Evaọ ẹdẹ avọ 24 Asoi 2022, okpoware jọ nọ a sae ruẹ unu gbiku riẹ hẹ o via evaọ ẹmewho jọ nọ a re se Uvalde, Texas, obọ America. Obe-usi na The New York Times o ta nọ, “ọzae jọ ọ sa emọ ikpegbizii kpe, kugbe iticha ivẹ . . . evaọ Robb Elementary School.”

 U yoma gaga inọ oware uyoma nana u bi dhe ẹviẹvia enẹna. Obe-usi na USA Today o ta nọ, “evaọ ukpe nọ u kpo na ọvo, unuẹse nọ a kpohọ isukulu nyae jọ sa ahwo kpe i bu te egba ivẹ gbe udhuvẹ gbe ikpegbizii (249). U ri wo ukpe ovo nọ unuẹse nọ a kpobọ isukulu nyae jọ sa ahwo u bu te enẹ hẹ anwọ 1970 ze.”

 Fikieme ahwo a be rọ wa aha nana? Eme o sai fiobọhọ kẹ omai nọ ma gbẹ te rọ jọ awawa ha nọ ugbẹsa ọ dotọ fia na? Kọ ozighi o ti notọ ẹdẹjọ? Ebaibol ọ kẹ iyo enọ nana.

•   Ebaibol o se oke nọ ma be rria na “edẹ urere na,” o tẹ jẹ ta nọ ahwo buobu “a ti wo uyoyou kẹ ibe ahwo-akpọ rai hi” yọ “a ti mu ofu-ọkpoo.” Onana u dhesẹ nọ a ti ru ozighi, jẹ wa aha gaga. Ahwo nọ a wo ekpehre uruemu nana, a ti “no onọ u yoma ruọ onọ o mai yoma.” (2 Timoti 3:1-5, 13) Whọ tẹ gwọlọ gbẹ riẹ kpahe edẹ urere na, se uzoẹme na, “Kọ A Jọ Ebaibol Ruẹaro Kpahe Iruemu Iyoma nọ Ahwo A Wo Nẹnẹ Na?”

 U bi gbe ahwo buobu unu inọ, ‘Kọ bẹsiẹ nọ ohwo oyoma jọ ọ be rọ sa ahwo kpe evaọ isukulu na, eme Ọghẹnẹ ọ gbẹ whaha iẹe he?’ Whọ te ruẹ uyo nọ Ebaibol ọ kẹ kpahe onọ yena nọ who te se uzoẹme na, “Fikieme Eware Iyoma E be rọ Via kẹ Ahwo Owoma?”

•   “Eware kpobi nọ a kere fihotọ anwẹdẹ na a kere ai re ma wuhrẹ no ai ze, re ma rọ ẹkwoma . . . omosasọ nọ u re no Ikereakere na ze wo ẹruore.”—Ahwo Rom 15:4.

 Eme nọ e rrọ Ebaibol na e sai lẹliẹ udu te owhẹ otọ dede nọ ozighi ọ da otọ fia. Who te se Awake! nọ uzoẹme riẹ o ta nọ “Will Violence Ever End?” (Kọ Ozighi O ti Notọ Ẹdẹjọ?) whọ te ruẹ evuẹ efa nọ e rẹ sai fiobọhọ.

 Whọ tẹ gwọlọ ruẹ ehrẹ kpahe epanọ esẹgbini a sai ro fiobọhọ kẹ emọ rai re ozọ u gbe mu ai gahrọ họ nọ a te bi yo usi ozighi nọ ọ da oria kpobi fia, se uzoẹme na, “Disturbing News Reports and Your Children” (Nọ Ozọ Ekpehre Usi O tẹ be Hai Mu Emọ Ra).

•   “O ti siwi ai no okienyẹ gbe ozighi.”­—Olezi 72:14.

•   “A ti duwu egbọdọ rai zihe ruọ etẹkpẹ a ve ti duwu izuẹ rai zihe ruọ ibrẹbe. Orẹwho o gbẹ te kpare ọgbọdọ rọsuọ orẹwho ho, yọ a ti gbe wuhrẹ ẹmo-ofio ofa ha.”—Maeka 4:3.

 Ọghẹnẹ o ti ru oware nọ egọmeti ahwo-akpọ a be sai ru hu. Uvie riẹ nọ u ti su no obọ odhiwu ze o te raha ekwakwa ẹmo kpobi, je si ozighi notọ. Whọ tẹ gwọlọ gbẹ riẹ kpahe oware nọ Uvie Ọghẹnẹ u ti ru, se uzoẹme na “Under God’s Kingdom ‘Peace Will Abound’” (Udhedhẹ O te Jọ Oria Kpobi Evaọ Uvie Ọghẹnẹ).