Ahwo buobu a re roro nọ oware nọ Ebaibol na ọ ta kpahe orọo gbe owezẹ ọzae-avọ-aye u gbe wo iruo enẹna ha. Yọ ere ahwo jọ nọ a se omarai Ileleikristi a bi roro re. Onana u ru nọ ahwo ichọche jọ a bi ro nwene oware nọ a bi wuhrẹ kpahe oware uwoma gbe uyoma. Kọ oware nọ Ebaibol na ọ ta kpahe oware uwoma gbe uyoma u gbe wo iruo enẹna? Ee. Joma ta kpahe epanọ ma rọ riẹ ere.

 Ọghẹnẹ ọ ma ahwo-akpọ re a rẹroso iẹe evaọ oware kpobi. Ebaibol na ọ ta nọ: “Ohwo-akpọ nọ ọ be nya onya o wo ogaga nọ ọ rẹ rọ tubẹ kpọ ithihi riẹ dede he.” (Jerimaya 10:23) Dede nọ Jihova a ọ ma omai evaọ oghẹrẹ nọ ma sae rọ jiroro kẹ omamai, ọ kẹ omai udu nọ ma rẹ rọ salọ oware uwoma gbe uyoma kẹ omamai hi. Ọ gwọlọ nọ ma rẹ rẹroso iẹe.​—Itẹ 3:5.

 Ma rẹ jọ Ebaibol na ruẹ izi Ọghẹnẹ kpahe oware uwoma gbe uyoma. Joma ta kpahe ẹjiroro ivẹ jọ nọ izi nana i ro wuzou gaga.

•   Ọghẹnẹ họ ọnọ ọ ma omai. (Olezi 100:3) Fikinọ Jihova họ ọnọ ọ ma omai, ọ riẹ eware nọ e rẹ sae lẹliẹ omai wereva, ru udu te omai otọ, je ru nọ ma re ro wo omokpokpọ. Ọ tẹ jẹ riẹ oware nọ o rẹ sae via kẹ omai nọ ma gbe koko izi riẹ hẹ. (Ahwo Galesha 6:7) Ofariẹ, Jihova ọ gwọlọ nọ ma re yeri emamọ uzuazọ. Fikiere Ebaibol na ọ ta nọ Ọghẹnẹ họ “Ọnọ o bi wuhrẹ owhẹ re who wo erere kẹ omara, Ọnọ o bi su owhẹ evaọ edhere nọ u fo nọ whọ rẹ nya.”​—Aizaya 48:17.

•   Isiuru mai e sai su omai thọ. Ahwo buobu a re roro nọ ae ọvo a sae salọ oware nọ u woma gbe onọ u yoma kẹ omai rai nọ a te bi ru oware kpobi nọ udu rai o vuẹ rai. Rekọ Ebaibol na ọ ta nọ “udu na u wo ẹghẹ vi oware ofa kpobi, yọ u re bru okpakpa.” (Jerimaya 17:9) Nọ ma te fievahọ omobọ mai orọnikọ Ọghẹnẹ hẹ, udu mai o sae viẹ omai họ ru oware nọ ma te vioja riẹ ẹdẹfa.​—Itẹ 28:26; Ọtausiuwoma Na 10:2.

 Ijo! Ma rẹ jọ Ebaibol na wuhrẹ uzẹme na kpahe Ọghẹnẹ gbe oghẹrẹ nọ ọ gwọlọ nọ ma re yeri uzuazọ mai. (1 Ahwo Kọrint 6:9-11; Ahwo Galesha 5:19-23) Yọ Ọghẹnẹ ọ gwọlọ nọ ahwo kpobi a rẹ riẹ uzẹme nana. (1 Timoti 2:3, 4) Fikiere o gbahọ nọ Oleleikristi kpobi o re wuhrẹ ahwo oware nọ Ebaibol na ọ ta.​—Taitọs 1:7-9.

 Ahwo buobu nọ a gwọlọ gaviezọ kẹ oware nọ Ebaibol na ọ ta kpahe oware uwoma gbe uyoma ha, a rẹ nyabru iwuhrẹ egagọ nọ i re “wuhrẹ ae eware nọ a gwọlọ yo.” (2 Timoti 4:3, ẹme-oruvẹ) Rekọ Ebaibol na ọ ta nọ: “Uye u te enọ e rẹ ta nọ ewoma yọ eyoma jẹ ta nọ eyoma yọ ewoma.” (Aizaya 5:20) O rrọ vevẹ inọ Ọghẹnẹ ọ te rọ uye te isu egagọ kpobi nọ e be rọwo wuhrẹ ahwo oware nọ Ọghẹnẹ ọ ta kpahe oware uwoma gbe uyoma ha.

 Ijo. Ahwo nọ a gwọlọ ru oware nọ o rẹ were Ọghẹnẹ a rẹ raro kele oriruo Jesu Kristi je ru oware nọ o wuhrẹ. O wuhrẹ ilele riẹ nọ a gu ohwo ọvo ẹdhọ họ, ukpoye a hai dhesẹ uyoyou gbe adhẹẹ kẹ ohwohwo.​—Matiu 5:43, 44; 7:1.

 Jesu o wuhrẹ nọ ohwo kpobi nọ ọ gwọlọ jọ olele riẹ o re koko izi Ọghẹnẹ evaọ uzuazọ riẹ. Rekọ ọ vuẹ rai vevẹ nọ orọnikọ ahwo kpobi a te rọwo koko izi Ọghẹnẹ hẹ. (Matiu 10:14) Yọ Jesu o wuhrẹ ilele riẹ vievie he re a rọ ogaga hayo oghẹrẹ ọfa jọ rọ gba ahwo họ koko izi Ọghẹnẹ.​—Jọn 17:14, 16; 18:36.

 Ahwo nọ a be daoma koko izi Ọghẹnẹ kpahe oware uwoma gbe uyoma, a re wo irere buobu enẹna gbe evaọ obaro. (Olezi 19:8, 11) Irere nana jọ họ:

•   A re wo oghọghọ.​—Itẹ 29:6.

•   A re wo usu okpekpe kugbe Ọghẹnẹ.​—Itẹ 3:32.

•   Ọghẹnẹ o re fiobọhọ kẹ ae evaọ etoke ebẹbẹ.​—Itẹ 11:8.

•   A te rria otọakpọ na bẹdẹ bẹdẹ evaọ obaro.​—Olezi 37:29.