O rẹ were Jihova re o wuhrẹ ahwo riẹ. Fikiere ukoko riẹ o ruẹrẹ isukulu sa-sa họ nọ a rẹ jọ wuhrẹ ahwo re a sai ru iruo rai evaọ ukoko na. Isukulu nana jọ họ Isukulu Rọkẹ Etausiuwoma Uvie Na (SKE). Anwọ ikpe jọ ze na, ukoko Ọghẹnẹ o be daoma re eware nọ a bi wuhrẹ ahwo na i woma ziezi. Rekọ ere ọvo ho, a be jẹ daoma re iwou nọ a be jọ wuhrẹ i woma ziezi re. Ugogo oware nọ a bi ro ru onana họ re iwuhrẹ na gbe emọ-isukulu na a wo emamọ oria nọ a sae jọ wuhrẹ ziezi. Oghẹrẹ vẹ ugho nọ who bi ro ru unevaze u bi ro fiobọhọ kẹ omai ru onana?

 Anwọ ikpe buobu ze na, a be hae jọ Egwa Uvie gbe Egwa Okokohọ ru isukulu ukoko na. Rekọ evaọ omoke jọ ze na, fikieme ma be rọ bọ iwou ekpokpọ hayo ruẹrẹ ejọ nọ a rẹ jọ ru isukulu ukoko na ọvo? Ma ta kpahe ẹjiroro esa jọ nọ o rọ rrọ ere.

 Ma gwọlọ inievo nọ i re fiobọhọ ru iruo sa-sa. Oniọvo nọ a re se Christopher Mavor nọ ọ rrọ ofiobọhọ kẹ Ogbẹgwae Iruo Ukoko ọrọ Utu Ẹruorote na ọ ta nọ: “Iwou ogha sa-sa i kere se omai no inọ a gwọlọ inievo-emezae gbe emetẹ nọ i re fiobọhọ ru iruo sa-sa. Wọhọ oriruo, evaọ 2019, uwou ogha Brazil o ta nọ a gwọlọ inievo idu ihrẹ gbe egba ezeza (7,600) nọ i nwrotọ no isukulu SKE no nọ i re ru iruo sa-a evaọ ẹkwotọ uwou-ogha rai na.” Uwou ogha United States u te je kere nọ a gwọlọ ekobaro buobu nọ i te ziezi nọ i re wuhrẹ inievo efa epanọ a rẹ ta usi uwoma ẹgbede evaọ eria nọ i re zurie, eria nọ ekọ e rẹ kpahe, gbe iwou-odi. Ma tẹ jẹ gwọlọ inievo-emezae nọ i re ru iruo evaọ Local Design/Construction Department gbe Egbẹgwae Ẹmeọta-Kugbe Ahwo Iwou-Imu (Hospital Liaison Committees). Inievo nọ i kpohọ isukulu SKE no a sai fiobọhọ evaọ iruo nana kpobi.

 Inievo buobu a bi fi odẹ hotọ kẹ isukulu na. Evaọ iwou ogha buobu, inievo nọ i fi odẹ hotọ kẹ isukulu na a bu vi ahwo nọ a rẹ sai zizie enẹna. Wọhọ oriruo evaọ Brazil, ahwo nọ a fi odẹ hotọ kẹ isukulu SKE evaọ ukpe ọvo a bu te idu ivẹ gbe egba isoi (2,500) soso. Rekọ fikinọ iwou nọ a rẹ jọ ru isukulu na i bu tere he, ahwo egba izii gbe udhuvẹ gbe ikpe (950) ọvo a sai zizie.

 O gwọlọ nọ inievo na a rẹ rria emamọ iwou. Vẹre vẹre nọ ahwo a te kpohọ isukulu ukoko na jọ evaọ Ọgwa Uvie hayo Ọgwa Okokohọ, iwou inievo-emezae gbe emetẹ nọ e kẹle oyena a re wohọ. Ọruẹrẹfihotọ yena o rrọ ziezi evaọ eria nọ eklase nọ a re wuhrẹ evaọ ẹgbukpe e jọ bu tere he. Rekọ evaọ eria nọ eklase nọ a re ru e jẹ rrọ buobu, o rẹ nwane lọhọ tere he re inievo na i fi ahwo nọ a ziọ isukulu họ uwou unuẹse buobu evaọ ukpe na. Fikiere a be bọ iwou nọ inievo nọ i kpohọ isukulu na a rẹ rria kẹle oria nọ a rẹ jọ ru isukulu na, yọ a be bọ ae evaọ oghẹrẹ nọ i re ro kiehọ ae oma.

 Re a bọ uwou nọ u wo eklase ọvo nọ a rẹ jọ wuhrẹ, gbe ibriwou nọ iwuhrẹ na avọ emọ-eklase 30 a rẹ rria, gbe eria nọ inievo nọ i re ru iruo sa-sa ro fiobọhọ a rẹ rria, o rẹ rehọ edọla U.S. ima buobu. Yọ oghẹrẹ oria nọ a be bọ uwou na fihọ o sai ru ugho nọ a rẹ raha bu hayo kawo.

 Eria nọ a rẹ mae bọ isukulu na fihọ o rẹ jọ otọ-ẹwho ho, rekọ ughe okpẹwho nọ o rovie nọ edo ọ rẹ jọ ga hrọ họ, o vẹ jẹ kẹle oria nọ a sae jọ ruẹ omoto ofa lọlọhọ. A rẹ mae bọ ae fihọ oria nọ iwhowho-uvie e jẹ rrọ buobu nọ e rẹ sai fiobọhọ ru iruo sa-sa evaọ isukulu na jẹ rẹrote uwou na gbe eware efa.

 Eria isukulu na i re wo eria nọ a re fi ebe họ, eria nọ a rẹ jọ se obe, ekọmputa, iprinta, gbe ekwakwa efa. Ẹsibuobu, u re wo oria nọ iwuhrẹ na avọ emọ-isukulu na a rẹ keria jọ re emu kugbe. U re wo omoria nọ a sae jọ zahamaro je ru oma sasa.

 A rẹ jẹ romatotọ ma omaa oghẹrẹ nọ a rẹ bọ eklase nọ a te jọ wuhrẹ emọ-isukulu na. Oniọvo nọ a re se Troy nọ o bi ru iruo kugbe Ẹko-Iruo Ebabọ Akpọ-Soso evaọ obọ Warwick nọ ọ rrọ New York ọ ta nọ: “Ma ta kẹ Ẹko-Iruo Isukulu Ukoko Na re a fiobọhọ kẹ omai drọ omaa epanọ eklase na e rẹ jọ nọ ahwo a sae rọ jarae wuhrẹ ziezi. Inievo na a vuẹ omai epanọ u fo nọ eklase na e rẹ rro te, oghẹrẹ nọ a rẹ ruẹrẹ eware họ evaọ eva rai, gbe oghẹrẹ ikpẹ avọ ekwakwa ikporakporo gbe ividio nọ a re fihọ ai.” Oniọvo nọ a re se Zoltán nọ ọ rrọ owuhrẹ isukulu SKE evaọ Hungary ọ ta kpahe ekwakwa ikporakporo na nọ: “Okenọ ma muhọ obọ ma wo emaekrofonu hu, fikiere ma jẹ hae kareghẹhọ emọ-eklase na nọ a kpare uvou kpehru nọ a tẹ be kuyo. Rekọ enẹna nọ emaekrofonu ọ rrọ ehru emẹjẹ kpobi no na, ma gbẹ be ta ere kẹ ae he!”

 Ẹvẹ eria isukulu nọ a be nabe riẹ bọ enẹna i bi ro fiobọhọ kẹ iwuhrẹ na avọ emọ-eklase na? Oniọvo-ọmọtẹ nọ a re se Angela nọ o kpohọ isukulu SKE evaọ Palm Coast, Florida nọ ọ rrọ U.S.A. ọ ta nọ: “Oria na o dhẹ oma wumuo ho. A nabe ruẹrẹ eware kpobi họ kpatiẹ. A ruẹrẹ eklase na gbe ibruwou mai họ krẹkrẹrẹkrẹ, re ma sai fi iroro mai họ eware nọ ma bi wuhrẹ na ziezi.” Oniọvo nọ a re se Csaba nọ ọ rrọ owuhrẹ evaọ Hungary ọ ta nọ uvẹ nọ a wo nọ a be hae rọ re emu kugbe emọ-eklase na u woma wumuo ho. Ọ ta nọ “emọ-eklase na a rẹ rọ uvẹ yena gbiku eware nọ a rọ ẹro ruẹ no kẹ ae. Onana u bi fiobọhọ kẹ omai riẹ emọ-isukulu na ziezi. Fikiere evaọ okenọ ma te bi wuhrẹ, ma rẹ daoma wuhrẹ evaọ oghẹrẹ nọ u re ro kiekpahe uyero rai.”

 Emọ-isukulu na gbe iwuhrẹ na a rri rie nọ eria isukulu nana nọ a bi ru woma vi epanọ e jọ vẹre na yọ oghale nọ Jihova “Owuhrẹ Ologbo Oride” mai na ọ kẹ omai. (Aizaya 30:20, 21) Oniọvo-ọmọtẹ jọ nọ o kpohọ SKE evaọ Philippines evaọ uwou nọ a nwene zihe ruọ oria isukulu ukoko na ọ ta nọ: “Oghẹrẹ nọ oria isukulu na ọ rrọ o kareghẹhọ omai nọ orọnọ emọ-isukulu ọvo ma rrọ họ, mai yọ obọdẹ erara nọ e kpahe Jihova. Ọ gwọlọ nọ oma o were omai nọ ma be romatotọ wuhrẹ Ẹme riẹ na.”

 Ugho nọ who bi ro ru unevaze u bi fiobọhọ nọ ma be sae rọ bọ, ruẹrẹ, jẹ rẹrote iwou isukulu ukoko na. Yọ donate.pr418.com a bi jo ru unevaze nana buobu. Ma bi yere owhẹ gaga rọkẹ unevaze nọ whọ be hai ru ẹsikpobi na.