Ile yọ obọdẹ okẹ nọ Jihova ọ kẹ ahwo-akpọ. E rẹ sai ru omai roro kpahe emamọ eware, ru eva were omai, jẹ tuduhọ omai awọ. Nwanọ oware nọ ile jw.org mai na i re ru kẹ omai oye. Ile nana i re tube ru viere: e sai si omai kẹle Jihova ziezi.

 Anwọ 2014 ze, ma so ile nana nọ i bu vi 70 no, yọ o tẹ kawo, ọjọ evaọ usu rai ọ rrọ evẹrẹ nọ i bu vi egba isoi (500). Rekọ ẹsejọhọ whọ be hae nọ inọ, ‘Amono a be hai ru jẹ so ile nana, kọ oghẹrẹ vẹ a bi ro ru ei?’

 Inievo nọ e rrọ utu ile evaọ Audio/Video Services a be hai ru ile mai nọ e rrọ jw.org na, yọ Ogbẹgwae Ewuhrẹ ọrọ Utu Ẹruorote na o be sẹro ẹko-iruo nana. Inievo-emezae gbe erọ emetẹ 13 e rrọ utu na, yọ ae a re kere ile na, rekọdo ikporakporo fihọ ae, ru epanọ a rẹ rọ so ae, gbe eware efa kpobi nọ o gwọlọ. Ogbẹgwae Ewuhrẹ na o tẹ jẹ kuvẹ re inievo nọ i bi ru iruo no obọ iwou rai ze a fiobọhọ evaọ iruo na, te enọ i re kere ile, enọ i re kporo ile, gbe enọ e rẹ so. Inievo nana nọ i wo omaurokpotọ na a be rọ onaa rai ru iruo kẹ Jihova, yọ a gwọlọ nọ ahwo a jiri ae hayo kẹ ae ọghọ họ.

 Ẹvẹ a re ro ru ile nọ a be hai fihọ jw.org na? Orọ ọsosuọ, Ogbẹgwae Ewuhrẹ na u re dhesẹ oria ikere nọ a rẹ rehọ ole na no ze, gbe oghẹrẹ nọ u fo nọ u re duobọte ohwo nọ ọ te gaviezọ kẹ ole na. Inievo nọ e rrọ utu ile na a ve ru epanọ a re ro kere eme ole na. A ve rekọdo onọ a re dhesẹ kẹ Ogbẹgwae Ewuhrẹ na. Ogbẹgwae Ewuhrẹ na o vẹ gaviezọ kẹe jẹ vuẹ ae eware jọ nọ a rẹ sai gbe ru fihọ iẹe hayo kpọ họ. Kẹsena utu ile na a ve ru eware nọ a vuẹ rai na jẹ wariẹ rekọdo ọrọ urere. Eria sa-sa a be hae jọ rekọdo ile nana, te iwou ogha gbe obọ iwou ahwo.

 Inievo na a be hae rehọ iprogramo sa-sa nọ e rrọ ekọmputa kere je rekọdo ile nana. Eware efa nọ a re ro ru iruo na họ, ekwakwa ikporakporo, ispika, emaekrofonu, gbe eware itieye efa. Emaekrofonu nọ ọ mai ku ọ sai te edọla 100, yọ ejọ dede e ghare vi edọla $1,000 (erọ U.S.). Evaọ ukpe 2020, ma rọ unuigho nọ u te edọla $116,000 (erọ U.S.) rọ dẹ ekwakwa nọ a re ro rekọdo ile.

 Eme ukoko na u bi ru re a gbẹ raha igho bu hrọ họ? Ukpenọ inievo buobu a rẹ jọ utu ile evaọ Ebẹtẹle, a be rọ inievo buobu ru iruo na no obọ iwou rai ze. U te no ere no, ukpenọ a re koko inievo buobu họ oria ovo nọ i re rekọdo ile na, ekọmputa a be jọ so je ru ile na enẹna.

 O rẹ were inievo-emezae gbe erọ emetẹ mai gaga re a gaviezọ kẹ ile jw.org mai na. Oniọvo-ọmọtẹ jọ nọ a re se Tara nọ ọ be rria Germany ọ ta nọ: “Nọ mẹ tẹ be ruawa, ile na i re ru udu te omẹ otọ. Mẹ tẹ be gaviezọ kẹ ae evaọ ẹvẹrẹ mẹ, o rẹ jọ omẹ oma wọhọ ẹsenọ Jihova ọ gbalọ omẹ.” Oniọvo-ọmọzae jọ evaọ obọ Kazakhstan nọ a re se Dmitry ọ ta nọ: “Oware jọ nọ o were omẹ gaga kpahe ile na họ, mẹ tẹ be gaviezọ kẹ ae, ozọ u re mu omẹ hẹ sọ a te jarae ta eme jọ nọ e wọso izi Ebaibol. Yọ ile na i re fiobọhọ kẹ omẹ tẹrovi usu mẹ kugbe Jihova.”

 Delia nọ ọ be rria obọ South Africa ọ ta epanọ ile jw.org mai na i bi ro fiobọhọ kẹe inọ: “Ile na i ru ẹrọwọ mẹ ga ziezi no. Nọ eva e gbẹ be were omẹ hẹ hayo nọ me te wo ẹbẹbẹ jọ, u re wo ole nọ o rẹ nwani kiehọ uyero mẹ na. Ẹsibuobu, edo ikporakporo ole na ọvo dede u re si ọkora no omẹ oma, je ru eva were omẹ!”

 Ile jw.org mai na jọ e mae were inievo jọ. Lerato nọ ọ be rria South Africa ọ ta nọ: Ole ‘O Ginẹ Raha Oke He’ gbe ọrọ ‘Akpọ Ọkpokpọ Na’ i re fiobọhọ kẹ omẹ ruẹ oma mẹ evaọ okenọ me ti dede oni oyoyou mẹ rehọ, nọ a tẹ kpare iẹe zihe ziọ uzuazọ no. Oke kpobi nọ mẹ tẹ be gaviezọ kẹ ile yena, mẹ rẹ ruẹ e riẹ nọ ọ be dhẹ bru omẹ ze te gbalọ omẹ.”

 Ole jw.org jọ o fiobọhọ kẹ uzoge jọ evaọ Sri Lanka gaga. Ọ ta nọ: “Iticha nọ o re wuhrẹ omai science o doku omẹ gaga ẹdẹ jọ evaọ iraro emọ-eklase mẹ fikinọ mẹ yọ omọvo Isẹri Jihova. Ozọ u mu omẹ gaga ẹdẹ yena, yọ mẹ riẹ ẹme nọ mẹ rẹ ta ha. Me te uwou, oni mẹ ọ tẹ vuẹ omẹ nọ mẹ gaviezọ kẹ ole ‘Uwuhrẹ U re Ru Owhẹ Ga’ na. Ole na o fiobọhọ kẹ omẹ ruẹ nọ u fo nọ me re ru ekiakiẹ, mẹ vẹ ruẹrẹ uyo jọ họ. Okiokiọ riẹ me te lele iticha mẹ ta ẹme. Ọ gaviezọ kẹ omẹ, ọ tẹ ta nọ obọnana o wo otoriẹ eware nọ Isẹri Jihova a rọwo no. Me bi yere ukoko Jihova gaga rọkẹ emamọ ile itienana nọ a kẹ omai na.”

 Ẹvẹ ma bi ro wo igho ru ile nana? Ma bi wo igho nana buobu evaọ unevaze nọ a bi ru rọkẹ iruo akpọ-soso na ẹkwoma idhere sa-sa nọ e rrọ donate.pr418.com. Ma bi yere owhai gaga rọkẹ okẹ unevaze rai.