Ofruriọ ahwo egọmeti yọ ẹyao akpọ-soso, orọnikọ orẹwho jọ ọvo ho. Yọ onana o be wha uye se ahwo gaga. a Nọ ẹyao COVID-19 na o muhọ, ahwo buobu evaọ erẹwho sa-sa a jẹ ta nọ, igho nọ a rehọ ze re a ro fiobọhọ kẹ ahwo fiki ẹyao na, ahwo egọmeti a bi si rai fihọ ẹkpa rai no. O soriẹ ze nọ a gbẹ be sae rẹrote ahwo nọ a be mọ ziezi hi. Ere ọvo ho, oja u bi su te ahwo buobu ẹro, yọ u tube si uwhu kpe ahwo buobu no.

 Uye o be ginẹ bẹ ahwo gaga evaọ akpọ na fiki ofruriọ ahwo egọmeti. Ọzae jọ nọ a re se David Cameron nọ o je su United Kingdom oke jọ ọ ta nọ: “Orẹwho kpobi evaọ akpọ na ahwo egọmeti a be jọ fru ahwo re. Orẹwho ọvuọvo o no rie he.”

 O make rrọ ere na, ma riẹ nọ uviemenẹ, ofruriọ egọmeti kpobi o ti kuhọ. Ẹvẹ ma rọ riẹ? Rri oware nọ Ebaibol ọ ta nọ Ọghẹnẹ o ti ru.

 Ọghẹnẹ ọ ta ẹme jọ evaọ Ebaibol. Ọ ta nọ: “Mẹ Jihova, me you uvioziẹ; me mukpahe uji-utho gbe umuomu.” b (Aizaya 61:8) Nọ ahwo a tẹ be reoja fikinọ amọfa jọ a bi fi ai iwhayo, Ọghẹnẹ ọ be ruẹ oware kpobi nọ o be via. (Itẹ 14:31) Ọghẹnẹ ọ ta nọ: “Fikinọ a bi kienyẹ ọnọ ọ be reoja, . . . mẹ te kpama re me ru oware jọ.”—Olezi 12:5.

 Kọ eme Ọghẹnẹ o ti ru? Orọnikọ o ti ru epanọ egọmeti akpọ na o re ro woma ha. Rekọ ọ te raha ae no, egọmeti riẹ o ve ti su akpọ na. Ebaibol o se egọmeti nana “Uvie Ọghẹnẹ.” (Mak 1:14, 15; Matiu 6:10) Ebaibol ọ ta nọ: “Ọghẹnẹ obọ odhiwu ọ te rehọ uvie jọ mu . . . O te guọghọ jẹ rehọ ivie nana kpobi te oba, oye ọvo u ve ti dikihẹ bẹdẹ bẹdẹ.” (Daniẹl 2:44) Nọ Ọghẹnẹ ọ tẹ raha egọmeti ahwo-akpọ kpobi no, ofruriọ ọ te gbẹ jariẹ hẹ.

 Eme o lẹliẹ omai riẹ nọ ofruriọ o te gbẹ jariẹ hẹ nọ Uvie Ọghẹnẹ u te mu ahwo-akpọ họ esu no? Joma ta kpahe eware jọ.

1.  1. Ogaga esuo. Obọ Ọghẹnẹ nọ ọ mai wo ogaga na, ogaga esuo Uvie na u ti no ze.—Eviavia 11:15.

    Oware nọ u ro wuzou: Osa-uzou gbe eware efa nọ ahwo a be hwa, oye o rẹ lẹliẹ egọmeti wo ugho, a vẹ sai ru oware nọ a gwọlọ ru. Onana o rẹ whae ze nọ a rẹ rọ rehọ igho di ahwo enu ẹsejọ, whariẹ igho, hayo ta họ ahwo egọmeti obọ. Rekọ Uvie Ọghẹnẹ o te jọ ere he keme Ọghẹnẹ nọ o wo Uvie na o wo ogaga nọ ọ te rọ rẹrote ahwo nọ o bi su.—Olezi 145:16.

2.  2. Osu na. Ọghẹnẹ ọ rọ Jesu Kristi mu no re ọ jọ Ovie Uvie na.—Daniẹl 7:13, 14.

    Oware nọ u ro wuzou: Ohwo nọ o bi su ọ tẹ make rrọ emamọ ohwo gaga, ẹsejọ amọfa a sae bẹbẹ iẹe họ ru oware nọ u fo ho. (Ọtausiuwoma Na 7:20) Rekọ Jesu ọ rrọ ere he keme eware nọ o ru no i dhesẹ nọ a sae bẹbẹ iẹe họ ru oware nọ u fo ho ho. (Matiu 4:8-11) Ere ọvo ho, oware kpobi nọ Jesu o bi ru, o re ru ei fikinọ o you ahwo nọ o bi su gaga, yọ ọ gwọlọ ewoma rai.—Olezi 72:12-14.

3.  3. Izi na. Izi Uvie Ọghẹnẹ e rrọ gbagba, yọ e rẹ lẹliẹ eva were ohwo nọ o bi koko ai.—Olezi 19:7, 8.

    Oware nọ u ro wuzou: Izi nọ isu ahwo-akpọ a re fihọ ẹsejọ e rẹ jọ gaga, yọ oghẹrẹ nọ a re ru ohwo nọ o kie uzi na o rẹ ga hrọ ẹsejọ. Onana o rẹ so ẹe ze nọ ahwo a rẹ rọ nẹ ugho họ ahwo egọmeti obọ ẹsejọ re a gbe ru ai gaga ha. Rekọ izi Ọghẹnẹ e rrọ ziezi, yọ e rrọ rọkẹ ewoma ahwo nọ a bi koko ai. (Aizaya 48:17, 18) Orọnọ oware nọ ma re ru ọvo izi Ọghẹnẹ e ta kpahe he. E ta kpahe oware nọ o be lẹliẹ omai ru oware na. (Matiu 22:37, 39) Ọghẹnẹ ọ riẹ oware nọ o rrọ omai udu. Fikiere ọ rẹ re ohrọ mai nọ ma tẹ raha uzi jọ.—Jerimaya 17:10.

 Daoma re who gbe wuhrẹ kpahe oware nọ Ebaibol ọ ta kpahe epanọ Ọghẹnẹ o ti ro si egọmeti ahwo-akpọ nọ ofruriọ ọ da fia notọ.

•   Se uzoẹme na “Uvie Ọghẹnẹ Yọ Egọmeti nọ Ofruriọ Ọ te Jọ Họ,” re whọ ruẹ eware esa efa nọ e lẹliẹ omai riẹ nọ ofruriọ o te jariẹ vievie he evaọ Uvie Ọghẹnẹ.

•   Rri ividio na Eme Họ Uvie Ọghẹnẹ? re whọ gbẹ riẹ oware nọ Uvie Ọghẹnẹ o rrọ gbe epanọ o te rọ wha eghale ze otọakpọ na soso.

•   Whọ sae jẹ vuẹ Isẹri Jihova re a wuhrẹ Ebaibol kugbe owhẹ. Whọ te riẹ epanọ eyaa efa buobu nọ a fodẹ evaọ Ebaibol e sai ro te owhẹ obọ.