Kamara kamara ma be hai siobọno ividio gbe eware efa evaọ JW Broadcasting, yọ onana o be were omai eva gaga. Rekọ inievo mai buobu evaọ Africa a sae jọ itanẹte rri ividio nana ha. Fikieme?

 Eria buobu evaọ Africa a wo itanẹte he. Makọ eria nọ itanẹte e rrọ, o rẹ raha oke re a tẹ te danlodu oware, yọ o rẹ jọ ghaghae. Wọhọ oriruo, ọsẹro okogho jọ evaọ obọ Madagascar nọ o kpohọ oria nọ a rẹ jọ danlodu eware re ọ danlodu JW Broadcasting amara jọ, okolo ugho a mi rie he. A mi rie edọla 16 (enwenọ ₦6500), ugho nọ ahwo jọ a be sae kọ evaọ oka soso ho! a

 Dede nọ inievo na a wo ẹbẹbẹ itanẹte, ima ahwo buobu evaọ Africa a be sai rri ividio JW Broadcasting enẹna ababọ itanẹte. Ẹvẹ a be sai ro ru onana?

 Anwọ 2017 ze, u wo oware jọ nọ ukoko Isẹri Jihova u ru re inievo nọ e rrọ erẹwho Africa buobu a sai rri ividio JW Broadcasting. Onana u ru nọ a rẹ sae rọ jọ etẹlẹvisiọno rri ividio mai ọvọvẹ, oke kpobi, te aso te uvo, kẹdẹ kẹdẹ. Yọ u wo evẹrẹ ikpegbezeza nọ whọ rẹ sai nwene iei kpohọ.

 Re a sai dhesẹ ividio mai evaọ etẹlẹvisiọno, ma hwosa kẹ ekọmpene nọ i re fi eware nọ ahwo a gwọlọ dhesẹ họ etẹlẹvisiọno. Enẹ ma ro wo oria jọ evaọ etẹlẹvisiọno (JW satellite channel) nọ a re jo rri ividio mai. Re ohwo ọ sai rri ividio ukoko na evaọ uwou riẹ, o re wo omodhe esatalaete. Onana yọ oware nọ o wọhọ omodhe ọkpakpala ọkẹkẹe nọ a re fihọ etegu, a ve si uwaya riẹ nyae thọrọ fihọ etẹlẹvisiọno. JW satellite channel na ọ be wha ividio mai te erẹwho ọgbagbisoi evaọ Africa. Ugho nọ ma be hwa fihọ iẹe kamara kamara u bu vi edọla 12,000 (enwenọ ₦5,000,000). Ẹmẹsejọ nọ a te bi ru oware jọ evaọ ukoko na nọ a gwọlọ jọ etẹlẹvisiọno dhesẹ, a rẹ jẹ hwa ugho ọfa re inievo mai a sai rri rie. Onana u ru nọ ahwo buobu a rẹ sai ro rri ikokohọ ilogbo hayo gaviezọ kẹ ẹme nọ oniọvo nọ a vi no obọ ehri ukoko ze ọ be ta.

 Ahwo buobu, makọ enọ e rrọ Isẹri Jihova ha a be jọ etẹlẹvisiọno rai rri ividio mai. Rekọ inievo mai buobu a wo ugho nọ a rẹ rọ dẹ esatalaete gbe eware nọ a re ro rri ividio na ha. Fikiere, a te fi esatalaete họ Egwa Uvie nọ i bu vi idu esa gbe egba ezeza gbe udhosa-gbikpe (3,670) re inievo mai a sai rri ividio JW Broadcasting evaọ obọ Ọgwa Uvie. Otẹrọnọ Ọgwa Uvie o wo etẹlẹvisiọno hayo oware nọ a rẹ rọ jọ ugbẹhẹ rri ividio (iprojẹktọ) no vẹre, ugho nọ a re ro fi esatalaete họ iẹe, te ekwakwa riẹ kpobi, gbe ugho nọ a rẹ rọ fa eware na ze, u re te enwenọ edọla 70 (₦28,000). Otẹrọnọ Ọgwa Uvie o wo etẹlẹvisiọno hayo iprojẹktọ vẹre he, ugho nọ a rẹ rọ dẹ ekwakwa esatalaete na kpobi o sai te edọla 530 (₦216,000) soso.

 Oware nana nọ ukoko Jihova u ru na o be were inievo mai gaga. Ọkpako ukoko jọ evaọ obọ Cameroon ọ ta nọ: “O wọhọ emana nọ o te uviuwou mẹ obọ evaọ udhude nọ o ya fia.” Oniọvo-ọmọzae jọ nọ a re se Odebode nọ ọ rrọ Nigeria ọ ta nọ: “Isiasa ẹkpoka ma rẹ jọ uviuwou mai rri ividio ukoko na. Emọ mẹ a rẹ gwọlọ nọ ẹdẹ nọ ma re ro rri rie na o te vẹrẹ. O make rrọ ẹdẹ yena dede he, a rẹ ta nọ ma rri ividio ukoko na.” Oniọvo-ọmọtẹ nọ a re se Rose nọ ọ rrọ Nigeria re, ọ ta nọ: “Eva e be were omẹ gaga inọ ividio JW Broadcasting na họ enọ e be mae were omẹ enẹna. Vẹre vẹre, usi nọ a be hai whowho evaọ etẹlẹvisiọno, mẹ jẹ hae gaviezọ kẹ ẹsikpobi. Eware nọ a re dhesẹ e rẹ lẹliẹ eva dha omẹ krekrekre. Ẹwẹ mẹ o gbe t’otọ t’ehru hu. Rekọ ividio JW Broadcasting e rẹ lẹliẹ udu te omẹ otọ je wuhrẹ omẹ emamọ eware buobu. Eye mẹ be mai rri enẹna. Oghale ulogbo Jihova ọ kẹ omai na.”

 Ọsẹro okogho jọ evaọ obọ Mozambique ọ ta nọ a fi esatalaete họ Egwa Uvie buobu evaọ okogho nọ ọ rrọ. Onana u ru nọ inievo na a rẹ rọ kaki te obọ Ọgwa Uvie re a ruẹsi rri ividio JW Broadcasting. A re te obei auwa ọvo hayo tubẹ vrẹ ere taure ewuhrẹ o te ti muhọ.

 Evaọ 2019, a ru okokohọ akpọ-soso evaọ Johannesburg, obọ South Africa. Esatalaete a ro whowho igogo eme jọ nọ a ru evaọ okokohọ na, te enọ omọvo Utu Ẹruorote na jọ o ru. Yọ eria izii inievo mai a jọ gaviezọ kẹ okokohọ na. Oniọvo jọ nọ a re se Sphumelele, nọ o bi ru iruo evaọ uwou ogha obọ South Africa ọ ta nọ: “Itanẹte ma jẹ hai ro ru ikokohọ itienana vẹre. Rekọ re ma sai ru ei, o gwọlọ nọ itanẹte na ọ rẹ ga ziezi, yọ ma rẹ hwosa fihọ iẹe. Ugho nọ ma hwa re inievo na a sae jọ esatalaete ruẹ okokohọ na u kpotọ vi onọ ma hae te hwa fihọ itanẹte, yọ esatalaete o wo ẹgba vi itanẹte.”

 Fiki okẹ unevaze rai, oye inievo mai buobu evaọ Africa a be sae rọ jọ etẹlẹvisiọno rri ividio JW Broadcasting. Wọhọ epanọ ma ta no na, esatalaete (JW satellite channel) a be sai ro ru onana. Ma yere owhai gaga nọ wha be rọ rehọ idhere sa-sa nọ a fodẹ evaọ donate.pr418.com kẹ okẹ unevaze.