KỌ ẸMA A MA RIẸ?
Onaa nọ Ọnwara-Onyẹ Ọ rẹ rọ Jọ Ehru Vre Ẹgolo
Otẹrọnọ whọ jẹ gwọlọ kpe onyẹ no ẹdẹjọ, kiyọ whọ te riẹ epanọ o rẹ bẹ te re a tehe iẹe kpe. Inyẹ e rẹ rra vẹrẹ gaga, oyejabọ nọ e gbẹ rọ kaki te obọ họ na.
Egba-eriariẹ a kiẹ via no inọ ọnwara-onyẹ ọ rẹ sae jọ ehru vre ẹgolo, nwane wọhọ epanọ arupre nọ a re ro fi ẹmo o re ru na. Rekọ amabọ jọ emaharo ọvo onyẹ nana o re ro ru ei. Profẹsọ jọ nọ a re se Michael Dickinson ọ ta nọ, a te yẹ ae ze obọ “i re wo onaa ẹra gaga wọhọ ohwo nọ ọ riẹ arupre ẹdhẹ ziezi. O nwane wọhọ ẹsenọ whọ wọ ọmọ nọ a yẹ ze obọ fihọ arupre nọ a re ro fi ẹmo re ọ dhẹe, ọmọ na ọ tẹ be riẹ arupre na dhẹ ziezi.”
Ahwo nọ a rẹ kiotọ eware a vidio enwara-onyẹ a tẹ ruẹ nọ e rẹ tehe ibekpe rai asia egba ivẹ evaọ emaharo ọvo. Dede na, ẹsiẹvo ọvo nọ ọnwara-onyẹ ọ tehe ibekpe riẹ, o rẹ sai ru nọ ọ rẹ rọ rra siọ oware kpobi nọ u bi lei ba.
Kọ ẹvẹ o rẹ raha oke te re inyẹ na i te ti muhọ ẹra siọ oware nọ u bi le ai ba? Ahwo nọ a rẹ kiotọ eware a kiẹ via no inọ oware jọ u te bi le inyẹ nana, oke nọ a re ro muhọ ẹdhẹ o rehọ asia udhuvẹ gbikpe vẹrẹ vi oke nọ ohwo-akpọ ọ rẹ rọ mahe ẹro. Dickinson o ru ẹme na vẹ inọ: “Onyẹ na o re roro eware buobu vẹrẹ vẹrẹ gaga, o rẹ raha oke he re ọ tẹ riẹ obonọ oware u bi no ze gbe ofẹ nọ ọ rẹ rra kpohọ re ọ sae vabọ.”
Enọ e rẹ kiotọ eware e be daoma re a riẹ oware igbunu nana, a gwọlọ riẹ oghẹrẹ nọ ọnwara-onyẹ nọ ẹvori riẹ o te oware ovo ho na ọ be sai ro ru onana.
Ọnwara-onyẹ ọ tẹ gwọlọ dhẹ vabọ ọ rẹ jọ ehru vre ẹgolo evaọ amabọ jọ emaharo ọvo.
Ẹvẹ Who Roro? Kọ onaa nọ ọnwara-onyẹ ọ rẹ rọ jọ ehru vre ẹgolo na u mu rrọ? Manikọ ẹma a ma riẹ?