Jesu ọ ta kẹ ilele riẹ nọ: “Wha ve ti se isẹri kpahe omẹ . . . rite oria nọ o mai thabọ evaọ otọakpọ na.” (Iruẹru Ikọ 1:8) Isẹri Jihova a be rọ ọwhọ ta usi uwoma nẹnẹ wọhọ epanọ Jesu ọ ta kẹ ilele riẹ na. Ghele na, u wo eria jọ evaọ akpọ na nọ a re ta usi uwoma na te ziezi hi. Eria nana jọ e rrọ ruaro yọ ahwo nọ a be rriae a rrọ buobu gaga. Yọ Isẹri Jihova nọ e rrọ erẹwho jọ a tulo ho. (Matiu 9:37, 38) Ẹvẹ ma be sae rọ ta usi uwoma na te eria buobu nẹnẹ?

 Re ma sae ta usi uwoma na te eria nọ e mai thabọ wọhọ epanọ Jesu ọ ta kẹ ilele riẹ na, Ogbẹgwae Iruo Ukoko ọrọ Utu Ẹruorote Iruẹru Isẹri Jihova o be hai vi imishọnare kpohọ eria nọ ẹgwọlọ ọ rrọ evaọ akpọ na soso. Ma be ta ẹme na, imishọnare nọ e be ta usi uwoma evaọ akpọ na soso i bu te idu esa gbe udhone gbikpe (3,090). a Imishọnare nana buobu a kpohọ isukulu nọ a rẹ jọ wuhrẹ Ebaibol na, wọhọ Isukulu Rọkẹ Etausiuwoma Uvie Na. O rẹ were imishọnare re a kwa kpohọ erẹwho efa nyae ta usi uwoma na. Fikinọ a kruga, a wuhrẹ i rai ziezi, yọ a wo onaa usi uwoma ota, a bi fiobọhọ ta usi uwoma na evaọ eria sa-sa akpọ na, yọ emamọ oriruo rai u bi fiobọhọ kẹ ahwo nọ a bi kurẹriẹ ziọ ukoko na.

 Evaọ uwou ogha kpobi, Ẹko-Iruo Ẹruorote Etausiuwoma ọrọ Ẹko-Iruo Ẹruorote Iruẹru Ikoko, a re lele Ogbẹgwae Uwou Ogha ru eware kugbe re a sae rẹrote imishọnare. Wọhọ oriruo, a re fiobọhọ kẹ ae re a sai wo uwou nọ a rẹ rria, re a sae rẹrote ugboma rai, jẹ kẹ ae umugho nọ a rẹ rọ dẹ emu gbe eware efa. Evaọ ukpe 2020, Isẹri Jihova a raha ugho nọ u bu vi enaera ima-idu ikpegbọvo (₦11,000,000,000) rọ rẹrote imishọnare. Fikinọ a be rọ eware nana ro fiobọhọ kẹ imishọnare, a be sae tẹrovi iruo usi uwoma ota na jẹ tuduhọ inievo na awọ evaọ ikoko nọ a rrọ.

 Ẹvẹ imishọnare nana a bi ro ru iruo usi uwoma ota na nyaharo? Oniọvo jọ nọ a re se Frank Madsen nọ ọ rrọ omọvo Ogbẹgwae Uwou Ogha Malawi ọ ta nọ: “Fikinọ imishọnare a wo udu je wo onaa usi uwoma ota, a bi fiobọhọ kẹ ikoko sa-sa ta usi uwoma evaọ ekwotọ nọ usi uwoma ota o jẹ rrọ bẹbẹ, wọhọ eria nọ a jọ di ogba wariẹ iwou họ gbe eria nọ a be jọ ta evẹrẹ efa. Ofariẹ, fikinọ a be daoma re a wuhrẹ evẹrẹ gbe iruemu ẹwho nọ a be jọ ta usi uwoma, emamọ oriruo rai u bi fiobọhọ kẹ amọfa jẹ tuduhọ izoge na awọ re a mu usi uwoma ota oke-kpobi na họ. Ma yere Jihova rọkẹ imishọnare nọ e be ta usi uwoma na.”

 Oniọvo ọfa jọ nọ ọ rrọ omọvo Ogbẹgwae Uwou Ogha evaọ orẹwho ọfa jọ ọ ta nọ: “Iruo imishọnare yọ oware jọ nọ o kẹ imuẹro nọ Isẹri Jihova a wo okugbe evaọ akpọ na soso. Makọ ahwo nọ a rrọ Isẹri Jihova ha, a be ruẹ vevẹ nọ eware nọ ma bi wuhrẹ evaọ Ebaibol na i fiobọhọ kẹ omai zihe ruọ inievo no evaọ akpọ na soso, fikiere okugbe ọ rrọ udevie mai dede nọ ma no eria sa-sa ze.”

 Ẹvẹ imishọnare a bi ro fiobọhọ kẹ iwhowho-uvie evaọ ikoko nọ a rrọ? Oniọvo-ọmọzae jọ nọ a re se Paulo ọ be rria orẹwho Timor-Leste. Eva e were riẹ gaga inọ a vi imishọnare ziọ ukoko rai. Ọ ta nọ: “Fikinọ uvo o rẹ jọ gaga evaọ orẹwho mai, oria kpobi o rẹ rrorro. Dede nọ imishọnare na a no eria nọ e rrọ dhedhẹ ze, a rẹ siọ usi uwoma ba fiki ẹrrorro ọgaga na ha. A rẹ jariẹ evaọ ohiohiẹ kpobi nọ ma te kokohọ taure ma te ti kpohọ usi uwoma. A re zihe bru ahwo nọ a ta usi uwoma kẹ no rite oke uvo nọ oria kpobi o be rrorro, yọ a re je kpohọ usi uwoma evaọ owọwọ re. A fiobọhọ kẹ ahwo buobu wuhrẹ uzẹme na kpahe Ọghẹnẹ no, yọ mẹ rrọ usu ahwo nana. A be rọ ọwhọ ta usi uwoma na jẹ rọ uzuazọ rai kpobi gọ Jihova, yọ emamọ oriruo rai o be whae ze nọ inievo nọ e rrọ ukoko na soso a bi ro kruga ziezi evaọ egagọ Jihova.”

 Oniọvo-ọmọtẹ jọ nọ a re se Ketti yọ ọkobaro oke-kpobi evaọ orẹwho Malawi. O gbiku epanọ imishọnare jọ avọ aye riẹ a ro fiobọhọ kẹe avọ uviuwou riẹ inọ: “Oke nọ a ro vi imishọnare jọ avọ aye riẹ ziọ ukoko mai, mẹ ọvo ọ jọ Osẹri Jihova evaọ uviuwou mai. Imishọnare na avọ aye riẹ a fiobọhọ kẹ omẹ gaga, yọ onana o wha riẹ ze nọ ae avọ ahwo uviuwou mẹ a rọ jọ kpekpekpe. Emamọ oriruo rai o fiobọhọ kẹ emọ mẹ ruẹ nọ, ohwo o re wo evawere gbe edẹro nọ ọ tẹ be rọ uzuazọ riẹ kpobi gọ Jihova. Fiki emamọ oriruo imishọnare na gbe ọwhọ nọ a wo kẹ egagọ Jihova, onana u ru nọ emetẹ esa mẹ a rọ rrọ ọkobaro oke-kpobi, yọ ọzae mẹ o bi kpohọ iwuhrẹ enẹna.”

 Ẹvẹ ma be sae rọ ruẹ ugho rẹrote imishọnare nọ e be ta usi uwoma na? Ẹkwoma idhere sa-sa nọ ahwo a bi ro ru unevaze kẹ iruo usi uwoma ota na evaọ donate.pr418.com. Ma yere owhai gaga rọkẹ unevaze rai.