Evaọ ikpe ọgba nọ e vrẹ na, ahwo buobu a roro nọ erẹwho akpọ na a bi lele ohwohwo rria dhedhẹ yọ eware i bi woma ze. Rekọ eware nọ e be via kẹle na e be lẹliẹ ahwo nwene iroro.

•   “Ahwo a be ruawa nọ ẹmo Gaza na o ti te erẹwho efa nọ e rrọ oyena keme ahwo Israel avọ Hezbollah a be họre evaọ uwhru orẹwho Lebanon.”—Reuters, January 6, 2024.

•   “Itu sa-sa nọ e rrọ otọ orẹwho Iran a be họre ahwo evaọ eria buobu, yọ ahwo Iran a wariẹ mu ebọmbo nọ e rẹ raha orẹwho soso muotọ họ eku no. Ahwo Russia avọ ahwo China a rrọ abọ Iran. Eware nana kpobi e be lẹliẹ erẹwho nọ e rrọ ofẹ ukiediwo-ọre akpọ na ruẹrẹ oma kpahe kẹ ẹmo.”—The New York Times, January 7, 2024.

•   “Ahwo Russia a gbe bi gbolo ebọmbo fihọ Ukraine. Ahwo a bi whu yọ eware buobu e be raha.”—UN News, January 11, 2024.

•   “Eware i bi woma evaọ China yọ a bi ku eware ẹmo gaga. Ahwo Taiwan a be rọ orẹwho rai seha yọ usu US avọ China u bi yoma ga. Eware nana kpobi e sai ru nọ ẹmo o re ro du lawhe lọlọhọ.”—The Japan Times, January 9, 2024.

 Kọ Ebaibol na ọ ta oware jọ kpahe ẹvohẹ nọ ọ rrọ udevie erẹwho akpọ na nẹnẹ na? Kọ eware nana e te whae ze nọ a ti ro fi ẹmo akpọ soso?

 Ebaibol na ọ nwane fodẹ uzedhe ẹmo jọ dẹe nọ a bi fi nẹnẹ na ha. Rekọ Ebaibol na ọ ta nọ a ti fi ẹmo gaga evaọ akpọ na, yọ onana u ti “si udhedhẹ no otọakpọ na.”—Eviavia 6:4.

 Ebaibol na ọ ta evaọ obe Daniẹl nọ “evaọ oke urere na,” isu akpọ na a ti lele ohwohwo “muabọ,” koyehọ a ti hrowo oma ohwo nọ o re su akpọ na. Eware jọ nọ a ti ro hrowo oma họ, a ti ku ekwakwa ẹmo ilogbo jẹ raha ugho gaga hayo “ekwakwa-aghae.”—Daniẹl 11:40, 42, 43.

 Ebaibol na o dhesẹ nọ eware i ti yoma gaga evaọ akpọ na taure eware i te ti woma. Jesu ọ ta nọ “uye ulogbo o te jọ, utionọ o re via no emuhọ akpọ na ze he.” (Matiu 24:21) “Uye ulogbo” na u ti kuhọ evaọ ẹmo Amagidọn, nọ a dhesẹ nọ o te jọ “ẹmo ẹdẹ ologbo Ọghẹnẹ Erumeru na.”—Eviavia 16:14, 16.

 Ọghẹnẹ ọ te rọ ẹmo Amagidọn siwi ahwo-akpọ orọnikọ ọ te rehọ iẹe raha ahwo-akpọ no ho. Ọghẹnẹ ọ te rọ ẹmo Amagidọn raha egọmeti ahwo-akpọ no keme egọmeti nana a bi fi emo nọ e be wha ọraha ziọ akpọ na. Re whọ riẹ epanọ Amagidọn ọ te rọ wha udhedhẹ ziọ akpọ na, se izoẹme nana:

•   “Eme Họ Ẹmo Amagidọn?”

•   “Amagidọn Yọ Oware Evawere!”