HAI ROU!
Ahwo A bi Ru Ozighi Fiki Isuẹsu—Eme Ebaibol na Ọ Ta?
Ahwo a bi ru ozighi gaga fiki isuẹsu yọ onana o be lẹliẹ ahwo ruawa.
Evaọ Mexico, a kpe ahwo ọgbagbizii soso nọ a gwọlọ ruọ esuo, yọ ahwo a bi ru ozighi fiki eware ivotu efa. Oware nana o kẹ ahwo buobu uye, fikiere iroro rai e gbẹ rrọ ivotu nọ a gwọlọ ru evaọ etoke 2023-2024 na ha.
Kẹle na evaọ Europe, ahwo a ru ekpehre eware gaga fiki ivotu. Ọjọ họ oware nọ o via kẹ osu egọmeti jọ nọ ọ rrọ ọkwa prime minister evaọ Slovakia. Evaọ edẹ 15 Asoi, 2024, ohwo jọ ọ jẹ te sae kpe no.
Oware nọ o via evaọ United States kẹle na u gbe ahwo buobu unu gaga. Evaọ edẹ 13 Ahrẹ, 2024, ohwo jọ ọ jẹ te gwọlọ sa Donald Trump nọ ọ jọ prẹsidẹnte America vẹre kpe no.
Fikieme ozighi ọ rọ da oria kpobi fia fiki isuẹsu? Kọ o ti kuhọ ẹdẹ jọ? Eme Ebaibol na ọ ta?
A jọ Ebaibol na ruẹaro kpahe ohẹriẹ nọ isuẹsu e te wha ze
A jọ Ebaibol na ruẹaro nọ evaọ oke mai na, nọ a se “edẹ urere na,” ahwo buobu a ti wo ekpehre uruemu, a ti ru ozighi yọ a te rọwokugbe ohwohwo ho.
“Evaọ edẹ urere na, oke obẹbẹ nọ o rẹ bẹ ẹria o te jọ. Keme ahwo a [te] . . . kare uyere-ọghọ, a ti ru ẹme rai gba ha, . . . a te rọwo ru ọtamuo ho, . . . a ti mu ofu-ọkpoo, . . . a ti vivie ahwo, veghe uzou, fu uke avọ omorro.”—2 Timoti 3:1-4.
A tẹ jẹ jọ Ebaibol na ruẹaro nọ evaọ oke mai na, ahwo a te kpareso egọmeti je ru ozighi gaga. (Luk 21:9, ẹme-obotọ) Rekọ ozighi gbe ohẹriẹ nọ e rrọ akpọ na fiki isuẹsu e te jọ bẹdẹ bẹdẹ hẹ.
Ozighi nọ ahwo a bi ru fiki isuẹsu o ti kuhọ
Ebaibol na ọ ta nọ Ọghẹnẹ o ti si egọmeti ahwo-akpọ no, ọ vẹ te rehọ egọmeti obọ odhiwu riẹ su otọakpọ na soso.
“Ọghẹnẹ obọ odhiwu ọ te rehọ uvie jọ mu. . . . O te guọghọ jẹ rehọ ivie [efa] nana kpobi te oba, oye ọvo u ve ti dikihẹ bẹdẹ bẹdẹ.”—Daniẹl 2:44.
Uvie Ọghẹnẹ o te wha okugbe gbe udhedhẹ ziọ akpọ na soso.
A se Jesu nọ ọ rrọ osu Uvie na “Osu Udhedhẹ,” yọ evaọ oke nọ o ti su otọakpọ na soso, “udhedhẹ u ti wo oba ha.”—Aizaya 9:6, 7.
Makọ enẹna, ahwo nọ Uvie na u bi su a bi wuhrẹ epanọ a sae rọ rria dhedhẹ kugbe ohwohwo. Ebaibol na ọ ta kpahe ae nọ: “A ti duwu egbọdọ rai zihe ruọ etẹkpẹ a ve ti duwu izuẹ rai zihe ruọ ibrẹbe. Orẹwho o gbẹ te kpare ọgbọdọ rọsuọ orẹwho ho, yọ a ti gbe wuhrẹ ẹmo-ofio ofa ha.”—Aizaya 2:3, 4.
Re whọ gbẹ riẹ kpahe eware efa, se uzoẹme na “Eme Uvie Ọghẹnẹ U ti Ru?” je rri ividio na Eme Họ Uvie Ọghẹnẹ?