Ikere-ure obọ Japan jọ i re bo gaga, yọ o sae wọhọ nọ edo gheghe a bi ru. Erọ ezae họ enọ i re bo. Rekọ dede nọ enọ i bi bo evaọ oria ovo e rrọ buobu, a sai vuhu edo rai ọvuọvo keme i re wo ohẹriẹ. Evaọ Japan, ahwo nọ a bi ru ekiakiẹ kpahe ikere nana a ta nọ ikere ezae nọ e rrọ oria i wo oghẹrẹ onaa jọ nọ i re ro bo se erọ eyae.

 Roro kpahe onana: Ikere-ure obọ Japan, erọ ezae i re bo re erọ eyae e sae nyabru ai ze. Uvou rai edo na o re no ze, yọ a re fu egba rai fihọ ruaro re edo na ọ sae rua ziezi.

 Ẹvẹ a sai ro vuhu edo ọrọ ọzae jọ no erọ ezae efa? Ahwo nọ a re ru ekiakiẹ a ruẹ nọ ukpenọ ikere na i bo whọhọ whọhọ, ikere nọ e rrọ ure ọvo i re bo oghẹrẹ ọvona rekọ enọ e rrọ ire efa e rẹ hẹrẹ bọo okenọ u re te ae re a te ti bo. Oghẹrẹ nana nọ a re ro bo na o rẹ whae ze nọ a gbe ro bo ruru ohwohwo ho, ukpoye edo rai o rẹ jọ vevẹ, yọ o rẹ gbẹ kake bẹ ae no ho. Ofariẹ, nọ orọnọ ikere na e rẹ hẹrẹ ohwohwo bẹsenọ u re te oke rai re a te ti bo na, a sai serihọ.

 Fiki oghẹrẹ nọ ikere-ure obọ Japan na i re ro bo avọ onaa re edo rai o koko oma họ na, egba-eriariẹ nọ i bi ru iruo evaọ ofẹ itanẹte, gbe eware nọ a rẹ rọ ta ẹme je vi uwou se ohwo, a be daoma ru eware nọ a sae rọ ta ẹme je vi uwou se ohwohwo lọlọhọ. Onana o te whae ze nọ eware nọ a rẹ rọ ta ẹme je vi uwou i ti ro woma vi epaọ anwẹdẹ, yọ e te rehọ ẹgba ẹlẹtriki tere he.

 Ẹvẹ who roro? Kọ oghẹrẹ nọ ikere-ure obọ Japan i re ro bo avọ onaa re edo rai o koko oma họ na u mu romavia? Manikọ ẹma a ma riẹ?