Ukoko nọ a re se United Nations o ta nọ:

•   No ẹdẹ avọ 7 Akpe rite ẹdẹ avọ 23 Akpe, 2023, ahwo nọ a bu vi idu ezeza gbe egba ene (6,400) a whu no fiki ẹmo nọ Gaza avọ Israel a bi fi na, yọ ahwo idu ikpegbisoi gbe egba ivẹ (15,200) a nwoma no. Ahwo nana buobu yọ ahwo gheghe. U te no ere no, ahwo idu udhusoi buobu a dhẹ no iwou rai no fiki ẹmo na.

•   Evaọ ẹdẹ avọ 24 Azie, 2023, ẹmo nọ ahwo Russia avọ Ukraine a bi fi na o wha uwhu se ahwo gheghe nọ a bu te idu izii gbe egba ihrẹ gbe ọvo no (9,701), yọ ahwo idu ikpegbihrẹ gbe egba ihrẹ gbe udhuvẹ-gberee (17,748) a nwoma no evaọ Ukraine.

 Ẹruore vẹ Ebaibol na ọ kẹ ahwo nọ a be ruẹ uye fiki ẹmo?

 Ebaibol na ọ ta nọ Ọghẹnẹ o ti “ru emo serihọ evaọ otọakpọ na soso.” (Olezi 46:9) Ọ te rehọ egọmeti hayo uvie obọ odhiwu riẹ nwene ẹta egọmeti ahwo-akpọ kpobi. (Daniẹl 2:44) Uvie Ọghẹnẹ u ti ku uye ahwo-akpọ kpobi họ.

 Muẹrohọ oware nọ Jesu Kristi nọ ọ rrọ Ovie Uvie Ọghẹnẹ o ti ru:

•   “O ti siwi oyogbe nọ o bi bo kẹ obufihọ na, te oruori na avọ ohwo kpobi nọ o wo ofiobọhọ họ. Ọ te re ohrọ oruori na gbe oyogbe na, yọ o ti siwi uzuazọ iyogbe na. O ti siwi ai no okienyẹ gbe ozighi.”—Olezi 72:12-14.

 Ọghẹnẹ ọ te rọ Uvie riẹ si ebẹbẹ gbe uye-oruẹ kpobi nọ ẹmo-ofio gbe ozighi e be wha ze notọ.

•   “O ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware anwae na e vrẹ no.”— Eviavia 21:4.

 Kẹle na, Uvie Ọghẹnẹ u ti ru eware kpobi woma evaọ otọakpọ na. Ebaibol na ọ ruẹaro fihotọ no vẹre inọ ma ti yo “edo emo gbe usi emo,” yọ ere o be ginẹ via nẹnẹ na. (Matiu 24:6) Eware nana gbe efa i dhesẹ nọ “edẹ urere” esuo ohwo-akpọ ma be rria na.—2 Timoti 3:1.