Isẹri Jihova a be jọ ekwotọ nọ i bu vi egba ivẹ (200) ru iruẹru egagọ rai, yọ a re je fiobọhọ kẹ ahwo nọ eware e rrọ gaga kẹ. Rekọ evaọ ekwotọ nana, ọgbagbisoi ọvo a be jọ ru unevaze nọ u re te ai wo ugho nọ a be raha. Kọ ẹvẹ erẹwho efa nọ e nwani wo ugho tere he a be sai ro wo ugho rẹrote iruo na?

 Utu Ẹruorote Iruẹru Isẹri Jihova oye o rẹ jiroro kpahe oware nọ Isẹri Jihova nọ e rrọ akpọ na soso a gwọlọ re a sae gọ Ọghẹnẹ jẹ sae ta usi uwoma na. A rẹ romatotọ ma omaa oghẹrẹ nọ a rẹ raha igho riwi gbe epanọ a sae rọ rehọ iẹe ru oware nọ u fo. Otẹrọnọ ugho nọ a bi ro ru unevaze evaọ uwou ogha jọ u bu vi onọ a be raha, a re vi onọ u kiọkọ se ekwotọ efa nọ i wo ugho tere he. A bi ru onana lele oriruo oware nọ Ileleikristi ọsosuọ a je ru nọ a jẹ hai ro fiobọhọ kẹ ohwohwo re “a ru eware kpobi fihọ ẹrẹrẹe.” (2 Ahwo Kọrint 8:14) Ileleikristi nọ i wo buobu a jẹ hae rọ vọ kẹ Ileleikristi efa nọ i wo tere he.

 Eme inievo mai nọ a rọ igho nọ iwou ogha efa a vi se ai ro fiobọhọ kẹ a ta? Wọhọ oriruo, evaọ obọ Tanzania, bu vi abọvo ahwo nọ a rrọ orẹwho na a re wo te isiso esa evaọ okpẹdoke he, fikiere re a rẹrote omarai o lọhọ họ. Rekọ a rọ igho itieye nọ a vi no erẹwho efa se ai rọ ruẹrẹ Ọgwa Uvie nọ ukoko Mafinga a rẹ jọ ru ewuhrẹ. Ukoko na u kere nọ: “Anwẹnọ a ro ru Ọgwa Uvie na kpokpọ na, ahwo nọ a be ziọ ewuhrẹ a bu vi epaọ anwẹdẹ no! Ma yere ukoko Jihova gbe inievo mai nọ e rrọ akpọ na soso gaga rọkẹ ọghoruo rai nọ u fiobọhọ nọ ma sai ro wo Ọgwa Uvie owowoma otiọnana.”

 Fiki okpẹyao COVID-19 na, inievo mai nọ e rrọ obọ Sri Lanka a wo emuore tere nọ a rẹ re he. Oniọvo-ọmọtẹ mai nọ a re se Imara Fernando avọ ọmọzae riẹ nọ a re se Enosh a rrọ usu rai. Rekọ a jọ igho nọ a ro ru unevaze nọ a vi no erẹwho efa ze ro fiobọhọ kẹ ae. Fikiere a te ru ekade jọ nọ a kere fihọ nọ: “Ma yere inievo nọ i dhesẹ uyoyou kẹ omai evaọ oke obẹbẹ nana. Eva e be were omai gaga nọ ma rọ rrọ uviuwou nana, ma be lẹ nọ Jihova o gbe fiobọhọ kẹ inievo mai kpobi evaọ edẹ urere nana.”

 Ghelọ oria kpobi nọ inievo-emezae gbe emetẹ mai a rrọ kẹhẹ, a be daoma ru unevaze. Wọhọ oriruo, Enosh o ku emetehe jọ nọ ọ be hai fi umugho họ eva re ọ sae rehọ iẹe ru unevaze nọ a re ro fiobọhọ kẹ iviuwou nọ eware e rrọ gaga kẹ. Ere ọvona oniọvo-ọmọtẹ nọ a re se Guadalupe Álvarez o ru re. Ọ be rria ofẹ Mexico jọ nọ umutho ahwo a be jọ rehọ osa nọ a fihọ nọ a rẹ hwa kẹ ahwo kpotọ ba, yọ ahwo buobu a wo okọ nọ a bi jo wo ugho ẹsikpobi hi. O make rrọ ere na, ọ rẹ rọ utho nọ o wo ro ru unevaze. O kere nọ: “Me bi yere Jihova fiki ewoma riẹ gbe uyoyou riẹ nọ o rẹ hiẹ hẹ. Mẹ riẹ nọ a ti ku unevaze mẹ na kugbe erọ amọfa, a vẹ rehọ iẹe fiobọhọ kẹ inievo nọ eware e rrọ gaga kẹ.”

 Iwou ogha nọ i re vi igho kpohọ erẹwho efa nọ ẹgwọlọ ọ rrọ a be rọ evawere ru onana. Oniọvo jọ nọ a re se Anthony Carvalho nọ ọ rrọ omọvo Ogbẹgwae Uwou Ogha Brazil ọ ta nọ: “Evaọ ikpe buobu, erẹwho efa a jẹ rọ ugho fiobọhọ kẹ omai evaọ iruo na. Yọ obufihọ nana o wha riẹ ze nọ ma je ro wo ẹvi gaga. Rekọ enẹna, eware e gbẹ ga te epanọ e jọ họ, fikiere ma be sae rọ ugho ro fiobọhọ kẹ amọfa. Inievo na a rri iruo usi uwoma ota inọ yọ iruo akpọ-soso, fikiere a be daoma ru oware kpobi nọ a rẹ sai ru re a ro fiobọhọ evaọ iruo na, keme ere o gwọlọ mi ilele Jesu.”

 Oghẹrẹ vẹ Isẹri Jihova a sae rọ tha inievo-emezae gbe emetẹ nọ eware e rrọ gaga kẹ uke? Orọnikọ a re vi ugho kpohọ uwou ogha orẹwho ofa ha, rekọ a re ru unevaze kẹ iruo akpọ-soso na. A rẹ sai fi ugho na họ ẹkpẹti unevaze nọ a kere fihọ nọ “Rọkẹ Iruo Akpọ-Soso” na hayo ru unevaze evaọ donate.pr418.com. Unevaze kpobi nọ wha bi ru o be da omai ẹro fia.