“O make rọnọ ẹyao COVID-19 na o gbe bi kpe ahwo evaọ akpọ na wọhọ epanọ o jọ vẹre he, o gbẹ be lẹliẹ ahwo mọ evaọ akpọ na soso.. . . Ma riẹ nọ oghẹrẹ okpẹyao ọfa ọ te wariẹ du lahwe evaọ obaro, yọ u fo nọ ma rẹ ruẹrẹ oma kpahe kẹe.”—Dr. Tedros Adhanom Ghebreyesus, ọnọ o wuzou World Health Organization, Asoi 22, 2023.

 Okpẹyao COVID-19 na u ru nọ oma ahwo buobu o gbẹ rọ ga ha, yọ ibuobu a be mọ ẹyao iroro. Kọ egọmeti gbe ahwo nọ a re siwi ahwo a be sai ku ebẹbẹ eyao nọ ma wo nẹnẹ na họ, kabikọ okpẹyao ọfa nọ ọ te ze nọ a rẹ ruẹrẹ oma kpahe kẹ?

 Ebaibol na ọ ta kpahe egọmeti nọ o ti siwi oghẹrẹ ẹyao kpobi nọ ma be mọ nẹnẹ na kpo. O ta nọ “Ọghẹnẹ obọ odhiwu ọ te rehọ uvie [hayo egọmeti] jọ mu.” (Daniẹl 2:44) Okenọ egọmeti yena o ti su, “ohwo ọvo nọ ọ be rria . . . nọ ọ te ta nọ, ‘Mẹ be mọ’ ọ te jariẹ hẹ.” (Aizaya 33:24) Ohwo kpobi o ti wo omokpokpọ je wo ẹgba uzoge.—Job 33:25.