Ekiotọ-eriariẹ a ta nọ arakọ ọ sae rọ inwe riẹ riẹ epanọ arakọ ọfa ọ kpako te no, sọ arakọ na ọrọ ọzae hayo ọrọ aye, gbe oware nọ arakọ ọfa ọ gwọlọ ru. A rẹ sai je wuhrẹ erakọ epanọ a sai ro se ore oria nọ ebọmbo gbe imu egaga e rrọ. Ubiẹro ahwo-akpọ a rẹ rọ ruẹ oware nọ e wariẹ e rai họ, rekọ ore erakọ a rẹ rọ riẹ oware nọ o wariẹ e rai họ. Inwe a re ro se ore na.

 Roro kpahe onana: Oghẹrẹ nọ arakọ ọ rẹ rọ rehọ inwe riẹ se ore u woma vi orọ ohwo-akpọ thethabọ. Wọhọ epanọ U.S. National Institute of Standards and Technology o ta, arakọ “ọ rẹ sai se ore oware nọ o rrọ udevie eware buobu gbidi gbidi. Onana o nwane wọhọ ẹsenọ a ku ubro ugẹji isugẹ fihọ ame nọ ọ vọ iswiminpulu ologbo, nọ ohwo ọ tẹ dawo iẹe ọ vẹ riẹ nọ a fi isugẹ họ iẹe.”

 Eme o wha riẹ ze nọ inwe arakọ nọ o re ro se ore i ro woma vi orọ ohwo-akpọ thethabọ?

•   Inwe arakọ e rẹ jọ vuavo, fikiere ọ rẹ sai se ore eware nọ e rrọ kakao dede.

•   Ighogho ivẹ e rrọ inwe arakọ, ọ rẹ rọ ọvo wẹ, ọ vẹ rọ ọnọ o kiọkọ se ore. Nọ arakọ o te si-inwe, ẹwẹ ọ vẹ ruọ imighogho inwe nọ o re ro se ore na.

•   Oria nọ o rrọ inwe arakọ nọ o re ro se ore na o rẹ sai theri te oware wọhọ irula ivẹ, rekọ orọ ohwo-akpọ o theri te ubro irula dede he.

•   Imighogho nọ e rrọ inwe arakọ nọ o re ro se ore na e rọ akwa udhuvẹ-gbikpe bu vi erọ ohwo-akpọ.

 Eware nana kpobi na i re ru nọ arakọ ọ sai ro se ore je vuhu oghoghẹrẹ ore sa-sa nọ o rrọ oria. Wọhọ oriruo, ma rẹ sai se ore izuwo, rekọ wọhọ epanọ egba-eriariẹ jọ a ta, arakọ ọ rẹ sai se ore eware sa-sa nọ a ro there izuwo na.

 Egba-eriariẹ jọ evaọ Pine Street Foundation, a ta nọ ẹvori gbe inwe arakọ i re ruiruo kugbe, fikiere inwe arakọ yọ “okwakwa nọ a rẹ mai ro se ore evaọ akpọ na soso.” Egba-eriariẹ a be daoma gwọlọ ku ekwakwa nọ e rẹ sai se ore je vuhu eware wọhọ ebọmbo, eware nọ a rẹ lẹliẹ wha ruọ oria, gbe eyao sa-sa wọhọ ọta.

 Kọ ẹvẹ who roro? Kọ inwe arakọ nọ o re ro se ore na i hrerẹ ze? Manikọ ẹma a ma riẹ?