Ọzae nọ o wuzou ukoko nọ u re momo igho kẹ erẹwho akpọ na nọ i yogbe gaga nọ a re se World Bank Group ọ ta nọ, “ekọ akpọ na e wariẹ muhọ ẹraha no.” Ọ ta re nọ, “eware i bi dhe ẹghẹghare ọvo, yọ ugho o riẹ tere he.” Ọ niyẹrẹ nana evaọ amara Azeza 2022.

 Ukoko ofa nọ u re muẹrohọ epanọ eki gbe igho akpọ-soso e be nya, nọ a re se International Monetary Fund o ta nọ, “emu gbe eware wọhọ epẹtiro e ghare thesiwa no, onọ o be wha ẹbẹbẹ ologbo se iyogbere evaọ erẹwho nọ i fe tere he.”

 Ebaibol na o ru nọ ma rọ riẹ oware nọ ẹgaga akpọ hayo ẹbẹbẹ ekọ ọ rọ rrọ otọ, epanọ ma sai ro thihakọ riẹ, gbe oware nọ u ti si ẹbẹbẹ nana kpobi notọ riẹriẹriẹ.

•   Ebaibol o se oke nana nọ ma rrọ na “edẹ urere na.”—2 Timoti 3:1.

•   Jesu ọ ta nọ “eware idudu” hayo eware nọ i ti ru ozọ mu ahwo e te jariẹ evaọ oke mai nana. (Luk 21:11) Oghẹrẹ nọ eware e be rọ ghare nẹnẹ o be ginẹ lẹliẹ ozọ mu ahwo. Ozọ epanọ eware e te jọ odẹ notha u bi mu ahwo, a be ruawa sọ a te gbẹ sae rẹrote ahwo uviuwou rai.

•   Obe Eviavia o ta nọ emu ọ te jọ ghaghare evaọ oke mai nana. Eruẹaruẹ na jọ e ta nọ: “Me te yo edo nọ ọ wọhọ uru . . . nọ o ta nọ, ‘Omodhe eka họ osa iruo okpẹdẹ; imidhe esa ẹgu-ọka họ osa iruo okpẹdẹ!’”—Eviavia 6:6, Ebaibol Ẹri Na.

 Whọ tẹ gwọlọ gbẹ riẹ kpahe “edẹ urere na” gbe eruẹaruẹ nọ e rrọ obe Eviavia, rri ividio na Akpọ na O Nwene No Anwọ Ukpe 1914 Ze Na re who je se uzoẹme na “Edhẹ-Enyenya Ene Na—Yọ Amono?”

•   “A te bọ iwou, a vẹ te rria eva rai, a te kọ egbọ evaene a vẹ te re ibi rai. A te bọ no re omọfa ọ rria ha, hayo a te kọ no re omọfa ọ re he.”—Aizaya 65:21, 22.

•   “Emu ọ te dafia evaọ otọakpọ na; obọ ehru igbehru na o te vọ kpọhọhwẹ.”—Olezi 72:16.

•   “‘Fikinọ a bi kienyẹ ọnọ ọ be reoja, fiki imẹ-idio iyogbe na, mẹ te kpama re me ru oware jọ,’ ere Jihova ọ ta.”—Olezi 12:5. a

 Kẹlena Ọghẹnẹ o ti si ẹgaga notọ. O ti ru nọ ekọ i ti ro woma kẹ ohwo kpobi evaọ akpọ na soso, orọnikọ evaọ orẹwho jọ ọvo ho. Se uzoẹme na “Kọ O Sae Lọhọ re Akpọ O Woma kẹ Ahwo Kpobi?” re whọ riẹ epanọ o ti ro ru ei.

 Dede nọ eware i bi dhe ẹghẹghare nẹnẹ, Ebaibol na ọ sai fiobọhọ kẹ omai yeri uzuazọ mai vrẹ ghele. Evaọ oghẹrẹ vrẹ? Ehrẹ buobu e rrọ eva riẹ nọ i re fiobọhọ kẹ omai nọ ma gbe ro mu ugho raha ha. (Itẹ 23:4, 5; Ọtausiuwoma Na 7:12) Whọ tẹ gbẹ gwọlọ riẹ eware efa, se izoẹme na “Protect Your Livelihood” gbe “Epanọ Whọ Sae rọ Maneji Ugho.”