Evaọ edẹ 6 amara Akpegbọvo 2022, erẹwho sasa nọ i kokohọ kẹ ẹgwae jọ a ta kpahe epanọ a sae rọ whaha eware okpẹtu nọ e rrọ akpọ na via. Ẹgwae na o kuhọ evaọ Ẹdoka, edẹ 20 amara Akpegbọvo 2022. Odẹ ẹgwae na họ COP27 United Nations Climate Change Conference. A jọ ẹgwae na rọwo nọ a te rọ ugho fiobọhọ kẹ erẹwho nọ i wo ugho tere he nọ eware okpẹtu nọ a rọ obọ so ho e be via kẹ. Rekọ ahwo buobu a riẹ nọ onana o te sae whaha eware okpẹtu nọ a rọ obọ so ho ho.

•   Ọzae jọ nọ a re se António Guterres nọ ọ rrọ okere kẹ United Nations, ọ ta evaọ edẹ 19 amara Akpegbọvo 2022 inọ: “Eva e were omẹ inọ ma rọwo nọ ma rẹ zọhọ ugho ze ro fiobọhọ kẹ erẹwho nọ e be ruẹ uye fiki eware okpẹtu nọ a rọ obọ so ho. Rekọ onana ovo u te he . . . Otọakpọ mai na ọ raha gaga no fikiere o gwọlọ nọ ma re ru oware jọ kpahe iẹe kpata kpata.”

•   “Kẹle na eware e sai nwene evaọ otọakpọ na yọ onana o sae wha okpẹtu se ohwo kpobi.”—Mary Robinson, nọ ọ jọ prẹsidẹnte Ireland gbe UN High Commissioner for Human Rights, edẹ 20 Akpegbọvo , 2022.

 Izoge họ ahwo nọ a be mae ruawa kpahe epanọ otọakpọ mai na ọ te jọ evaọ obaro. Kọ erẹwho akpọ na a te sai kuomagbe re a ru oware nọ a sae rọ whaha eware okpẹtu wọhọ epanọ a ta? Eme Ebaibol na ọ ta?

 Ebaibol na o dhesẹ nọ make epanọ ahwo a te daoma te re a sai ru eware woma kẹhẹ, a te sai si eware nọ e be wha eware okpẹtu ze no ho. Ma ta kpahe ẹjiroro ivẹ jọ nọ ma rọ ta ere:

•   “Oware nọ o gẹle no a rẹ sai ru ei liọ họ.”—Ọtausiuwoma Na 1:15.

   Oware nọ onana u dhesẹ: Ahwo egọmeti a sai ru eware kpobi nọ a ma omaa rai hi keme a ma ahwo-akpọ re a su omarai hi. (Jerimaya 10:23) Erẹwho akpọ na a tẹ maki kuomagbe, makọ epanọ a daoma te kẹhẹ, a sai ku ebẹbẹ akpọ na họ họ.

•   “Keme ahwo a ti you omobọ rai, you ugho, . . . a te rọwo ru ọtamuo ho.”—2 Timoti 3:2, 3.

   Oware nọ onana u dhesẹ: Ebaibol na ọ ta nọ evaọ oke mai na, ahwo a ti you omobọ rai ọvo, yọ a te rọwo ru oware nọ o rẹ wha erere se amọfa ha.

 Orọnikọ egọmeti ahwo-akpọ ae a ti si eware okpẹtu no otọ evaọ obaro ho. Ọghẹnẹ ọ rọ osu nọ o te ziezi mu kẹ omai no, ọye họ Jesu Kristi. Ebaibol na ọ ta kpahe iẹe nọ:

•   “Egọmeti na e rẹ te jọ ẹkoko riẹ. A re ti se odẹ riẹ Ọkiroro Ogbunu, Ọghẹnẹ Ologbo, Ọsẹ Ebẹdẹ Bẹdẹ, Osu Udhedhẹ.”—Aizaya 9:6, ẹme-obotọ.

 Jesu họ ovie Uvie Ọghẹnẹ, hayo ovie egọmeti nọ Ọghẹnẹ o ro mu evaọ obọ odhiwu. (Matiu 6:10) Jesu o wo ogaga gbe areghẹ nọ ọ sae rọ rẹrote otọakpọ na gbe ahwo-akpọ, yọ ọ gwọlọ nọ o re ru ere. (Olezi 72:12, 16) Evaọ okenọ Jesu o ti su otọakpọ na, ọ te rọ egọmeti obọ odhiwu na raha enọ e be “raha otọakpọ na,” kẹsena ọ vẹ te ruẹrẹ otọakpọ na kpobi họ.—Eviavia 11:18, ẹme-obotọ; Aizaya 35:1, 7.

 Re who gbe wuhrẹ kpahe epanọ eware okpẹtu nọ e be via na i ti ro kuhọ riẹriẹriẹ, se uzoẹme na “Oware nọ Ebaibol Ọ Ta Kpahe Okogho Akpọ Mai na nọ U bi Dhe Ẹrẹraha gbe Epanọ Odẹnotha Ọ Te Jọ.”