A ta nọ ahwo nọ a ti rri obọro nọ erẹwho akpọ na soso a bi kuomagbe fa na (onọ a se FIFA World Cup) a ti bu te ima-idu isoi, yọ a be fae evaọ Akpegbọvo 20 rite Akpegbivẹ 18, 2022. Ahwo buobu a rri rie nọ evaọ oghẹrẹ erozaha itieye na, orọnikọ ogbotu ahwo a bi kuomagbe rri ughe na ọvo ho, rekọ erozaha na e rẹ wha emamọ eware buobu ze.

•   “Erozaha wọhọ ebọro-efa gbe itieye na efa i wo ẹgba nọ i re ro nwene akpọ na. I wo ẹgba nọ e rẹ rọ wọ ahwo ru emamọ oware. I wo ẹgba nọ i re ro ru ahwo wo okugbe nọ oware ofa o sae wha ze he.”—Nelson Mandela, prẹsidẹnte South Africa vẹre.

•   “Ebọro-efa . . . e rẹ wha okugbe ze keme o rẹ lẹliẹ ahwo wo ẹruore ọvona, ghọghọ kugbe, i re ru nọ eware evona e rẹ rọ were ae, o rẹ lẹliẹ ai you ohwohwo, jẹ lẹliẹ ai ru eware kugbe dede nọ a no ọvuọ oria riẹ ze.”—Gianni Infantino, ọnọ o wuzou FIFA. a

 Kọ obọro nọ erẹwho akpọ na soso a bi kuomagbe fa na hayo erozaha itieye na efa e sai gine ru eware ilogbo itieye? Kọ e sae ginẹ wha udhedhẹ gbe okugbe ze?

 Obọro nọ erẹwho akpọ na soso a kuomagbe fa evaọ ukpe nana u ru nọ ahwo a jẹ rọ ta kpahe eware efa re. Ebọro-efa na e wha ikẹ-isio ze kpahe oghẹrẹ nọ ahwo a re yeri uzuazọ gbe isuẹsu. A bi si ikẹ kpahe eware wọhọ udu nọ ohwo kpobi o wo nọ o re ro ru oware nọ u je rie, ahwo nọ a re mukpahe amọfa fiki uyẹ hayo ovioma rai, gbe oghẹrẹ nọ ahwo jọ a bi ro fe yọ efa i bi yogbe.

 O make rrọ ere na, o rẹ were ahwo buobu oma re a rri erozaha akpọ-soso itieye na. Rekọ dede nọ ahwo a hae gwọlọ nọ erozaha itieye na e wha okugbe nọ o rẹ jọ lelehie ze, o be via ere he. Ukpoye, kọ uruemu omohẹriẹ oye ahwo a bi dhesẹ, gbe iruemu efa nọ Ebaibol ọ ta nọ ahwo a ti wo evaọ etoke nọ a jọ Ebaibol se “edẹ urere na.”—2 Timoti 3:1-5.

 Ebaibol na ọ ta nọ okugbe ọ te jọ akpọ na soso. Ọghẹnẹ ọ jọ Ebaibol na ya eyaa nọ ahwo-akpọ kpobi a ti wo okugbe evaọ otọ esuo egọmeti obọ odhiwu nọ a se “Uvie Ọghẹnẹ.”—Luk 4:43; Matiu 6:10.

 Jesu Kristi nọ ọ rrọ Ovie Uvie Ọghẹnẹ o ti ru nọ udhedhẹ o te rọ jọ akpọ na soso. Ebaibol na ọ ta nọ:

•   “Ikiẹrẹe na e te gbọ bọbọbọ, yọ udhedhẹ o te dafia.”—Olezi 72:7.

•   “O ti siwi oyogbe nọ o bi bo kẹ obufihọ na . . . O ti siwi ai no okienyẹ gbe ozighi.”—Olezi 72:12, 14.

 Makọ obọnana, iwuhrẹ Jesu i ru nọ ima ahwo buobu nọ e rrọ erẹwho egba ivẹ gbe ọgbagbizii (239) a ro wo okugbe. A si omukpahọ kpobi nọ a wo no udu rai no. Re whọ gbẹ riẹ kpahe onana, se izoẹme sa-sa nọ e rrọ otọ uzoẹme na “Epanọ Ma Sae rọ Whaha Omukpahọ.”