KỌ ẸMA A MA RIẸ?
Oghẹrẹ nọ Dolphin Ọ rẹ rọ Rehọ Edo Vuhu Eware Sa-sa
Eri nọ a re se Dolphin na o re ru oghoghẹrẹ edo sa-sa, ọ vẹ gaviezọ kẹ edo nọ o ti zihe bru ei ze nọ u re fiobọhọ kẹe riẹ oria nọ ọ rẹ nya evaọ ame na, o ve je vuhu eware nọ e rrọ ame na. Egba-eriariẹ a nabi muẹrohọ oghẹrẹ nọ dolphin nọ unwe riẹ o wọhọ ọgọ na (Tursiops truncatus) o re ro vuhu oghẹrẹ edo sa-sa, a te bi ku eware nọ i re ru edo nọ a sai ro vuhu eware sa-sa nọ e rrọ obotọ ame.
Roro Kpahe Onana: Edo nọ dolphin o re ru u re fiobọhọ kẹe ruẹ emeri nọ o dhere ẹkpẹ evaọ obotọ abade, ọ vẹ jẹ riẹ ohẹriẹ nọ o rrọ emeri gbe utho. Wọhọ epanọ Keith Brown nọ ọ joma te ọkwa Profẹsọ no evaọ iyunivasiti Heriot-Watt evaọ Edinburgh, Scotland ọ ta, dolphin o re je “vuhu ohẹriẹ nọ o rrọ ugbogbo nọ emamọ ame ọ rrọ, ọnọ ame uwhei, hayo epẹtiro hayo oware ofa o rrọ, o tẹ make rọnọ ugbogbo na o rehọ enwenọ irula ọgbagbesa [32.8 ft] thabọ no oria nọ ọ rrọ.” Egba-eriariẹ a be gwọlọ epanọ a re ro ku eware nọ e rẹ sai ru ọkpọ oware ovona.
Igbogbo na e tẹ make rehọ enwenọ irula ọgbagbesa thabọ no oria nọ ọ rrọ
Ekiotọ a romatotọ rri oghẹrẹ nọ dolphin o re ro ru edo je yo edo nọ o zihe bru rie ze, a tẹ daoma ku oware nọ u re ru epọvo na. A rehọ iwhaya gbe ekwakwa ẹlẹtriki sa-sa ro ku oware na, a te fi ei họ eva oware ugheghelie jọ nọ u theri te oware wọhọ irula esa (3.3 ft). A wọ oware nana fihọ erọbọto nọ ọ rẹ sai no oria ruọ oria evaọ obotọ ame re a rehọ iẹe kiẹ eware nọ e rrọ obotọ ẹkpẹ abade na, eware wọhọ iwhaya, hayo ekpọ eyọno, u ve dhesẹ oghẹrẹ nọ eware na e rrọ dede nọ okwakwa nọ a ku na u te eware na oma ha. Ahwo nọ a bi ku ekwakwa nana a ruẹ nọ i ti wo iruo kẹ ekọmpene nọ i re ru ọyẹle gbe epẹtiro. Ekwakwa ẹlẹtriki nana nọ a rri dolphin ro ku na i woma vi erọ anwẹdẹ nọ a bi ku, keme i ti fiobọhọ kẹ ahwo nọ a te rehọ ae ru iruo muẹrohọ eware buobu nọ a jẹ sai muẹrohọ vẹre he. I ti fiobọhọ kẹ ae riẹ oria nọ o mai woma nọ a re fi ekwakwa iruo rai họ evaọ obotọ ame na, jẹ ruẹ eria nọ e jarai raha, makọ emeria kakao nọ e va evaọ awọ ipila ekwakwa nọ a re ro se ọyẹle evaọ obotọ ame, gbe ekpọ ọyẹle nọ i fi di.
Ẹvẹ Who Roro? Kọ oghẹrẹ nọ dolphin nọ unwe riẹ o wọhọ ọgọ na ọ rẹ rọ rehọ edo vuhu eware sa-sa, u mu romavia? Manikọ ẹma a ma riẹ?