UZUAZỌ OLELEIKRISTI

Fiobọhọ kẹ Ahwo nọ A Rrọ Egagọ Ọvuọvo Ho re A Riẹ Ọnọ Ọ Ma Rai

KPORO

Kọ o rẹ dina jọ bẹbẹ kẹ owhẹ re whọ ta usi uwoma kẹ ahwo nọ a rrọ egagọ ọvuọvo ho, bi roro nọ a te gaviezọ họ? O tẹ rrọ ere, kareghẹhọ nọ ahwo nọ a rrọ uvumọ egagọ họ, makọ enọ e rọwo Ọghẹnẹ hẹ dede, a zihe ruọ Isẹri Jihova no. Evaọ ẹsibuobu, oware nọ u fiobọhọ kẹ ae kpobi họ, nọ a romatotọ kiẹ kpahe eware nọ i dhesẹ nọ Ọghẹnẹ ọ rrọ.—Rom 1:20; 10:14.

WHA RRI IVIDIO NA KAREGHẸHỌ NỌ AHWO NỌ A WO ẸRỌWỌ HỌ A SAI WO ẸRỌWỌ!—AHWO NỌ A RRỌ UVUMỌ EGAGỌ HỌ, KẸSENA WHA VẸ KUYO ONỌ NANA:

Ẹvẹ iku Tommaso na i ro fiobọhọ kẹ owhẹ riẹ nọ emamọ iyẹrẹ i re noi ze nọ whọ tẹ ta usi uwoma kẹ ahwo nọ a rrọ uvumọ egagọ họ?

Uyo ra

Epanọ a re ro ru ei

Nọ ohwo ọ tẹ ta nọ ọ rọwo nọ Ọghẹnẹ ọ rrọ họ, lele iei ta ẹme wolẹ, ma ẹme ra te ziezi, jẹ daoma riẹ oware nọ o wha riẹ ze nọ o ro rri ẹme na ere. (2Ti 2:24) Ta kpahe eware nọ who viẹro nọ i ti duobọtei. Kọ ohwo na ọ gwọlọ riẹ oware nọ o soriẹ nọ ahwo buobu a rọ rọwo nọ Ọghẹnẹ họ Ọnọ ọ ma eware kpobi? O tẹ rrọ ere, rọ ebe gbe ividio nọ a ru kẹ oghẹrẹ ahwo itieye na lele iei ta ẹme. A fi ibroshọ ivẹ nana, Was Life Created? gbe The Origin of Life—Five Questions Worth Asking họ oria Ẹkpẹti Ekwakwa Ewuhrẹ mai na no, re ma sae ruẹ e rai lọlọhọ.

Ẹsejọhọ nọ whọ tẹ nyaku ohwo nọ ọ rọwo nọ Ọghẹnẹ ọ rrọ họ, o te ruọ owhẹ oma ha re whọ jọ Ebaibol dhesẹ uzẹme ẹme na kẹe. Kọ u gbe ti woma re whọ ta kẹ oniọvo jọ nọ ọ riẹ usi uwoma ẹta ziezi re o fiobọhọ kẹ owhẹ? Kareghẹhọ re inọ, Jihova ọ sai fiobọhọ kẹ omai ta ẹme nọ o re duobọte ahwo nọ a wo emamọ eva, o tẹ make rọnọ evaọ oke ọsosuọ a rọwo nọ Ọghẹnẹ ọ rrọ họ. —Iru 13:48.