Kukpe kukpe, etọ nọ i re nuhu i re bu te idu buobu gbidi gbidi. Dede nọ ejọ i re nuhu ga tere he, efa i re nuhu te epanọ e rẹ rọ raha eware, kpe ahwo, je ru nọ ahwo a rẹ rọ ruẹ uye gaga. Evaọ ẹsejọ, etọ nọ i nuhu e rẹ lẹliẹ ẹkporo ọgaga fi no obọ abade ziọ unueri, yọ onana o rẹ raha eware je kpe ahwo buobu nọ e be rria kẹle eria itieye na. Kọ Ebaibol na ọ ta kpahe etọ nọ i ti nuhu?

Eware nọ ma te ta kpahe evaọ uzoẹme nana

•  Kọ a jọ Ebaibol na ruẹaro kpahe etọ nọ i ti nuhu?

•  Kọ etọ nọ i bi nuhu evaọ oke mai na yọ enọ a ruẹaro rai evaọ Ebaibol na?

•  Eme eruẹaruẹ Ebaibol nọ a jọ ta kpahe etọ nọ i ti nuhu na e rẹ kareghẹhọ omai?

•  Iroro ethọthọ nọ ahwo a wo kpahe eruẹaruẹ Ebaibol gbe etọ nọ i bi nuhu

 Jesu ọ ta kpahe etọ nọ i ti nuhu evaọ eruẹaruẹ Ebaibol na jọ. Ma sai se kpahe eruẹaruẹ nana evaọ eria Ebaibol esa nọ e rrọ obotọ na:

 “Orẹwho o te kpareso orẹwho, uvie o te kpareso uvie, yọ no oria ruọ oria ohọo u ti mu, etọ i ti nuhu.”—Matiu 24:7.

 “Orẹwho o te kpareso orẹwho, uvie o te kpareso uvie; etọ i ti nuhu no oria ruọ oria; ohọo u ti mu re.”—Mak 13:8.

 “Etọ i ti nuhu gaga, yọ no oria ruọ oria ohọo u ti mu avọ ikpeyao nọ e te jọ.”—Luk 21:11.

 Jesu ọ ta nọ “etọ i ti nuhu gaga” “no oria ruọ oria,” yọ evaọ oke ovona, ẹmo, ohọo gbe ikpeyao e te jariẹ re. Nọ eware nana kpobi e tẹ be via evaọ etoke ọvona, onana u dhesẹ nọ ma be rria “oke urere uyero-akpọ na,” hayo “edẹ urere na.” (Matiu 24:3; 2 Timoti 3:1) Nọ ma te lele epanọ a re kele oke evaọ Ebaibol na, ma rẹ ruẹ nọ “edẹ urere na” i muhọ evaọ ukpe 1914 yọ i ri kuhọ họ.

 Ee. Eware nọ Jesu ọ ruẹaro rai gbe eware nọ ọ ta kpahe etọ nọ i ti nuhu, eye ma be ruẹ nọ e be via nẹnẹ na. No anwọ ukpe 1914 ze, etọ nọ i nuhu gaga i bu vi odu ọvo, egba izii gbe udhuvẹ-gbikpe (1,950) no, yọ ahwo nọ a whu evaọ etọ nọ i nuhu na a bu vi ima ivẹ (2,000,000). a Joma ta kpahe ejọ nọ e via evaọ etoke mai na.

 Ukpe 2004—Indian Ocean. Otọ o nuhu gaga, yọ onana u ru nọ ẹkporo abade ọ rọ wọ ruọ erẹwho buobu je kpe ahwo nọ a bu te idu egba ivẹ gbe udhegbisoi (225,000).

 Ukpe 2008—China. Otọ o nuhu gaga, yọ ọ raha eware gaga evaọ ewho gbe iwhre buobu. O kpe ahwo nọ a bu te oware wọhọ idu udhone-gbikpe (90,000), ahwo nọ a nwoma a bu te oware wọhọ idu egba esa gbe udhosa gbe ikpegbisoi (375,000), yọ ọ raha iwou ahwo ima buobu.

 Ukpe 2010—Haiti. Otọ o nuhu gaga, yọ efa nọ e ga tere he e wariẹ nuhu. O kpe ahwo nọ a bu vi idu egba esa (300,000) yọ ọ raha iwou ahwo nọ a bu vi ima ọvo.

 Ukpe 2011—Japan. Otọ nọ o nuhu gaga u ru nọ ẹkporo abade ọ rọ wọ ruọ ẹwho je kpe ahwo nọ a bu te oware wọhọ idu ikpegberee, gbe egba isoi (18,500), yọ ahwo nọ a dhẹ no ẹwho rai fiki ọraha na a bu te idu ahwo buobu gbidi gbidi. Otọ nọ o nuhu na ọ raha ẹjini ikpẹ ologbo jọ nọ ọ rrọ ẹwho Fukushima. Enua i te su no eva riẹ ze fihọ okegbe yena soso. Nọ ikpe 10 e make vrẹ no dede, ahwo nọ a bu te oware wọhọ idu udhuvẹ (40,000) a re sai zihe kpohọ iwou rai nọ e kẹle ẹjini na ha, keme enua na e gbẹ rrọ okegbe na.

 Eruẹaruẹ Ebaibol nọ a jọ ta kpahe etọ nọ i ti nuhu na, i fiobọhọ kẹ omai riẹ oware nọ o te via evaọ obaro kẹle na. Jesu ọ ta nọ: “Nọ wha tẹ ruẹ eware nana nọ e be via, wha riẹ nọ Uvie Ọghẹnẹ o kẹle no.”—Luk 21:31.

 Ebaibol na o dhesẹ nọ Uvie Ọghẹnẹ yọ egọmeti nọ Ọghẹnẹ o ro mu evaọ obọ odhiwu, nọ Jesu ọ rrọ ovie riẹ. Jesu o wuhrẹ ilele riẹ nọ a hae lẹ kpahe Uvie na.—Matiu 6:10.

 Evaọ oke nọ Uvie Ọghẹnẹ u te mu otọakpọ na họ esuo no, Ọghẹnẹ ọ te whaha eware okpẹtu kpobi, te etọ nọ i re nuhu, re e siọ ahwo ba ekpe. (Aizaya 32:18) Ofariẹ, Ọghẹnẹ ọ te ruẹrẹ eware nọ etọ nọ i nuhu e raha no họ, je si edada kpobi nọ e wha se ahwo no. (Aizaya 65:17; Eviavia 21:3, 4) Re whọ gbẹ riẹ kpahe eware nọ Ọghẹnẹ o ti ru, se uzoẹme na “Eme Uvie Ọghẹnẹ U ti Ru?”