Isẹri Jihova a rẹ daezọ epanọ eware e rrọ kẹ ibe eg’Ọghẹnẹ rai gaga. (1 Pita 2:17) Epanọ o rrọ oniọvo-ọmọtẹ jọ nọ a re se Tannis evaọ obọ Kenya oma, ere o rrọ omai ibuobu oma re. Ọ ta nọ, “O rẹ were omẹ gaga re mẹ riẹ oware nọ o be via kẹ inievo-emezae gbe erọ emetẹ mẹ nọ e rrọ akpọ na soso.” Ẹvẹ Tannis gbe Isẹri Jihova buobu efa a be rọ riẹ epanọ eware e rrọ kẹ ibe eg’Ọghẹnẹ rai. No anwọ 2013 ze, ma be hae rehọ Oria Iyẹrẹ nọ o rrọ jw.org mai ru onana.

 A re fi iyẹrẹ sa-sa nọ a re fievahọ nọ i kiekpahe Isẹri Jihova họ Oria Iyẹrẹ na. Iyẹrẹ wọhọ, Ebaibol nọ a siobọno, ogbo nọ a dhẹ fiki eware okpẹtu nọ e via, iruo ebabọ, gbe eware efa nọ i wuzou. A rẹ jariẹ vuẹ omai kpahe inievo mai nọ a fihọ ega fiki ẹrọwọ rai. A re je fi iriruo nọ i kiekpahe usi uwoma ota nọ e rẹ bọ ahwo ga gbe erọ Ekareghẹhọ uwhu Jesu họ etẹe. Amono a rẹ kiẹ iyẹrẹ nana riwi, kọ oghẹrẹ vẹ a bi ro kere ai?

 Ẹko-iruo nọ a re se Office of Public Information (OPI) oye o rẹ ruẹrẹ iyẹrẹ nọ a re fihọ Oria Iyẹrẹ na họ. Obọ ehri ukoko ẹko-iruo nana o rrọ, yọ a bi ru iruo evaọ otọ Ogbẹgwae Otu Ẹruọsa ọrọ Utu Ẹruorote na. Inievo-emezae gbe erọ emetẹ nọ i bu vi udhusoi (100) a bi ru iruo evaọ ẹko-iruo OPI na. Ibuobu rai yọ inievo nọ i bi ru iruo no obọ iwou rai ze. Ejọ rai yọ enọ i re kere iku na, enọ i re ru ekiakiẹ, enọ e rẹ drọ iwoho, gbe efefafa. Efa jọ yọ enọ e rẹ ta ẹme kugbe ahwo egọmeti, profẹsọ gbe iwuhrẹ isukulu, gbe ahwo awhusi. Ẹmẹko-iruo nọ a re se Public Information Desks (PID) nọ i bu vi udhone (80) soso nọ e rrọ iwou ogha sa-sa evaọ akpọ na a bi fiobọhọ kẹ OPI na.

 Re a kere iyẹrẹ ọvo, OPI avọ PID a re ru iruo kugbe. Nọ inievo na a tẹ ruẹ hayo yo iku nọ a rẹ sai kere kpahe, a rẹ kiẹ kpahe uzoẹme na gbe evuẹ nọ a rẹ sai fievahọ. A sae kiẹ ahwo sa-sa riwi. A tẹ kiẹ iku na ziezi jẹ ruẹ uzẹme na no, a ve kere iyẹrẹ na, sei ziezi jẹ kpọ eme nọ i fo nọ a rẹ kpọhọ họ. A ve fi iwoho họ iẹe, kẹsena a ve vi ei se Ogbẹgwae Otu Ẹruọsa na re a kuenu kẹe.

 Eme ibe eg’Ọghẹnẹ mai jọ a ta kpahe Oria Iyẹrẹ na? Oniọvo-ọmọtẹ jọ nọ a re se Cheryl evaọ obọ Philippines ọ ta nọ, “O rẹ were omẹ gaga re mẹ rehọ iyẹrẹ nọ me re se kpahe ukoko Jihova avọ ahwo riẹ ro mu okpẹdẹ mẹ họ.”

 Ahwo buobu a rẹ ta ẹme kpahe ohẹriẹ nọ o rrọ Oria Iyẹrẹ jw.org na avọ eware awhusi efa. Tatiana nọ ọ rrọ Kazakhstan ọ ta nọ: “Eva e be were omẹ kẹhẹ inọ mẹ rẹ sai fievahọ iyẹrẹ nọ e rrọ jw.org na. Orọnikọ a mu kere ai hi, u wo ẹjiroro nọ a ro kere ai.” Oniọvo-ọmọtẹ jọ nọ ọ rrọ Mexico nọ a re se Alma ọ ta nọ: “Iyẹrẹ jw.org na e wọhọ ikpehre iyẹrẹ nọ ma be hai yo evaọ iniuzu na ha, iyẹrẹ jw.org na e rẹ tuduhọ ohwo awọ gaga.”

 Orọnikọ iyẹrẹ jw.org yọ iyẹrẹ nọ ma rẹ sai fievahọ ọvo ho, i re je ru ẹrọwọ mai ga re. Bernard nọ ọ rrọ Kenya ọ ta nọ: “Oria Iyẹrẹ na u bi fiobọhọ kẹ omẹ rri inievo-emezae gbe erọ emetẹ nọ e rrọ akpọ na soso wọhọ uviuwou mẹ, ghelọ oria nọ ma rrọ kẹhẹ. Mẹ be sae fodẹ odẹ rai gbe uyero rai evaọ elẹ mẹ.” Oniọvo-ọmọtẹ jọ nọ a re se Bybron nọ ọ rrọ Kenya re ọ ta nọ: “Eva e rẹ were omẹ gaga oke kpobi nọ mẹ tẹ ruẹ uzoẹme nọ o ta kpahe Ebaibol ọkpokpọ nọ a siobọno evaọ ẹvẹrẹ ọfa! Onana o rẹ kareghẹhọ omẹ nọ Jihova o wo ọriẹwẹ hẹ.”

 Makọ iku nọ a jọ ta kpahe inievo mai nọ a bi kpokpo e sae tuduhọ omai awọ re. Jackline nọ ọ rrọ Kenya ọ ta nọ, “Oghẹrẹ nọ a ro kru udu ga nọ mẹ be hai roro kpahe u ru ẹrọwọ mẹ ga no. Ẹsikpobi mẹ rẹ daoma riẹ oware nọ u bi fiobọhọ kẹ ai thihakọ. Mẹ ruẹ no inọ eware nọ ahwo a re rri wọhọ emeware na i bi fiobọhọ kẹ inievo mai gaga. Eware wọhọ olẹ, Ebaibol nọ a re se, gbe makọ ile nọ a rẹ so dede.”

 Iyẹrẹ nọ a rẹ nẹ kpahe eware okpẹtu nọ e via na e rẹ were oniọvo-ọmọtẹ mai jọ nọ ọ rrọ Costa Rica nọ a re se Beatriz gaga. Ọ ta nọ: Oria Iyẹrẹ na u re fiobọhọ kẹ omẹ ruẹ epanọ ukoko mai na ọ be rọ dhogbo bru inievo mai vẹrẹ vẹrẹ, a ve fiobọhọ kẹ ae evaọ obọdẹ edhere nọ o vọ avọ uyoyou. Onana o kẹ omẹ imuẹro nọ ukoko Jihova na dẹẹ.”

 Eva e be were omai gaga inọ iyẹrẹ epanọ eware e rrọ kẹ inievo mai evaọ akpọ na soso i bi te omai obọ. Onana o sae lọhọ vievie ababọ okẹ unevaze nọ wha be kẹ fiki iruo akpọ soso na ha, onọ wha be mae rehọ donate.pr418.com ru na. Ma yere owhẹ gaga rọkẹ okẹ unevaze ra nọ whọ be kẹ ẹsikpobi na.