Ee. A jọ Ebaibol ruẹaro inọ evaọ oke mai na ahwo a ti yoma gaga. Ebaibol ọ tẹ jẹ ta nọ onana o te whae ze nọ ahwo buobu a ti ro yeri ekpehre uzuazọ. a (2 Timoti 3:1-5) O make rrọ ere na, a jọ Ebaibol ruẹaro re inọ ahwo jọ a ti yeri oghẹrẹ uzuazọ yena ha. A ti lele edhere Ọghẹnẹ, o ve ti fiobọhọ kẹ ae ru oware nọ o rẹ were iẹe.—Aizaya 2:2, 3.

Ma te jọ uzoẹme nana ta kpahe eware nana

• Oghẹrẹ uzuazọ vẹ a jọ Ebaibol ruẹaro nọ ahwo a ti yeri evaọ oke mai nana?

• Eme ahwo a te reoja riẹ fiki enọ e be gwọlọ ewoma obọrai ọvo?

• Fikieme ahwo a bi ro dhe eyeyoma?

• Eme u fo nọ ma re ru nọ ahwo a bi ru eware iyoma na?

• Kọ ohwo kpobi o ti yoma?

• Kọ akpọ na o ti yoma te epanọ a gbẹ te sae rọ rriae he?

 Ebaibol na ọ fodẹ ikpehre iruemu sa-sa nọ ahwo buobu evaọ akpọ na a ti wo, yọ u ti tube te epanọ a gbe ti ro rri rai wọhọ ikpehre iruemu hu. Ebaibol ọ tẹ jẹ ta nọ oware nọ o te wha iruemu nana kpobi ze họ, ahwo a ti roro kpahe omobọ rai ọvo. Ọ ta nọ ahwo “a ti wo oma-onyẹ hẹ,” “a ti you omobọ rai,” yọ “a ti you omaweromẹ viukpenọ a re you Ọghẹnẹ.”—2 Timoti 3: 2-4.

 Oware nọ a ruẹaro riẹ na oye o be via nẹnẹ na. Oware nọ o mae rrọ ahwo buobu oja họ, orọ obọrai, orọ ẹkpa rai, gbe onọ o mai kiehọ ae oma. Uruemu nana u bi tube dhe eyeyoma. Ahwo a you omobọ rai te epanọ a gbe ro “you oware uwoma ha.” Onana u dhesẹ nọ a tẹ make ruẹ ahwo nọ a wo uruemu uwoma, o rẹ were ae he. Ahwo buobu a tẹ jẹ “kare uyere-ọghọ,” onọ u dhesẹ nọ oware nọ a wo o rẹ da ae ẹro ho. Yọ whọ tẹ maki ru otọ gbe ehru kẹ ae, a re sei gboware ovo ho.—2 Timoti 3:2, 3.

 U te no enana no, u wo ikpehre iruemu efa nọ ahwo a wo enẹna fikinọ a bi roro kpahe omobọ rai ọvo. Iruemu nana jọ họ:

•   Uvou-uthethei. Ahwo buobu a “you ugho.” A roro nọ a te fe yọ ebẹbẹ rai kpobi i kuhọ no.—2 Timoti 3:2.

•   Omorro. Ahwo buobu a re “seha,” a “wo omorro,” yọ a re “fu uke.” (2 Timoti 3:2, 4) Ahwo otiọye na a rẹ ta nọ ohwo ọvo o te rai hi.

•   A rẹ ta ahwo raha. Ahwo nọ a rẹ “ta eme-aghọ,” gbe enọ e rẹ “ta ahwo raha” e vọ oria kpobi. (2 Timoti 3:2, 3) Oria nana o be ta kpahe ahwo nọ a re gu ọrue fihọ amọfa uzou, jẹ ta eme nọ i fo ho kpahe Ọghẹnẹ gbe ahwo-akpọ ibe rai.

•   A wo udu ogaga. Ahwo buobu a re “ru ẹme rai gba ha,” a rẹ “rọwo ru ọtamuo ho,” a re “vivie ahwo,” yọ a re “veghe uzou.” (2 Timoti 3:2-4) Ahwo otiọye na a re yo orọ ohwo ho, orai ọvo o rẹ gba. Yọ a re ru epanọ avọ amọfa a ta mu hu.

•   A re ru ozighi. Ahwo buobu nẹnẹ a re “mu ofu-ọkpoo.” Eva i re kri ai ẹdha ha. Oyejabọ nọ a be rọ jọ eria buobu họre ku oma je kpe ahwo na.—2 Timoti 3:3.

•   Emuemu. Jesu ọ ta nọ “emuemu o ti vihọ” evaọ oke mai na. (Matiu 24:12) Ọ tẹ jẹ ta nọ “ozighi” hayo “ẹvohẹ” ọ te jọ eria sa-sa akpọ na.—Luk 21:9, ẹme-obotọ.

•   A you ahwo uviuwou rai hi. Ahwo buobu a be “ghẹmeeyo kẹ esẹgbini” rai, yọ a “wo uyoyou kẹ ibe ahwo-akpọ rai [hayo ahwo uviuwou rai] hi.” Onana u ru nọ a bi ro gbabọkẹ ahwo uwou rai. A bi gboja kẹ ae jẹ họre ae dede.—2 Timoti 3:2, 3.

•   A rẹ faki ru wọhọ ẹsenọ a be gọ Ọghẹnẹ. Whọ rẹ ruẹ ahwo buobu nọ a bi “ru wọhọ ẹsenọ a be gọ Ọghẹnẹ.” (2 Timoti 3:5) A re ru oware nọ Ọghẹnẹ ọ ta ha. Ukpoye kọ oware nọ isu egagọ rai a ta kẹ ae ọvo a re ru fikinọ oye o rẹ were ae ezọ.—2 Timoti 4:3, 4.

 Ahwo nọ a re roro kpahe ewoma obọrai ọvo a vọ oria kpobi, yọ a ru akpọ vẹso ahwo buobu no. (Ọtausiuwoma Na 7:7) Wọhọ oriruo, ahwo nọ a you ugho a re fi ahwo iwhayo, yọ eware nọ u fo nọ a rẹ ghale kẹ amọfa, a re fru rai rehọ. Ahwo nọ a you ahwo-akpọ ibe rai hi, a re ru ahwo uviuwou rai eware nọ a rẹ rọ vioja jẹ lẹliẹ ai thuru uwhu dede. Nọ ohwo o te vivie ọrivẹ riẹ hayo nọ o gbe koko eyaa riẹ hẹ, o rẹ kẹ ohwo ọdekọ na uye oke lelehie.

 Ebaibol ọ ta oware nọ o wha riẹ ze nọ ahwo a bi ro dhe eyeyoma, inọ:

•   Ahwo buobu a gbe you Ọghẹnẹ gbe erivẹ rai hi. (Matiu 24:12) Ohwo nọ o wo uyoyou utioye he, oriẹ ọvo ọ rẹ họre kẹ.

•   A le Setan Ẹdhọ no obọ odhiwu ziọ otọakpọ no, yọ ọ rẹ gbẹ sai zihe he. (Eviavia 12:9, 12) Anwọ oke yena ze, o bi ru nọ ahwo a bi ro roro kpahe ewoma obọrai ọvo, je ru eware iyoma buobu.—1 Jọn 5:19.

 Ebaibol ọ ta nọ: “Kẹnoma kẹ ahwo otiọye na.” (2 Timoti 3:5) Orọnikọ onana u dhesẹ nọ ma re kuomagbe ahwo ho ho. Rekọ ẹme nọ a be ta na họ, joma lele ahwo nọ a rẹ dhozọ Ọghẹnẹ hẹ nyusu hu, enọ e rẹ daezọ amọfa ha.—Jemis 4:4.

 Ijo. Ebaibol ọ ta nọ u wo ahwo jọ nọ a te “fiunu je . . . dimẹ fiki eware etọtọ kpobi nọ a bi ru” evaọ akpọ na. (Izikiẹl 9:4) A ti you erivẹ rai jẹ rọ izi Ọghẹnẹ su oma. Ẹmeunu gbe uruemu rai u ti wo ohẹriẹ gaga no orọ amọfa. (Malakae 3:16, 18) A ti lele ohwo kpobi rria dhedhẹ. A ti dhomahọ ẹmo ho yọ a te họre he.—Maeka 4:3.

 Ijo. Akpọ na ọ te raha muotọ ẹdẹvo ho. Kẹle na, Ọghẹnẹ ọ te raha ahwo nọ a bi koko izi riẹ hẹ no. (Olezi 37:38) Ọghẹnẹ o ti ru otọakpọ na kpobi fihọ “otọakpọ ọkpokpọ,” onọ u dhesẹ nọ emamọ ahwo, nọ i wo omaurokpotọ, ae ọvo a te rria otọakpọ na dhedhẹ bẹdẹ bẹdẹ. (2 Pita 3:13; Olezi 37:11, 29) Nọ oware nọ o te via dẹẹ, orọnikọ irẹro ifofe he. Makọ obọnana dede, ahwo jọ a bi siobọno ikpehre iruemu rai fikinọ a gwọlọ ru oreva Ọghẹnẹ.—Ahwo Ẹfisọs 4:23, 24.