Ehrẹ nọ e mai woma nọ i re fiobọhọ kẹ ohwo yeri emamọ uzuazọ e rrọ Ebaibol na. Who te bi se Ebaibol na je roro didi kpahe iẹe kẹse kẹse, jẹ be daoma ru oware nọ who bi wuhrẹ noi ze, “eware e te riẹ nya kẹ owhẹ.” (Joshua 1:8; Olezi 1:1-3) Whọ te jẹ riẹ Ọghẹnẹ gbe Jesu, Ọmọ riẹ, yọ onana o sae lẹliẹ owhẹ wo esiwo.​—Jọn 17:3.

Oghẹrẹ vẹ u fo nọ who re ro se ebe nọ e rrọ Ebaibol na? U wo idhere sa-sa nọ whọ sai ro ru onana. Omaa isase Ebaibol nana u ti fiobọhọ kẹ owhẹ se ebe Ebaibol na oghẹrẹ nọ e rọ romavia othotha na, hayo salọ ebe sa-sa se. Wọhọ oriruo, whọ sae salọ eria ikere jọ se nọ e ta kpahe epanọ Ọghẹnẹ o ro yeri kugbe orẹwho Izrẹl oke anwae. Whọ sai se eria ikere efa re whọ riẹ epanọ ukoko Ileleikristi ikpe-udhusoi ọsosuọ na u ro muhọ je vihọ. Whọ tẹ be hai se izou Ebaibol nọ a kere kugbe na kẹdẹ kẹdẹ, whọ rẹ sai se Ebaibol na soso re evaọ ẹgbukpe.

O tẹ make rọnọ omaa nọ who re ro se Ebaibol na kẹdẹ kẹdẹ, hayo onọ who re ro sei re evaọ ẹgbukpe ọvo, hayo onọ who re ro muhọ ese whọ gwọlọ, omaa nana u ti fiobọhọ kẹ owhẹ. Iviena danlodu omaa Ebaibol nana nọ a rẹ sai printi na re who mu Ebaibol na họ ese nẹnẹ.