Uwou-Eroro Azeza 1, 1912, orọ Oyibo o ta nọ: “U muẹro nọ ahwo buobu nọ i bi se ebe mai a riẹ ahwo jọ nọ i tuaro. . . . Ahwo otiọye na a sae ta re a vi ebe ọvọvẹ se ai nọ a re se. . . . Ma printi ebe nana nọ ma ru kẹ ahwo nọ i tuaro na evaọ oghẹrẹ nọ a rẹ rọ rehọ obọ rara ae se.” Uwou-Eroro na o ta re inọ: “Nọ ahwo buobu nọ i tuaro a yo nọ eghale buobu i ti te ahwo-akpọ kẹle na, eva e were rai gaga.”

 Oke nọ a kere eme yena yọ ahwo ẹvẹrẹ Oyibo a ri wo oghẹrẹ ọvo jọ kru dh’obọ nọ a sai ro kere eware kẹ ahwo nọ i tuaro ho, onọ a bi se braille na. Rekọ evaọ oke yena yọ Isẹri Jihova a mu ebe braille họ ekere no re ahwo nọ i tuaro a sai se eware nọ e rrọ Ebaibol. Yọ ma gbe bi kere ebe braille rite inẹnẹ. Obọnana, ma wo ebe braille evaọ evẹrẹ nọ i bu vi udhuvẹ-gbikpe. Ẹvẹ ma be sai ro ru ebe nana?

 Re a sai ru obe braille, oware ọsosuọ nọ ma re ru họ, ma re nwene ibieme na fihọ erọ braille. Oniọvo nọ a re se Michael Millen nọ o bi ru iruo evaọ oria nọ a re jo ru ebe braille evaọ Patterson, obọ New York ọ ta nọ: “Vẹre vẹre, ma tẹ gwọlọ nwene ibieme fihọ erọ braille, oware jọ nọ ekọmpene jọ o ru fihọ ekọmputa nọ ma rẹ hwa ugho fihọ ma re ro ru ei. Rekọ orọnọ evẹrẹ kpobi nọ ma gwọlọ eye ma jẹ hae sae rehọ oyena ru hu. Enẹna, iprogramo ekọmputa nọ a re se Watchtower Translation System nọ ukoko na ọvo u ru oye ma bi ro nwene ibieme na kpohọ erọ braille, yọ enwenọ evẹrẹ nọ e rrọ akpọ na kpobi ma rẹ sae rehọ iẹe nwene ibieme rai kpohọ braille. U mu omẹ ẹro nọ whọ rẹ sae jọ oria ofa ruẹ oware utioye he evaọ akpọ na.”

 Nọ a te bi ru obe braille, orọnikọ eme obe na ọvo a re ru fihọ erọ braille hi, a re je dhesẹ iwoho nọ e rrọ obe na. Wọhọ oriruo, enẹ a dhesẹ uwoho nọ o rrọ uke obe Reawere Uzuazọ Bẹdẹ Bẹdẹ! na: “Ọzae nọ o mu onya họ obọ evaọ edhere nọ ọ rrọ gẹle gẹle, yọ idodo iwowoma, ikpehru, gbe igbehru e rrọ oyena soso.” Oniọvo jọ nọ o tuaro nọ a re se Jamshed nọ ọ rrọ odibo oruiruo ọ tẹ jẹ rrọ ọkobaro ọ ta nọ, “Iwoho nọ a re dhesẹ na e were omẹ wo umuo ho.”

 Nọ a te nwene ibieme na kpohọ erọ braille no, a vẹ rọ ekọmputa vi ebe na kpohọ iwou ogha nọ i re ru ebe braille. U te te uwou ogha utioye, a ve ru eme na fihọ ewẹ-obe evaọ oghẹrẹ nọ ohwo nọ o tuaro ọ sae rọ rehọ obọ rara ae se. Obe nọ a re ru ei fihọ na o rẹ ga ziezi re ighogho e siọ iẹe ba ẹro nọ a ti ru ei na, o vẹ jẹ jọ oghẹrẹ obe nọ o rẹ kake lọhọ họ nọ a tẹ maki rovie ei unuẹse buobu. Nọ a te ru ei fihọ ewẹ-obe no, a ve koko ai họ, whẹ ai kugbe, jẹ rọ imoto fa ai se ahwo evaọ oke nọ a te fa ebe se ikoko sa-sa. Otẹrọnọ a rẹ jọ oria na vi ebe se ahwo nọ a be ruẹ ude he ọvọvẹ, a vẹ rọ ipost ọfisi vi ebe na. Otẹrọnọ oke nọ inievo nana a te rọ rehọ ebe na ru ewuhrẹ o kẹle gaga no, ukoko o rẹ gwọlọ oghẹrẹ kpobi nọ o mae vẹrẹ nọ a rẹ rọ fa ebe na se inievo na, re e sai te ai obọ evaọ ẹruoke.

 Re a sai ru ebe nana je vi ai, okolo ugho gbe oke o rẹ rehọ họ. Uzẹme riẹ họ, evaọ oria nọ ma bi jo printi ebe evaọ Wallkill, obọ New York, oke nọ a re ro ru Ebaibol gheghe nọ i bu te idu udhuvẹ-gbikpe (50,000) soso, oke utioye ovona a re ro ru Ebaibol braille ivẹ ọvo. Ebaibol braille (grade-two English) ọvuọvo o re wo ikulu-ebe udhegbisoi soso. Yọ ugho nọ a rẹ rọ dẹ eware nọ a re ro ru ikulu-ebe udhegbisoi nana e rehọ ẹko udhozeza-gbesa (123) bu vi ugho nọ a rẹ rọ dẹ enọ a re ro ru Ebaibol gheghe ọvo. a Ugho nọ a rẹ rọ dẹ eware nọ a re ro ru uke Ebaibol braille ọvo (koyehọ ikulu-ebe udhegbisoi na), u bu te enwenọ edọla 150 soso.

 Ẹvẹ inievo nọ i bi ru ebe braille na a rri iruo rai? Nadia nọ o bi ru iruo evaọ uwou ogha nọ o rrọ South Africa ọ ta nọ: “Eware e lọhọ kẹ inievo mai nọ i tuaro na vievie he gbe enọ e be ruẹ ude tere he. Fikiere, me rri rie nọ oghale ulogbo o rrọ kẹ omẹ re me ru oware jọ nọ u re fiobọhọ kẹ ae. O rrọ vevẹ nọ Jihova o you rai gaga.”

 Kọ otẹrọnọ ohwo nọ o tuaro ọ sai se braille hi, eme o re ru? Imikpe jọ nọ e vrẹ, ma siobọno omobe jọ nọ uzoẹme riẹ o rrọ Wuhrẹ Epanọ A re se Obe Braille (orọ Oyibo). A kere eme braille gbe erọ Oyibo fihọ obe na. A ru rie evaọ oghẹrẹ nọ ohwo nọ ọ be ruẹ ude ọ rẹ rọ rehọ iẹe wuhrẹ ohwo nọ o tuaro. A ru oware jọ lele obe na nọ a rẹ sai kere braille fihọ. Ohwo nọ o bi wuhrẹ braille na ọvo ọ rẹ rọ obọ riẹ kere ibieme braille na ọvuọvo fihọ oware nọ u lele obe na ze na. Onana u re ru nọ ohwo nọ o tuaro na ọ rẹ rọ riẹ ibieme na ziezi, o ve je vuhu ai nọ ọ tẹ be rọ obọ rara obe braille se.

 Kọ ebe braille na e be were inievo mai nọ i tuaro gbe enọ e be ruẹ ude tere he? Ernst nọ ọ be rria obọ Haiti ọ jẹ hai kpohọ iwuhrẹ ukoko, rekọ o wo obe braille ọvo ho. Fikiere, eware nọ o fihọ uzou ọvo o re ro ru ẹme jẹ kẹ uyo evaọ obọ ewuhrẹ. Ọ ta nọ: “Enẹna eware i nwene no. Mẹ rẹ sae kpare obọ kẹ uyo oke kpobi nọ u je omẹ. Obọnana o ginẹ rrọ omẹ oma nọ mẹ avọ inievo na kpobi ovona. Eware evona Jihova o bi ro wuhrẹ omai kpobi!”

 Oniọvo nọ a re se Jan nọ ọ rrọ ọkpako ukoko evaọ obọ Austria ọ rẹ ruẹ ude tere he. Ọye o re ru Uwuhrẹ Uwou-Eroro gbe Uwuhrẹ Ebaibol Ukoko. Ọ ta nọ: “Ebe braille mai i vẹ vi ebe braille amọfa thethabọ. Wọhọ oriruo, evaọ ebe mai, ẹwẹ-obe kpobi o wo inọmba. I te je wo eme-obotọ nọ a rẹ gwọlọ bẹ hẹ, yọ a jarae dhesẹ iwoho na.”

 Ọkobaro nọ a re se Seon-ok nọ ọ be rria obọ South Korea o tuaro o te je diezọ. Vẹre vẹre nọ o te kpohọ ewuhrẹ, re ọ sae riẹ oware nọ a be ta, oniọvo jọ ọ rẹ rọ obọ ta ẹme na yọ ọyomariẹ ọ be rọ obọ rara obọ oniọvo na. Rekọ enẹna, ọye ọvo ọ rẹ sai se ebe braille ukoko na. Ọ ta nọ: “Ebe braille nọ amọfa a ru e rẹ bẹ omẹ ese keme ẹsejọ eka jọ nọ a ro kere ibieme na e rẹ jariẹ hẹ, ihie-eme na e rẹ liọ họ, yọ obe na o rẹ vẹvẹ hrọ. Rekọ ebe nọ Isẹri Jihova a re ro ru braille na e ga ziezi, eka nọ a ro kere ibieme na i re kpoko ziezi, e rẹ j’omẹ se.” Ọ tẹ jẹ ta nọ: “Evaọ oke nọ u kpemu, nọ mẹ tẹ gwọlọ se obe ukoko na, ohwo jọ ọ rẹ jọ kugbe omẹ nọ o re fiobọhọ kẹ omẹ. Rekọ enẹna mẹ ọvo me re se ai. Eva e be were omẹ gaga inọ mẹ rẹ sae ruẹrẹ oma kpahe kẹ ewuhrẹ koka koka jẹ kẹ uyo evaọ obọ ewuhrẹ. Me re se ebe ukoko na kpobi nọ e rrọ braille. Mẹ sae ta nọ e daruọ omẹ azẹ no.”

 Ma be hai kere eme nana fihọ ebe braille mai gbe ebe efa mai kpobi: “Ma be zẹ obe nana ha. Obe nana yọ abọjọ iruo ewuhrẹ Ebaibol nọ o nya akpọ na duwu nọ a be rehọ okẹ unevaze wha haro.” Wha kobiruo nọ wha be rọ rehọ idhere sa-sa nọ a fodẹ evaọ donate.pr418.com. na rọ kẹ okẹ unevaze. Ọghọ nọ wha bi ru o wha riẹ ze nọ ma be sai ro ru ebe gbe ividio nọ ahwo a bi ro wuhrẹ ẹme Ọghẹnẹ, te enọ ma bi ru kẹ ahwo nọ i tuaro gbe enọ e be ruẹ ude tere he.