Emera sa-sa nọ e rẹ tamu okọ evaọ obotọ ame e rẹ kẹ ahwo nọ a re bi ekọ ilogbo uye gaga. Emera nana i re ru nọ okọ u gbe ro bi siawọ tere he, e rẹ liẹliẹ okọ re efuẹle vrẹta, yọ o rẹ jẹ gwọlọ nọ a wọ ekọ na fihọ okpa re a fọrọ emera na no otọ rai, nọ a te gbe imikpe jọ homa. Ekiotọ-eriariẹ a be daoma wuhrẹ kpahe emama, re a riẹ oghẹrẹ nọ a sai ro si ẹbẹbẹ nana notọ.

 Roro kpahe onana: Ekiakiẹ nọ a ru i dhesẹ nọ ohọrọ iweli jọ nọ a re se Globicephala melas u re ru omariẹ fo. Ohọrọ na u wo emegọdọ esese nọ ubiẹro o rẹ sae ruẹ hẹ, onọ u ru rie rrọ kpakre kpakre. Fiki onana, emọ emera nọ e rẹ tamu otọ okọ na e rẹ sae ruẹ oria kru daji hi. Ame ọgbogbodo jọ o re je su no oma iwheli na ze ruọ emegọdọ nọ e rrọ ohọroma na nọ u re kpe oghẹrẹ emera sa-sa nọ e rẹ gwọlọ tamu ohọrọ iwheli na. Oke kpobi nọ iwheli na o te bi nwene ovioma riẹ, o re su ame ọkpokpọ fihọ emegọdọ nọ e rrọ ohọroma na.

 Ekiotọ-eriariẹ a be gwọlọ epanọ a re ro ku obotọ ekọ evaọ oghẹrẹ nọ i re ro ru omarai fo wọhọ ohọrọ iwheli. Evaọ okenọ u kpemu, oghẹrẹ ọda nọ emera e rẹ sae tamu hu a jẹ hae rọ ralọ obotọ ekọ. Dede na, egọmeti o fi uzi họ inọ a gbẹ rọ oghẹrẹ ọda yena ralọ otọ ekọ họ keme o be wha ẹbẹbẹ se emama buobu nọ e rrọ abade. Ekiotọ-eriariẹ na a ta nọ ẹbẹbẹ nana ọ te gbẹ jariẹ hẹ nọ a te ru enẹte ayọno nọ o wo ighogho esese gaga fihọ otọ okọ, avọ ekẹmika nọ ọ rẹ sae wha enwoma se emama abade he nọ ọ rẹ hai su fihọ iẹe. Nọ ekẹmika na o te su fihọ imighogho na nọ ame o je tei, ọ vẹ jọ suẹsu evaọ otọ okọ na kpobi. Nọ oke o be nyaharo na, onana u ve ti muhọ ẹfa no avọ oware kpobi nọ o tamu ei nọ o be fa lele iei. Ame ekẹmika na ọfa ọ vẹ wariẹ su fihọ oria nọ ọnana o fa no na.

 Ọkiẹriwo nọ a ru u dhesẹ nọ enẹte na avọ ekẹmika nọ a ru oghẹrẹ utiona, o rehọ asia udhusoi woma vi ọda nọ a be hae rọ whaha emera na anwẹdẹ. Yọ onana o te wha erere ologbo se ekọmpene nọ i re bi ekọ keme, re a wọ okọ ulogbo ziọ okpa je si eware nọ e tamu ei no, okolo ugho ho.

 Ẹvẹ Who Roro? Kọ ohọrọ iwheli nana nọ u re ru omariẹ fo na u mu romavia? Manikọ ẹma a ma riẹ?