Nọ a siobọno Ebaibol Efafa Akpọ Ọkpokpọ ọrọ Ikereakere Griki Ileleikristi Na evaọ ẹvẹrẹ Bengali, oniọvo jọ nọ ọ rrọ ohwo ẹvẹrẹ yena ọ ta nọ: “Anwọ ikpe ikpegbizii soso me bi ro rẹro onana!” Ahwo buobu a rẹ ta ọkpọ ẹme nana nọ a te siobọno Ebaibol Efafa Akpọ Ọkpokpọ na evaọ ẹvẹrẹ rai. Kọ whọ riẹ epanọ a be sae rọ fa Ebaibol na fihọ evẹrẹ sa-sa je printi riẹ?

 A rẹ kake salọ ahwo nọ a te fa Ebaibol na. Ogbẹgwae Ebe-Ikere orọ Utu Ẹruorote na oye o rẹ ta oghẹrẹ nọ a rẹ rọ salọ ahwo na. Ẹvẹ u re kri te re a tẹ te fa Ebaibol re? Brọda Nicholas Ahladis nọ ọ be jọ Ẹko-Iruo Efafa ru iruo evaọ Warwick, obọ New York, ọ ta nọ: “Eware buobu e rẹ whae ze nọ efafa Ebaibol o re ro kri hayo vẹrẹ. Ejọ họ, unu ahwo nọ a be fa Ebaibol na evaọ ẹvẹrẹ na, epanọ o ga te re a fa eme fihọ ẹvẹrẹ na, epanọ ahwo ẹvẹrẹ na a riẹ iku Ebaibol te, gbe sọ oghẹrẹ nọ a rẹ ta ẹvẹrẹ na evaọ eria sa-sa u wo ohẹriẹ. Evaọ eria buobu o rẹ rehọ ukpe ọvo rite ikpe esa re a tẹ te fa Ikereakere Griki Ileleikristi re. A vẹ jẹ rehọ ikpe ene efa hayo bu viere rọ fa Ebaibol na re. Yọ ọrọ ẹvẹrẹ obọ rọ t’ẹme u re tube kri vrẹ ere.”

 Orọnikọ inievo nọ e be fa Ebaibol na ọvo a wo iruo na ha, inievo nọ e rrọ eria sa-sa a re se ebe nọ a fa no na re a riẹ sọ a fa eme na ziezi, yọ a re mi ugho fihọ onana ha. Eme nọ a ta kpahe ebe Ebaibol nọ a se na u re fiobọhọ kẹ enọ e be fa Ebaibol na re a fa Ẹme Ọghẹnẹ gbagba, vevẹ, o vẹ jẹ lọhọ ese. Onana u wuzou gaga. O nwane wọhọ epanọ oniọvo jọ nọ ọ rrọ South Africa nọ o re wuhrẹ ahwo epanọ a rẹ fa Ebaibol ọ ta, inọ: “Inievo nọ e be fa Ebaibol a riẹ nọ Jihova ọ gwọlọ nọ a fa ẹme riẹ gbagba. A te je vuhumu nọ u fo re a fa eme na evaọ oghẹrẹ nọ i re ro vẹ kẹ ahwo nọ a ti se ai.”

 A tẹ fa Ebaibol na re no, a ve printi riẹ je fi uke họ iẹe. Eware ikpe a re ro ru onana. Eye họ: obe, ame-ugbẹ, oware nọ a re ro ru uke riẹ, egọmo, oware nọ a rẹ rọ tamu udevie uke na evaọ obeva, ekọlọ isiliva, ifi, ẹwẹ-ohọ nọ o wo ighogho, oware nọ o rẹ lẹliẹ udevie uke na ga ziezi, gbe oware ofa nọ a rẹ rọ whẹ eware nana kpobi kugbe. Evaọ ukpe 2019, igho nọ ma rọ dẹ eware nana ọvo i bu vi ₦7,600,000,000 (edọla 20 million erọ U.S.). Yọ euwa nọ a ro printi Ebaibol jẹ wọ ai se ahwo evaọ ukpe yena i bu vi idu egba esa (300,000) soso.

 Fikieme ma be rọ rehọ igho buobu gbe euwa yena kpobi ro printi Ebaibol jẹ fa ae se ahwo? Oniọvo jọ nọ a re se Joel Blue, nọ o bi ru iruo evaọ ọfisi nọ a rẹ jọ ma omaa epanọ a re ro printi ebe mai evaọ akpọ soso, ọ ta nọ: “Ebaibol na họ obe nọ o mai wuzou nọ ma bi printi. Fikiere ma gwọlọ nọ ahwo a tẹ ruẹ e riẹ, a vẹ kẹ Ọghẹnẹ nọ ma be gọ na oruaro, jẹ gaviezọ kẹ usi uwoma nọ ma be ta.”

 U wo oghoghẹrẹ Ebaibol Efafa Akpọ Ọkpokpọ na nọ ma bi ru. U te no oghẹrẹ ọnọ mai ahwo buobu ma wo na no, u wo eghẹrẹ efa nọ ma bi ru kẹ ahwo nọ i tuaro gbe enọ i wo ebẹbẹ efa. Wọhọ oriruo, ma wo orọ braille nọ ahwo nọ i tuaro a rẹ rọ obọ rara se, evaọ evẹrẹ ikpe. Re a sai ru Ebaibol braille ọvo re, o rẹ rehọ te euwa eree. Yọ a tẹ wọ iko riẹ kpobi fihọ ehru ohwohwo, i re kpehru te irula ihrẹ gbe ubro (7.5 ft). U te no ọnana no, ma wo oghẹrẹ ọfa nọ ma bi ru kẹ ahwo nọ a rrọ uwou-odi nọ a rọ obe gheghe ru uke riẹ. A jọ iwou-odi jọ kuvẹ nọ a wo ebe nọ i wo uke ogaga hayo nọ a rọ oviẹ arao ru uke rai hi.

 Ebaibol Efafa Akpọ Ọkpokpọ na o bi fiobọhọ kẹ ahwo buobu nọ a bi sei. Oriruo jọ họ inievo nọ e be jẹ ẹvẹrẹ Kiluba nọ e rrọ ẹwho nọ a re se Tombe evaọ obọ Democratic Republic of the Congo. No okpẹwho esuo orẹwho na rite Tombe u thabọ te ikilomita odu ọvo gbe egba ihrẹ (1,700) koyehọ emaele odu ọvo (1,000). Evaọ ikpe buobu, Ebaibol ọvo oye Isẹri Jihova kpobi nọ a rrọ ẹwho nana a wo. Yọ eme Kiluba nọ a ro kere Ebaibol na i kiekpo no, ahwo a gbẹ riẹ ae tere he. Ebaibol ọvo yena a jẹ hai ro se inievo na omomọvo re a sae ruẹrẹ oma kpahe kẹ iwuhrẹ. Rekọ anwọ Aria 2018 nọ a ro siobọno Ebaibol Efafa Akpọ Ọkpokpọ ọrọ Kiluba na, inievo na kpobi a wo ọvuọ Ebaibol riẹ no. Oma Ebaibol na soso a fa fihọ ẹvẹrẹ nana, yọ oghẹrẹ nọ a be ta ẹvẹrẹ na enẹna a rọ fae.

 Oniọvo-ọmọtẹ jọ nọ ọ rẹ ta ẹvẹrẹ German ọ fodẹ irere nọ i te rie no anwẹnọ a rọ wariẹ fa Ebaibol Efafa Akpọ Ọkpokpọ evaọ ẹvẹrẹ riẹ. Ọ ta nọ: “Mẹ gbẹ be gba oma họ se Ebaibol ho. Enẹna Ebaibol na ọ be were omẹ ese.” Ọzae jọ nọ ọ rrọ uwou-odi o kere nọ: “Ohwo jọ ọ kẹ omẹ Ebaibol Efafa Akpọ Ọkpokpọ. Yọ anwẹnọ me bi ro sei na uzuazọ mẹ u nwene gaga no. Mẹ re riẹ otọ Ẹme Ọghẹnẹ te enẹ ẹdẹvo ho. Mẹ gwọlọ riẹ oghẹrẹ ahwo nọ Isẹri Jihova a rrọ, jẹ riẹ oware nọ me re ru re mẹ sae jọ omọvo rai.”

 Ahwo buobu a be rọ ugho kẹ okẹ, yọ okẹ unevaze nana a bi ro ru Ebaibol Efafa Akpọ Ọkpokpọ na. Ọghọ nọ wha bi ru o da ahwo kpobi nọ a bi se Ebaibol nana ẹro fia. Idhere sa-sa nọ a fodẹ evaọ donate.pr418.com ahwo a be rọ kẹ okẹ unevaze na. Whai enọ i bi ru onana kpobi, ma yere owhai kẹ ọghoruo rai.