Eware okpẹtu e jọ eria sa-sa via evaọ ukpe 2020. Ukpe yena ọvona ẹyao COVID-19 nọ o kpe ahwo buobu na ọ rọ romavia evaọ akpọ na soso. Eme Isẹri Jihova a ru ro fiobọhọ kẹ ahwo nọ eware okpẹtu nana e via kẹ?

 Evaọ ukpe-iruo 2020, a Ogbẹgwae Otu Ẹruọsa ọrọ Utu Ẹruorote na o kẹ udu inọ a rehọ igho nọ i bu te edọla 28 million b fiobọhọ kẹ ahwo nọ eware okpẹtu e via kẹ. A rehọ igho nana fiobọhọ kẹ ahwo evaọ eria sa-sa nọ eware okpẹtu nọ i bu vi 200 e jọ via. Eware okpẹtu nana jọ họ, ẹgaga nọ ẹyao COVID-19 o wha ze, ifou ọwhibo nọ i fou evaọ eria sa-sa, owhe nọ ọ raha eware evaọ Africa, ohọo nọ u je mu evaọ Venezuela, gbe otọ nọ o ya fia evaọ Zimbabwe. Ma rehọ igho nọ wha rọ kẹ okẹ unevaze dẹ emu, ame, eware nọ a rẹ rọ bọ iwou, iwu, imu, gbe eware nọ a rẹ rọ wozẹ iwou. A bọ iwou kẹ ahwo jọ nọ iwou rai i kie totọ, jẹ ruẹrẹ erọ amọfa. Joma ta kpahe eware jọ nọ ma ru evaọ ogbo nọ ma dhẹ na.

 Ẹgaga nọ Ẹyao COVID-19 O Wha Ze. Inievo mai buobu evaọ akpọ na a ruẹ uye gaga fiki ẹyao nana nọ ọ nya akpọ re na. Ejọ e mọ ẹyao na, efa e jọ awawa, yọ uvuhu o jọ ejọ oma. Ma rehọ egbẹgwae ogbodhẹ nọ i bu vi 800 mu evaọ akpọ na soso re a fiobọhọ kẹ inievo itieye na. Egbẹgwae nana a rẹ daoma riẹ epanọ eware e rrọ kẹ inievo na, a ve kere se uwou ogha vẹrẹ vẹrẹ. Nọ iyẹrẹ na i je te Ogbẹgwae Otu Ẹruọsa na obọ, a vẹ riẹ oghẹrẹ nọ a re ro fiobọhọ kẹ ae.

 Evaọ ukpe na soso, egbẹgwae ogbodhẹ nọ a ro mu na a dẹ emu, ame, eware nọ a re ro ru iwou fo, gbe imu kẹ inievo nọ e rrọ eria sa-sa. Evaọ ewho jọ, inievo nọ e rrọ egbẹgwae ogbodhẹ na avọ ekpako ukoko a rọ uzou te uzou re a ruẹ nọ eware nọ egọmeti ọ be ghale kẹ ahwo i te inievo na obọ.

 Ahwo nọ a rrọ Isẹri Jihova ha a muẹrohọ eware nana. Ohwo ologbo egọmeti jọ nọ a re se Field Simwinga, evaọ ubrotọ Nakonde obọ Zambia, ọ ta kẹ inievo mai nọ: “Ma yere owhai nọ wha rọ dhogbo ze vẹrẹ vẹrẹ te kẹ iviuwou buobu eware nọ e kare rai. Obọ nọ wha fihọ kẹ ahwo mai o da omai ẹro fia.”

 Ohọo nọ U je Mu Evaọ Angola. Ẹyao COVID-19 nọ ọ jọ akpọ soso je vo na o wha riẹ ze nọ emu ọ gbẹ rọ jariẹ tere he evaọ Angola. U te ru nọ emu ọ rọ ghare gaga. Inievo mai buobu a jẹ sae dẹ emu nọ a rẹ re he.

 Fikiere, ma tẹ vuẹ uwou ogha Brazil re a fa emu se inievo mai nọ e rrọ obọ Angola. Re a gbe mu igho raha ha, inievo nọ e dhogbo na a jẹ gwọlọ eria nọ eware e jọ ku omojọ. A tẹ jẹ ma omaa epanọ a sae rọ wọ eware na te obọ Angola evaọ oghẹrẹ nọ a gbẹ rọ raha ugho ga hrọ họ. A jẹ dẹ emu buobu evaọ oria ovo re a sai si ugho no kẹ ae. Fikiere, nọ a tẹ ghale iẹe, unuigho nọ a rọ dẹ ẹkpa hayo ekatọno emu ọvo o ghare tere he, edọla 22 ọvo. Ẹkpa hayo ekatọno emu ọvo ọ gbẹdẹ te enwenọ ikilogramo udhe, yọ eware nọ e rẹ jariẹ eva họ, isikapa, ibisi, gbe ame epapa hayo ewhri. Ekpa hayo ekatọno emu nọ a fa kpohọ obei no taure ma te ti kere uzoẹme nana i te 33,544, yọ omarai kpobi e gbẹdẹ vi isimeti nọ e rẹ vọ itrela udhegbọvo (654 metric tons hayo 721 U.S. tons). A rehọ eware nana gbe efa nọ a jọ Angola dẹ ko ahwo nọ a bu vi 50,000!

 Ẹvẹ inievo mai a rri oware nana nọ a ru kẹ ae na? Oniọvo jọ nọ a re se Alexandre nọ ọ be rria ẹwho jọ nọ ọ rrọ obeva gaga evaọ Angola ọ ta nọ: “Onana o lẹliẹ omẹ riẹ nọ Jihova o you omẹ, yọ ọ rrọ kugbe omẹ. Ukoko Jihova o rọ omẹ zaharo ho!” Oniọvo-ọmọtẹ jọ nọ a re se Mariza nọ ọye ọvo ọ be yọrọ emọ riẹ ọ ta nọ: “Jihova o yo oviẹ mẹ. Me yere Jihova gbe inievo na gaga!”

 Uvo Ogaga nọ O Raha Eware Evaọ Zimbabwe. Evaọ ukpe-iruo 2020, ivo egaga e lẹliẹ otọ ya fia evaọ Zimbabwe. O tẹ wha uvuhu ogaga se ima ahwo buobu. Isẹri Jihova buobu evaọ Zimbabwe a jẹ sae ruẹ emu re kpohọ eva ha.

 A rehọ egbẹgwae ogbodhẹ isoi mu re a dẹ emu se inievo mai. Inievo efa buobu a te je fiobọhọ gaga. Ejọ i fi emu na họ ekpa gbe ekatọno, efa e wọ emu na fihọ imoto. Ejọ i tube siobọno imoto rai dede re a rehọ ae fa emu. c Evaọ ukpe-iruo 2020, ma rehọ igho nọ i bu te edọla 691,561 dẹ emu rọ ko ahwo nọ a bu vi 22,700!

 Evaọ ewho jọ, oke nọ a rọ fa emu ze na, yọ emu inievo jọ o re muotọ no. Nọ a ruẹ emu nọ a fa ze, a te je jiri Jihova. Ejọ dede e jẹ so ile ukoko na.

 Evaọ ẹwho jọ, inievo ivẹ mai jọ nọ ezae rai i whu no, a kpohọ ẹgwae jọ nọ a be te jọ ta ẹme kpahe eware nọ ahwo jọ a be te fa ze te ghale. Rekọ nọ a be gba ẹgwae na, ẹme na ọ tẹ be whomahọ ofẹ ivotu, inọ ahwo nọ a votu kẹ uzedhe ohwo jọ họ, a te ghale te ai hi. Inievo na a tẹ ta nọ a bi kpo keme a re votu hu. Nọ a be nyavrẹ na, a tẹ be rehọ ai se ẹkoko, yọ ahwo jọ a be ta kẹ ae nọ, “Wha dariẹ wo urru bru omai ziọ obọ uwou ha!” Rekọ nọ eka ivẹ ọvo e vrẹ no, inievo mai a tẹ fa emu ziọ ẹwho na. A tẹ kẹ inievo-emetẹ mai na emu. Emu nọ inievo na a fa ze o tube te ẹwho na kri no taure orọ ahwo edekọ na o te ti te obei!

 U te no ere no, oghẹrẹ nọ ahwo buobu a je rri Isẹri Jihova evaọ Zimbabwe u nwene nọ a ruẹ eware nọ ma ro se inievo na. Wọhọ oriruo, oniọvo jọ nọ a re se Prisca ọ be rria iwhre jọ. Evaọ oke nọ eware e rọ jọ gaga na, Prisca ọ jẹ hai kpohọ usi uwoma evaọ Edesa-Oka gbe Edisoi-Oka kpobi, makọ evaọ oke nọ a re ro ru idhu. Ahwo iwhre na a te je sei ẹkoko inọ: “Usi uwoma nọ whọ be ta na o te rọ ohọo kpe owhai.” Prisca ọ vẹ ta kẹ ae nọ: “Jihova ọ re nyasiọ idibo riẹ ba ẹdẹvo ho.” U kri hi, eware nọ ukoko o fa ze i te tei obọ. Onana u duobọte ahwo nọ a be rria kẹle iẹe te epanọ ejọ e jẹ rọ ta kẹe nọ: “Ọghẹnẹ ọ ginẹ nyasiọ owhẹ ba ha, fikiere ma gwọlọ wuhrẹ kpahe Ọghẹnẹ.” Obọnana imahrẹ nọ e be rria kẹle oniọvo na a be hae jọ iredio gaviezọ kẹ iwuhrẹ ukoko na.

 Nọ urere uyero-akpọ omuomu nana u bi si kẹle na, eware okpẹtu e te gbẹ via. (Matiu 24:3, 7) Okẹ unevaze rai o da omai ẹro fia, onọ wha be rọ idhere sa-sa nọ a jọ donate.pr418.com fodẹ na kẹ. Wha ruabọhọ iẹe. A be rọ igho nana fiobọhọ kẹ ahwo nọ eware okpẹtu e via kẹ evaọ ẹruoke.