HAI ROU!
Epanọ Whọ Sai ro Wo Ẹruore Evaọ 2024—Eme Ebaibol na Ọ Ta?
Ahwo buobu a roro nọ ebẹbẹ nọ i bi te ahwo evaọ akpọ na i ti kuhọ evaọ 2024 họ. Rekọ ma sai rẹro nọ eware i ti woma evaọ obaro ghele. Eme ọ rẹ sae kẹ omai ẹruore?
Ebaibol na ọ sae kẹ omai ẹruore
Ọghẹnẹ ọ jọ Ebaibol na ya eyaa nọ o ti ku ebẹbẹ nọ e be lẹliẹ akpọ bẹ ahwo nẹnẹ na họ. Kẹle na, Ọghẹnẹ “o ti ririe irui-oviẹ kpobi no aro [mai], uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.”—Eviavia 21:4.
Re who gbe wuhrẹ kpahe eware nọ Ọghẹnẹ ọ ya eyaa nọ o ti ru evaọ obaro evaọ Ebaibol na, se uzoẹme na “Ẹruore nọ Ma Wo Kpahe Obaro Na.”
Epanọ Ebaibol na ọ sai ro fiobọhọ kẹ owhẹ enẹna
Ẹruore nọ Ebaibol na ọ kẹ omai kpahe obaro o sai fiobọhọ kẹ owhẹ wo evawere jẹ whaha ekpehre iroro. (Ahwo Rom 15:13) Ehrẹ Ebaibol na e sai je fiobọhọ kẹ owhẹ thihakọ ebẹbẹ wọhọ ẹyao, uvuhu, gbe okienyẹ enẹna.
Ebaibol na o fiobọhọ kẹ ọzae jọ wo udhedhẹ gbe evawere dede nọ a yogbe gaga okenọ ọ jẹ rro ze. Re whọ riẹ epanọ Ebaibol na o ro fiobọhọ kẹe, rri ividio na Juan Pablo Zermeño: Jihova O Fiobọhọ kẹ Omẹ Yeri Emamọ Uzuazọ.
Re whọ riẹ epanọ Ebaibol na ọ sai ro fiobọhọ kẹ owhẹ thihakọ nọ udu u te bi brukpe owhẹ, nọ eva e gbẹ be were owhẹ hẹ, nọ whọ tẹ be ruawa hayo nọ ohwo ra jọ o te whu, se uzoẹme na “Kọ Mẹ Sae Ruẹ Eme nọ E rẹ Sasa Omẹ Oma Evaọ Ebaibol Na?”
Ebaibol na o fiobọhọ kẹ aye jọ nọ ọ retaya no iruo isoja no wo ẹruore. Eva e jẹ hae were aye na ha, yọ ọ jẹ hae daezọ amọfa ha. Re whọ ruẹ epanọ Ebaibol na o ro fiobọhọ kẹe, rri ividio na Me Fi Ugbeke Mẹ Họ Otọ.
Ru eware nọ e rẹ wha evawere se owhẹ avọ ahwo uviuwou ra evaọ ukpe 2024. Gbe wuhrẹ kpahe epanọ Ebaibol na ọ sai ro fiobọhọ kẹ owhẹ. Ta kẹ Isẹri Jihova re a wuhrẹ owhẹ Ebaibol na. Uwuhrẹ na ọvọvẹ. Whọ te ruẹ epanọ Ọghẹnẹ ọ sae rọ kẹ owhẹ “iroro udhedhẹ” enẹna je ru ‘eware woma kẹ owhẹ evaọ obaro, re who wo ẹruore.’—Jerimaya 29:11.