Okokohọ ologbo ukpe 2020 o jọ orọ oghẹrẹsa, ọye họ okokohọ ọsosuọ nọ ma rekọdo nọ ma ru evaọ akpọ-soso je fihọ itanẹte! Rekọ evaọ Malawi gbe Mozambique, inievo mai buobu a sai rri okokohọ na ababọ Itanẹte nọ a rueva. Ẹvẹ onana o sae rọ lọhọ?

 Ogbẹgwae Otu Ẹruọsa gbe Ogbẹgwae Ewuhrẹ erọ Utu Ẹruorote na a kẹ udu inọ a kporo okokohọ na evaọ etẹlẹvisiọno gbe iredio evaọ orẹwho Malawi avọ Mozambique. Fikieme a ro ru ere kẹ erẹwho ivẹ nana? Re ohwo ọ ruọ eva Itanẹte evaọ Malawi, okolo ugho o rẹ rehọ mi ei hi. Unuigho nọ a re mi fihọ Itanẹte evaọ Malawi o mai bu evaọ akpọ na soso, fikiere umutho Isẹri Jihova jọ ọvo a rẹ sae ruọ Itanẹte. Brọda William Chumbi nọ ọ rrọ omọvo Ogbẹgwae Uwou Ogha Malawi ọ ta nọ: “Iredio gbe etẹlẹvisiọno ọvo họ edhere nọ a sai ro ru re inievo na a gaviezọ kẹ eme okokohọ na.” Brọda Luka Sibeko nọ ọ rrọ omọvo Ogbẹgwae Uwou Ogha Malawi re ọ tẹ jẹ ta nọ: “Ogbẹrọnọ a kporo okokohọ na evaọ etẹlẹvisiọno gbe iredio ho, umutho inievo jọ ọvo a hai ti wo erere noi ze evaọ ẹkwotọ uwou ogha mai na.” Evaọ Mozambique re, umutho inievo jọ ọvo a hae te sae dẹ ifonu hayo etablẹte nọ a re ro rri okokohọ na, kabikọ Itanẹte nọ a rẹ rueva.

 Fiki okpẹyao COVID-19 na, a jẹ jọ isteshọno etẹlẹvisiono gbe iredio jọ kporo iwuhrẹ ukoko mai no vẹre. a Inievo mai a tẹ vuẹ ahwo nọ a wo isteshọno etẹlẹvisiọno gbe iredio yena inọ jọ a fiba oke nọ a kẹ rai vẹre re a sai kporo okokohọ na.

 Rekọ inievo mai evaọ Malawi, a rẹriẹ ovao dhe ẹbẹbẹ jọ. Auwa ọvo a rẹ kẹ ohwo ba nọ a re ro kporo oware kẹe evaọ iredio hayo etẹlẹvisiọno. Ahwo iredio gbe etẹlẹvisiọno na a rẹ ruawa nọ a te kporo oware ovona kri vrẹ auwa ọvo, ahwo a te gbẹ gwọlọ gaviezọ họ. Rekọ inievo mai a tẹ vuẹ ae nọ iruo mai yọ iruo nọ i bi fiobọhọ kẹ ahwo orẹwho na. Nọ ma makọ rrọ okenọ egọmeti ọ rọ ta nọ ahwo a jọ uwou fiki okpẹyao na, ma gbẹ be rehọ idhere efa vuẹ ahwo kpobi emamọ usi nọ o rẹ kẹ omosasọ nọ o rrọ Ebaibol na, onọ o rẹ sai fiobọhọ kẹ ai jọ emamọ ahwo evaọ orẹwho na je ru ai wo evawere evaọ uviuwou rai. Nọ ahwo iredio gbe etẹlẹvisiọno na a yo ẹme nana, a tẹ rọwo kẹ inievo na je fiba oke rai.

 Evaọ Malawi, isteshọno etẹlẹvisiọno gbe iredio steshọno ọvo a jọ kporo okokohọ na yọ o te orẹwho na soso, fikiere ima ahwo buobu a rẹ sae gaviezọ kẹe. Evaọ Mozambique, isteshọno etẹlẹvisiọno ọvo a jọ kporo iei, a te kporo iei evaọ iredio steshọno 85.

 Evaọ erẹwho ivẹ na, ukoko o raha edọla 28,227 b fihọ okokohọ na nọ a kporo evaọ etẹlẹvisiọno, a tẹ raha enwenọ edọla 20,000 fihọ enọ a kporo evaọ iredio. Unuigho iredio steshọno ọsese o te edọla 15, yọ unuigho iredio steshọno nọ a rẹ gaviezọ kẹ evaọ orẹwho na soso o te edọla 2,777.

 Inievo mai a daoma gaga re a gbẹ raha igho nọ ma ro ru unevaze kufiẹ hẹ. Wọhọ oriruo evaọ Malawi, a tho unuigho na kpotọ, fikiere ahwo na a sai si enwenọ abọvo no kẹ ae nọ a tẹ ghale iẹe kpohọ abasa. Onana u ru nọ a ro wo unuigho nọ u te edọla 1,711 zihe. Evaọ Mozambique, isteshọno jọ e rọwo nọ a re si unuigho rai kpotọ fiki uruemu oruọzewọ mai, gbe fikinọ ma rẹ kake hwosa.

 Eva e were inievo mai gaga inọ a sae gaviezọ kẹ okokohọ na evaọ etẹlẹvisiọno gbe iredio. Ọkpako ukoko jọ evaọ Malawi nọ a re se Patrick ọ ta nọ: “Ma bi yere inievo nọ e rrọ Utu Ẹruorote na gaga rọkẹ eware kpobi nọ a ru kẹ omai no evaọ oke okpẹyao nọ ọ rrọ otọ na.” Oniọvo ọfa evaọ Malawi nọ a re se Isaac ọ ta nọ: “Ma wo ifonu, etablẹte hayo ekọmputa ha, fikiere ma yere ukoko Jihova gaga nọ a rọ kẹ omai obọdẹ uvẹ nọ ma rọ gaviezọ kẹ okokohọ na evaọ iredio. Onana u ru nọ uviuwou mẹ soso u ro wo erere no okokohọ na ze. Onana u dhesẹ kẹ omai vevẹ nọ Jihova o gine you ahwo riẹ.”

 Okokohọ ubrotọ 2020 na họ okokohọ ọsosuọ nọ owhowho-uvie jọ evaọ Mozambique o rri. Ọ ta nọ: “Okokohọ na nọ me rri evaọ etẹlẹvisiọno na o kareghẹhọ omẹ nọ Jihova họ Ọghẹnẹ erumeru na. Okpẹyao nọ ọ rrọ otọ na ọ sae whaha iẹe eme riẹ nọ o bi wuhrẹ omai hi, yọ o tube ru nọ me ro woi evaọ uwou obọmẹ dede. Mẹ ruẹ uyoyou nọ o rrọ udevie ahwo Jihova vevẹ. U mu omẹ ẹro ziezi nọ egagọ uzẹme na ena.”

 Ọkpako ukoko jọ nọ a re se Wyson ọ ta nọ: “Mẹ gwọlọ yere ọrigbo nọ a re fievahọ na gaga rọkẹ oghẹrẹ nọ ọ be rẹrote omai evaọ etoke okpẹyao nana. Okokohọ na nọ a kporo evaọ iredio gbe etẹlẹvisiọno na u fiobọhọ kẹ omai ibuobu nọ e be rọ akọ kpena evaọ abọ nana akpọ na nọ ugho o rrọ tere he na nọ ma sae rọ gaviezọ kẹ okokohọ na je wo erere noi ze.”

 Ogbẹgwae Otu Ẹruọsa gbe Ogbẹgwae Ewuhrẹ a wariẹ ru ọruẹrẹfihotọ nọ a ro kporo okokohọ ubrotọ 2021 na evaọ etẹlẹvisiọno gbe iredio evaọ emewho jọ nọ a salọ. Ẹvẹ ma be sai ro wo ugho kporo okokohọ na enẹ? Igho nọ a bi ro ru unevaze rọkẹ iruo akpọ soso na ma be sai ro ru onana, yọ idhere sa-sa nọ e rrọ donate.pr418.com a bi ro ru unevaze nana buobu. Ma yere owhai gaga rọkẹ okẹ unevaze nọ wha be kẹ.