Uye o be bẹ ahwo buobu evaọ eria sa-sa akpọ na fiki owhe nọ o bi ku raha eware. Rri iyẹrẹ nana:

•   “Okposo ọgaga nọ ọ be rrọ evaọ okpẹwho-esuo China u ru nọ ame o ro ku oria kpobi, yọ oghẹrẹ oso otiọye ọ re rrọ họ evaọ oware ikpe udhuhrẹ (140) nọ e vrẹ na. Oso nọ ọ rrọ no Ẹdẹ-Ọmaha rite Edesa-Oka ọ lẹliẹ ame nọ o te obọ ekpekpawọ ku oria kpobi.”—AP News, Aria 2, 2023.

•   “Edene-Oka o jọ ẹdẹ avọ ivẹ nọ ofou-owhre nọ a se Khanun nọ o fo ọ rọ lẹliẹ ikpisoi avọ ifou egaga fou evaọ ofẹ obọze ovatha-ọre Japan, yọ imava a whu fiki onana. . . . Ahwo a bi rẹro nọ oso na ọ te lẹliẹ ame nọ o bu vrẹ ighilawọ ku ikpewho nọ e rrọ udevie Taiwan nọ igbehru e vọ.”—Deutsche Welle, Aria 3, 2023.

•   “Ikpisoi nọ e rrọ evaọ abọ Canada nọ ọ rrọ ofẹ abade Atlantic na o lẹliẹ owhe ku [Nova Scotia], yọ oghẹrẹ isoi itieye e re rrọ họ anwọ ikpe udhuvẹ-gbikpe nọ e vrẹ na.”—BBC News, Ahrẹ 24, 2023.

 Eme Ebaibol na ọ ta kpahe eware itieye na?

 Ebaibol na o dhesẹ nọ ma be rria etoke nọ a se “edẹ urere na.” (2 Timoti 3:1) Jesu ọ ruẹaro nọ evaọ oke mai nana, ma te ruẹ “eware idudu,” hayo eware imuozọ. (Luk 21:11) Eware nọ i bi nwene evaọ ehru na e be lẹliẹ iso rrọ gaga, makọ evaọ okenọ a rẹro rai hi, yọ e be rrọ kpekpe vi epaọ anwẹdẹ.

 Ma jọ Ebaibol na ruẹ inọ eware imuozọ nọ e be via gaga evaọ otọakpọ na nẹnẹ i dhesẹ nọ okenọ eware i ti ro woma o kẹle no. Fikieme? Jesu ọ ta nọ: “Nọ wha tẹ ruẹ eware nana nọ e be via, wha riẹ nọ Uvie Ọghẹnẹ o kẹle no.”—Luk 21:31; Matiu 24:3

 Eware nọ e be via nọ ma be ruẹ nẹnẹ na i dhesẹ nọ kẹle na, Uvie Ọghẹnẹ o te wariẹ ruẹrẹ eware kpobi nọ Ọghẹnẹ ọ ma na họ ziezi, te oghẹrẹ nọ ma be hai ro wo ame evaọ otọakpọ na.—Job 36:27, 28; Olezi 107:29.

 Re who gbe se kpahe oghẹrẹ nọ Uvie Ọghẹnẹ o te rọ wariẹ ruẹrẹ otọakpọ na fihọ epanọ o jọ vẹre, se uzoẹme na, “Ono O ti Siwi Otọakpọ Na?”