OWARE NỌ U RO WUZOU: Nọ ọmọ-uwuhrẹ ọ tẹ ruẹrẹ oma kpahe ziezi, o re wo otoriẹ oware nọ a bi wuhrẹ na jẹ kareghẹhọ iẹe. Epanọ a wo otoriẹ jẹ kareghẹhọ oware nọ a bi wuhrẹ ai te, ere a re wo ẹnyaharo vẹrẹ te re. Nọ a tẹ make họ-ame no, a rẹ gbẹ ruẹrẹ oma kpahe kẹ iwuhrẹ gbe usiuwoma ghele re a sae “ruabọhọ erou.” (Mt 25:13) Ofariẹ, a tẹ riẹ oghẹrẹ nọ a rẹ ruẹrẹ oma kpahe jẹ be hai ru ei kẹse kẹse, u ti fiobọhọ kẹ ai evaọ edẹ uzuazọ rai kpobi. Fikiere, no emuhọ ze ma re ro wuhrẹ ai oghẹrẹ nọ a rẹ rọ ruẹrẹ oma kpahe kẹ ewuhrẹ na re o reria ai oma.

EPANỌ A RE RO RU EI:

• Jọ emamọ oriruo. (Rom 2:21) Ruẹrẹ oma kpahe kẹ uwuhrẹ kpobi avọ ọmọ-uwuhrẹ na nọ who re wo họ iroro. (km 11/15 3) Dhesẹ obe ra nọ who si usi họ iyo enọ na kẹe

• Tuduhọ iẹe awọ re ọ ruẹrẹ oma kpahe. Uwuhrẹ na o tẹ nwane dowọ muotọ no, vuẹe nọ re ọ ruẹrẹ oma kpahe yọ abọjọ uwuhrẹ Ebaibol na, gbe irere nọ i ti noi ze. Vuẹe oware nọ o re ru re o wo oke nọ ọ rẹ rọ ruẹrẹ oma kpahe kẹ uwuhrẹ na. Inievo jọ a rẹ rọ obe rai nọ a si usi họ kẹ ọmọ-uwuhrẹ na nọ a te bi wuhrẹ kugbei re ọ ruẹ epanọ usi nọ a re si họ iyo enọ u woma te. Oke kpobi nọ ọ ruẹrẹ oma kpahe, jiri iei ziezi

• Dhesẹ epanọ a rẹ ruẹrẹ oma kpahe kẹe. Inievo jọ a rẹ rọ oke ewuhrẹ jọ soso wuhrẹ ọmọ-uwuhrẹ rai epanọ a rẹ ruẹrẹ oma kpahe kẹ uwuhrẹ na