Evaọ Iyẹrẹ 2020 nọ I No Obọ Utu Ẹruorote na Ze, Ọrọ avọ 6, Brọda Geoffrey Jackson ọ nọ inọ: “Evaọ ikpe jọ nọ e vrẹ na, ono o roro nọ ma rẹ sai wo ebe gbe ividio mai evaọ itanẹte?” Kọ who gine roro nọ ma sai ru oware utioye na oke yena? Brọda Jackson ọ ta re nọ: “Kọ ẹvẹ ma hai ru evaọ etoke nana nọ ẹyao COVID-19 ọ rọ da oria kpobi fia na, o gbẹ rrọ JW Library nọ ma wo ho? O rrọ vevẹ nọ Jihova ọ be ruẹrẹ omai kpahe anwẹdẹ rọkẹ oke utionana.”

 Ẹvẹ Jihova ọ be rọ ruẹrẹ omai kpahe anwẹdẹ? Ẹvẹ a ro ru JW Library na? Kọ ẹvẹ ukoko na o be rọ rẹrote JW Library na je fi eware ekpokpọ họ iẹe?

 Evaọ Asoi 2013, Utu Ẹruorote na o ta kẹ inievo nọ e rrọ ẹko-iruo MEPS Programming ru iruo evaọ obọ ehri ukoko inọ jọ a ru oware jọ nọ a ti fihọ evaọ ekọmputa kẹ akpọ kpobi. Ma ve ti fi Ebaibol Efafa Akpọ Ọkpokpọ ọrọ Oyibo nọ a wariẹ fa na họ iẹe kẹ ahwo kpobi. Oniọvo nọ a re se Paul Willies nọ ọ rrọ MEPS Programming ọ ta nọ: “Ma ri ru oware utioye na ẹdẹvo ho. Rekọ nọ a vuẹ omai no, ma te se inievo jọ koko, kpairoro vrẹ iruo jọ nọ e jọ omai obọ vẹre, jẹ ta kẹ inievo nọ e rrọ eko-iruo efa inọ jọ a fiobọhọ. Ere ma ro ru JW Library na je fi eware họ iẹe eva. Nọ ma je ru ei na, ma jẹ lẹ gaga. Jihova o gine fiobọhọ kẹ omai keme emerae isoi ọvo ma ro ru ei re, kẹsena a te siobọnoi evaọ ẹgwae ẹgbukpe.”

 Okpiruo ofa nọ o jọ otọ kẹ omai họ, epanọ ma sai ro ru JW Library na evaọ oghẹrẹ nọ a sai ro fi ebe buobu họ iẹe, te erọ evẹrẹ efa. No oke yena rite Ọvo 2015 yọ a fi enwenọ ebe ukoko kpobi nọ a kere kẹle na evaọ Oyibo họ JW Library na no. Kẹsena ma tẹ rọ emerae ezeza ọvo fi ebe evẹrẹ efa buobu họ iẹe nọ ahwo a rẹ sae danlodu.

 Anwọ oke yena ze, inievo na a fi eware buobu họ iẹe no je ru ei fihọ epanọ a sae rọ rehọ iẹe ru ekiakiẹ lọlọhọ. A fi ividio họ iẹe je fi eware nọ a re ro ru iwuhrẹ ukoko họ oria ovo. A te je ru ei evaọ oghẹrẹ nọ, whọ tẹ rọ obọ te owọ Ebaibol jọ, o ve dhesẹ ebe ukoko na nọ e ta kpahe oria Ebaibol yena nọ e rrọ Obe Ekiakiẹ kẹ owhẹ.

 Kẹdẹ kẹdẹ ahwo a be rọ egheghẹrẹ ifonu, etablẹte gbe ekọmputa nọ i bu te ima eree (8,000,000) rovie JW Library, yọ enọ a bi ro roviei kamara kamara i bu vi ima ikpegbisoi (15,000,000) soso! Kọ eme ma bi ru re JW Library na ọ sai rovie ziezi evaọ egheghẹrẹ ifonu, etablẹte gbe ekọmputa yena kpobi? Brọda Willies ọ ta nọ: “Oghẹrẹ eware itieye nọ a re ru fihọ ekọmputa na, orọnikọ a tẹ nwani ru ai no yọ u re no ho. Ẹsikpobi ma be jariẹ nwene eware je fi eware ekpokpọ bae je ru onaa họ iẹe re ahwo a sae rehọ iẹe ru ekiakiẹ gbe eware efa lọlọhọ. Ẹsikpobi ekọmpene nọ i re ku ekọmputa, etablẹte gbe ifonu a re nwene eware nọ a re fihọ ae eva, nọ e rẹ lẹliẹ ae ru iruo. Fikiere ma rẹ jọ JW Library na nwene eware jọ no oke te oke re a gbẹ sae jọ ekwakwa itieye na rovie JW Library na. U te no ere no, ebe, ividio gbe erọ ikporakporo nọ ma bi fihọ JW Library na i bi dhe ebuebu. Fikiere ma be hae jọ JW Library na ru eware jọ re eware ekpokpọ na kpobi e hae ruọ ẹe eva.” Ma te kele eware kpobi evaọ evẹrẹ sa-sa nọ e rrọ JW Library na obọnana, ebe nọ e riẹe i bu te oware wọhọ idu egba ivẹ (200,000), yọ ividio gbe eware nọ a re kporo ọvo i bu vi idu egba ezeza (600,000)!

 Re JW Library na ọ sai ru iruo ziezi, orọnikọ ekọmputa nọ ma be dẹ ọvo ma be raha ugho fihọ họ. U wo eware sa-sa nọ e rẹ jọ ekọmputa ru iruo nọ ma be hwa igho fihọ. Kukpe kukpe, igho nọ ma rẹ hwa fihọ eware nana ọvuọvo i bu te edọla 1,500. U te no ere no, kukpe kukpe ẹko-iruo MEPS Programming a be hwa enwenọ edọla 10,000 kẹ ekọmpene sa-sa nọ i re ku ifonu, etablẹte, gbe ekọmputa, re JW Library na ọ sai ru iruo ziezi.

 JW Library nọ ma wo na u ru nọ ugho nọ ma bi ro printi ebe, ta ewẹ-ebe na kugbe, jẹ fa ebe na se ahwo u ro kpotọ gaga no. Wọhọ oriruo, evaọ 2013, emebe Ẹkiẹriwo Ikereakere na Kẹdẹ Kẹdẹ nọ ma printi i bu te enwenọ ima ikpegbivẹ (12,000,000). Rekọ evaọ 2020, ma te printi emebe na ima isoi ọvo dede nọ iwhowho-uvie ekpokpọ nọ ma wo evaọ akpọ na soso i bu te enwenọ idu ihrẹ (700,000). Fikieme enọ ma printi evaọ ukpe yena e rọ kawo tere? JW Library inievo buobu a bi jo se obe okpẹdẹ rai enẹna. a

 JW Library na o bi fiobọhọ kẹ ahwo gaga. Geneviève nọ ọ be rria obọ Canada ọ ta nọ fiki JW Library ọ be sai ro wuhrẹ Ebaibol na kẹse kẹse. Ọ ta nọ: “Re a ta uzẹme, o hae jọ nọ mẹ rẹ wọ ebe buobu lahwe taure me te ti wuhrẹ Ebaibol, u mu omẹ ẹro nọ mẹ hae te sai wuhrẹ kohiohiẹ kohiohiẹ hẹ. Rekọ mẹ tẹ nwane tọlọ etablẹte mẹ yọ ebe na kpobi e rrọ omẹ obọ no keme JW Library ọ riẹe eva. Ebaibol nọ mẹ be hai wuhrẹ kẹse kẹse na o lẹliẹ ẹrọwọ mẹ ga ziezi no. U te je si omẹ kẹle Jihova gaga no.”

 JW Library na o fiobọhọ kẹ ahwo gaga no maero kọ evaọ etoke ẹyao COVID-19 na. Charlyn nọ ọ be rria obọ America ọ ta nọ: “Anwọ ẹgbukpe gbọ nọ ẹyao na ọ rọ da oria kpobi fia na, evaọ usu ebe nọ a siobọno kẹle na, ọvuọvo nọ a printi u ri te omẹ obọ họ. Rekọ JW Library ma bi ro wuhrẹ Ebaibol yọ u bi fiobọhọ kẹ omai gọ Jihova. Me yere Jihova kẹ okẹ oghaghae nana.”

 Oniọvo nọ a re se Faye nọ ọ be rria obọ Philippines ọ ta oware nọ o rrọ ahwo buobu eva, inọ: “JW Library na ma bi ro ru oware kpobi enẹna. Etẹe ma re jo se Ebaibol gbe obe okpẹdẹ evaọ irioke. Etẹe me re jo kporo ile gbe eware sa-sa nọ me te bi ru iruo evaọ uwou. Etẹe mẹ rẹ jọ ruẹrẹ oma kpahe kẹ iwuhrẹ ukoko. Etẹe ọvona mẹ rẹ jọ ruẹrẹ oma kpahe taure me te ti wuhrẹ ohwo Ebaibol. Mẹ tẹ rrọ uhie be hẹrẹ, etẹe me re jo se obe jọ hayo Ebaibol na. JW Library na o woma wo umuo ho.”

 JW Library na o bi fiobọhọ gaga re evaọ usi uwoma ota na. Wọhọ oriruo, ẹdẹ jọ nọ inievo-emetẹ ivẹ jọ a jọ usi uwoma evaọ obọ Cameroon, ọjọ evaọ usu rai o te se oria Ebaibol jọ nọ o were oniọvo ọdekọ na gaga. Nọ eka jọ e vrẹ no, oniọvo ọdekọ na ọ tẹ jẹ gwọlọ se oria na kẹ ohwo jọ, rekọ ọ gbẹ kareghẹhọ oria na ha. Oniọvo na ọ ta nọ: “Oware nọ Ọghẹnẹ o re ru na, mẹ kareghẹhọ eme jọ evaọ oria Ebaibol na. Me te rovie JW Library na, me te kpohọ Ebaibol. Me te kere eme nọ mẹ kareghẹhọ na fihọ oria nọ a rẹ jọ gwọlọ eware na. Ere mẹ rọ ruẹ oria Ebaibol na. JW Library na o bi fiobọhọ kẹ omẹ ruẹ eria Ebaibol buobu nọ e rẹ thọrọ omẹ ẹro ẹsejọ.”

 Okẹ unevaze nọ wha be rọ idhere sa-sa nọ a fodẹ evaọ donate.pr418.com ru na i bi fiobọhọ gaga. Eye i ru nọ ma sai ro ru JW Library na, be rẹrotei, je fi eware ekpokpọ họ iẹe kẹ inievo mai kpobi nọ e rrọ eria sa-sa akpọ na. Wha kobiruo rọkẹ ọghọ nọ wha bi ru.

1. Akpe 2013—A siobọno JW Library na avọ Ebaibol Efafa Akpọ Ọkpokpọ ọrọ Oyibo nọ a wariẹ fa nọ a fihọ iẹe eva

2. Ọvo 2015—A fi ebe Oyibo efa họ iẹe, kẹsena a te fi ebe buobu erọ evẹrẹ efa họ iẹe

3. Akpegbọvo 2015—A ru rie oghẹrẹ nọ whọ sae rọ rehọ ekọlọ kpe oka họ oria kpobi nọ whọ gwọlọ

4. Asoi 2016—A fi eware nọ a re ro ru ewuhrẹ ukoko họ oria ovo

5. Asoi 2017—A fi oria jọ họ iẹe nọ whọ rẹ sai kere eme fihọ

6. Akpegbivẹ 2017—A fi oria nọ whọ rẹ jọ ruẹ eware Study Bible họ iẹe

7. Asa 2019—A ru rie re ahwo a sae jariẹ danlodu eware nọ a re kporo, rri ividio, jẹ jọ Ebaibol ruẹ ebe nọ e rrọ Obe Ekiakiẹ na

8. Ọvo 2021—A fi obe Reawere Uzuazọ Bẹdẹ Bẹdẹ! họ iẹe avọ emamọ eware sa-sa nọ a ru fihọ obe na