Wariẹ akpọ na soso họ, egọmeti buobu a fi uzi họ nọ ahwo a gbe go kẹle ohwohwo gahrọ họ yọ ahwo buobu a gbe kokohọ oria ha fiki ẹyao nọ a bi se coronavirus na. Mai Isẹri Jihova ma gba riẹ mu nọ ma re koko izi nana, rekọ ma gbẹ be rọ edhere ọfa nọ ọ rẹ wha enwoma se omai hayo amọfa ha kuomagbe rọkẹ egagọ mai ghele. Fikiere, app nọ a sae rọ jọ itanẹte thuru kugbe amọfa wọhọ ọnọ a re se Zoom, ọye ikoko buobu a bi ro ru ewuhrẹ.

 Re ma sai ru iwuhrẹ nana ẹsikpobi, Utu Ẹruorote na u te kuenu nọ a rọ igho nọ a ro ru unevaze rọ hwosa fihọ akanto Zoom buobu nọ ikoko a sae rọ rueva Zoom nọ a re ro ru iwuhrẹ. Ọruẹrẹfihotọ nana o bi fiobọhọ gaga rọkẹ ikoko jọ nọ ae ọvo a hae te sae hwosa fihọ app na ha, onọ unuigho riẹ o rẹ sai te enwenọ ₦6,000 rite ₦8,000 hayo tubẹ vrẹ ere dede. O tẹ whae ze nọ ikoko itieye e jẹ hae rọ rehọ app ọvọvẹ ru ewuhrẹ, rekọ umutho ahwo ọvo a rẹ sai thuru kugbe ewuhrẹ na, yọ fiki oghẹrẹ nọ app ọvọvẹ na e rrọ, ahwo nọ a zizie he a sae lẹlẹ thuru kugbe ewuhrẹ na. Rekọ enẹna, ikoko kpobi nọ e be rehọ akanto Zoom nọ ukoko na o hwosa fihọ no ro ru ewuhrẹ a rẹ dhozọ yena ha keme ukoko na o fodẹ eware nọ a rẹ sai ru lọlọhọ re ikpehre ahwo a gbe wo uvẹ rueva ha, yọ ahwo buobu a rẹ sai thuru kugbe ewuhrẹ na. Ma be ta ẹme na, ikoko nọ i bu vi idu udhosa-gbisoi (65,000) evaọ erẹwho nọ i bu vi udhoree-gbikpe (170) a be rọ akanto Zoom sa-sa nọ ukoko na o hwosa fihọ ru iwuhrẹ.

 Kẹle na ukoko Kairagi evaọ Manado nọ ọ rrọ North Sulawesi, Indonesia, a muọ Zoom nọ ukoko na o hwosa fihọ no họ ero ru ewuhrẹ. Brọda Hadi Santoso ọ ta nọ: “Makọ inievo-emezae gbe erọ emetẹ nọ e riẹ epanọ a rẹ rehọ itanẹte ruiruo tere he a bi wo erere no iwuhrẹ na ze ziezi enẹna, keme u gbe du gwọlọ nọ a re thuru kugbe ewuhrẹ ọvo unuẹse buobu hu wọhọ epanọ o jẹ hae jọ vẹre.”

 Evaọ ukoko Guayacanes Oeste nọ ọ rrọ Guayaquil evaọ Ecuador, ọkpako ukoko jọ nọ a re se Lester Jijón, Jr. ọ ta nọ: “Fikinọ inievo-emezae gbe erọ emetẹ mai buobu a wo ugho tere he, o hae te lọhọ vievie he re ikoko jọ e hwosa fihọ akanto Zoom nọ u re ru ukoko na soso wo uvẹ kuomagbe ru ewuhrẹ. Rekọ enẹna, eva e were omai gaga inọ ukoko Jihova o hwosa fihọ akanto Zoom nọ ahwo buobu a rẹ sai thuru kugbe ro ru ewuhrẹ, fikiere ma be sai tube zizie amọfa dede re a kuomagbe omai evaọ ewuhrẹ ababọ ozọ nọ ma ti bu vroma.”

 Evaọ ukoko Ngwerere North nọ ọ rrọ Lusaka evaọ Zambia, ọkpako ukoko jọ nọ a re se Johnson Mwanza o kere nọ: “Inievo-emezae gbe emetẹ buobu a rẹ ta ẹsikpobi nọ, ‘orọnikọ Zoom nọ ukoko Jihova o hwosa fihọ na u bi si omai kẹle inievo mai ọvo ho, rekọ o be kẹ omai imuẹro nọ Jihova o you omai yọ ọ be ginẹ daezọ mai.’”

 Igho nọ ukoko na o ma omaa riẹ fihọ nọ a rẹ rọ dhogbo otẹrọnọ eware okpẹtu e via, eye a be jọ rehọ ugho rọ hwosa fihọ akanto Zoom na. Unevaze nọ a bi ru rọkẹ iruo akpọ-soso na ma be sai ro wo ugho yena. Ibuobu unevaze nana yọ enọ a be jọ donate.pr418.com. ru evaọ itanẹte. Ma yere owhai gaga rọkẹ unevaze nọ wha be hai ru ẹsikpobi, onọ u bi ru ei lọhọ nọ ma be sai ro ru iruo ogbodhẹ efa sa-sa wariẹ akpọ na họ.—2 Ahwo Kọrint 8:14.