Eware e rẹ jọ gaga nọ a te si ohwo no iruo. Re ohwo ọ sae rẹrote uviuwou riẹ o rẹ bẹ. O sai tubẹ lẹliẹ ohwo roro iroro. Joma ta kpahe ehrẹ Ebaibol jọ nọ e rẹ sai fiobọhọ nọ oware utioye na o tẹ via kẹ owhẹ.

•   Vuẹ amọfa epanọ eware e rrọ kẹ owhẹ.

   Oware nọ Ebaibol na ọ ta: “Emamọ ogbẹnyusu o re dhesẹ uyoyou ẹsikpobi.”—Itẹ 17:17.

   Uzẹme riẹ họ, nọ a te si ohwo no iruo, eva e rẹ were ohwo ho. Ẹsibuobu, whọ sai roro nọ ora u re no, yọ uzuazọ ra u fioka ha. Rekọ whọ tẹ vuẹ imoni ra gbe egbẹnyusu ra, a sai fiobọhọ kẹ owhẹ nọ who gbe ro roro ga hrọ họ. A sai tube fiobọhọ kẹ owhẹ gwọlọ iruo efa.

•   Whọ ruawa ga hrọ họ.

   Oware nọ Ebaibol na ọ ta: “Wha ruawa odẹnotha vievie he, keme odẹnotha o ti wo ẹkẹ ebẹbẹ riẹ.”—Matiu 6:34.

   Ebaibol o vuẹ omai nọ u wuzou gaga re ma ma omaa kpahotọ kẹ odẹnotha. (Itẹ 21:5) Rekọ u fo re ma kareghẹhọ re inọ Ebaibol na o ta nọ, ma du ruawa ga hrọ họ kpahe epanọ eware e te jọ evaọ obaro. Ẹsejọ, eware nọ ma rẹ ruawa rai na, e rẹ tubẹ via dede he. Fikiere, u ti woma re ma ru onọ ma rẹ sai ru evaọ okpẹdoke jẹ siọ awa odẹnotha ba ẹruọ.

   Ehrẹ efa sa-sa e rrọ Ebaibol na nọ e rẹ sai fiobọhọ kẹ omai nọ ma tẹ be ruawa. Whọ sai rri uzoẹme na “How to Deal With Stress.”

•   Hae dẹ eware nọ whọ ginẹ gwọlọ.

   Oware nọ Ebaibol na ọ ta: “Mẹ riẹ epanọ me re ro yeri nọ me te wo . . . buobu hayo [me gbe] wo ho.”—Ahwo Filipai 4:12.

   Who mu eware dẹ hẹ. Epanọ ẹkpa ra o rrọ who re rri rọ dẹ eware. Daoma re whọ siọ esa ba ẹre.—Itẹ 22:7.

   Whọ tẹ gbẹ gwọlọ riẹ kpahe oware nọ u re fiobọhọ kẹ owhẹ re who gbe mu eware dẹ hẹ, rri uzoẹme na, “Epanọ Whọ Sae rọ Maneji Ugho.”

•   Hae rọ oke ra ru eware nọ i re fiobọhọ kẹ owhẹ.

   Oware nọ Ebaibol na ọ ta: “Wha hae rọ areghẹ yerikugbe ahwo, . . . wha hae rehọ oke rai ruiruo ziezi.”—Ahwo Kọlọsi 4:5.

   O make rrọ nọ who gbe wo iruo nọ whọ be nya ha na, ma omaa eware nọ whọ rẹ hai ru kẹdẹ kẹdẹ re whọ gbẹ raha oke ra kufiẹ hẹ. Who te ru ere, who ti koko oma họ. Who gbe ti rri omara nọ who fioka ha ha.

•   Daoma ru oghẹrẹ iruo efa.

   Oware nọ Ebaibol na ọ ta: “Erere o re no oghẹrẹ iruo egaga kpobi ze.”—Itẹ 14:23.

   Daoma ru oghẹrẹ iruo efa, o tẹ make rọnọ iruo itieye na who je ru vẹre he hayo ugho nọ u ti noi ze u te onọ who je wo vẹre he. O tẹ make rọnọ iruo nọ ahwo a re rri vo, eye whọ ruẹ, daoma ru ai.

•   Hae gbẹ gwọlọ iruo efa, jọ o bẹ owhẹ hẹ.

   Oware nọ Ebaibol na ọ ta: “Kọ ibi ra evaọ ohiohiẹ yọ whọ jọ obọ ra u serihọ họ rite owọwọ; keme whọ riẹ onọ u ti woma ha.”—Ọtausiuwoma Na 11:6.

   Gbẹ hae gwọlọ iruo efa. Hae vuẹ amọfa inọ whọ be gwọlọ iruo, te imoni ra, ahwo nọ wha gbe je ru iruo vẹre, ahwo nọ wha gbẹ rrọ ighẹ hayo amọfa kpobi nọ whọ riẹ. Jọ itanẹte gwọlọ ekọmpene nọ e ginẹ gwọlọ rehọ ahwo iruo. Yọ ekọmpene i te bi se ahwo nọ a rẹ kiẹriwi sọ a te kẹ iruo, hae daoma nya. O tẹ make rọnọ whọ rẹ hai dhe ekọmpene sa-sa ẹnyẹnya je kere ebe buobu, daoma hai ru ere, jọ o bẹ owhẹ hẹ.