹnẹ ọ rọ kẹ oware utiọye uvẹ re o via?’

•   Re whọ ruẹ oware nọ Ebaibol ọ ta, se uzoẹme na, “Fikieme Ọghẹnẹ Ọ rọ Kuvẹ kẹ Okpemuotọ Na? Eme Ọghẹnẹ Ọ gbẹ Whaha iẹe He?”

 Ahwo Ju nọ a kpe evaọ ẹmo nana a bu tọtọ oma. Orọnikọ ahwo Ju ọvo a kpe he. A kpe utu amọfa jọ buobu re. Isẹri Jihova a jọ usu ahwo nana. A kpe rai fikinọ a bi koko izi Ọghẹnẹ.

•   Re whọ gbẹ riẹ kpahe oware nọ o via kẹ Isẹri Jihova, se uzoẹme na, “Eme Ọ Via kẹ Isẹri Jihova Evaọ Etoke Esuo Nazi?”

 Nẹnẹ, ozọ u bi mu ahwo buobu inọ a sae wariẹ kpe ahwo ugbekpe wọhọ epanọ egọmeti Nazi o ru na. U woma gaga inọ Jihova ọ ya obọdẹ eyaa jọ kẹ omai. Ọ ta nọ evaọ obaro, eware nọ e rẹ lẹliẹ ohwo jọ awawa kpobi e gbẹ te via ha wọhọ epanọ a kpe ahwo evaọ oke Nazi na.

•   “‘Keme mẹ riẹ iroro nọ me bi roro kpahe owhai,’ ere Jihova ọ ta, ‘iroro udhedhẹ, orọnikọ okpẹtu hu, re me ru eware woma kẹ owhai evaọ obaro, wha ve je wo ẹruore.’”—Jerimaya 29:11. a

 Jihova o ti ru eyaa riẹ na gba nọ ọ tẹ raha ahwo muomu kpobi no. Kẹsena ọ vẹ te ruẹrẹ otọakpọ mai na. Kẹle na:

•   O ti kpe ahwo nọ e be wha uye se amọfa no.—Itẹ 2:22.

•   O ti siwi ahwo kpobi nọ uye u te oma.—Eviavia 21:4.

•   Ọ te kpare ahwo nọ a whu no ze.—Jọn 5:28, 29.

 Whọ sai fievahọ emamọ eware nọ Ebaibol ọ ta nọ e te via na. Re whọ riẹ oware nọ ma rọ ta ere, vuẹ Isẹri Jihova re a wuhrẹ Ebaibol kugbe owhẹ.