Wọhọ epanọ obe urere Ebaibol na ọ ta, 666 yọ inọmba hayo odẹ arao ẹwọ nọ o wo izou ihrẹ gbe ize ikpe nọ o no abade ze na. (Eviavia 13:1, 17, 18) Arao nana o dikihẹ kẹ isuẹsu akpọ nana nọ u bi su “korua korua gbe ahwo gbe erọo-unu gbe orẹwho.” (Eviavia 13:7) Inọmba 666 na u dhesẹ nọ Ọghẹnẹ o rri isuẹsu akpọ wọhọ oware nọ u kie wariama no. Evaọ oghẹrẹ vẹ?

  U vi inọmba gheghe. Edẹ nọ Ọghẹnẹ ọ kẹ ahwo jọ evaọ Ebaibol na i wo otofa. Wọhọ oriruo, Ọghẹnẹ o nwene odẹ Abram nọ otofa riẹ o rrọ “A Kpare Ọsẹ Kpehru,” kpohọ Abraham, nọ otofa riẹ o rrọ “Ọsẹ Ogbotu,” evaọ okenọ Ọghẹnẹ ọ yaa eyaa kẹ Abraham nọ o ti ru ei họ “ọsẹ ogbotu erẹwho buobu.” (Emuhọ 17:5) Ere ọvona Ọghẹnẹ o se arao na 666 ro dhesẹ oware nọ u dikihẹ kẹ re.

  Oware nọ inọmba ezeza u dikihẹ kẹ họ sebaẹgba. Ẹsibuobu, evaọ Ebaibol na a rẹ rehọ inọmba dhesẹ oware. Inọmba na ihrẹ o dikihẹ kẹ ẹgbagba hayo oware nọ o gba. Nọ o rọnọ inọmba ọvo o no ihrẹ na, o gbẹ gba ihrẹ hẹ, fikiere o gba ha hayo o wo oka evaọ aro Ọghẹnẹ, yọ a sai rehọ iẹe dhesẹ ewegrẹ Ọghẹnẹ.​—1 Iruẹru-Ivie 20:6; Daniẹl 3:1.

  Isiasa ro dhesẹ ẹgbagba ẹme na. Ẹsibuobu Ebaibol ọ rẹ wariẹ ẹme isiasa ro fi ẹgba họ iẹe. (Eviavia 4:8; 8:13) fikiere odẹ na 666 u bi dhesẹ vevẹ nọ Ọghẹnẹ o rri isuẹsu akpọ nana inọ i kie wariama no. A be sae rọ udhedhẹ gbe omofọwẹ ze he​—Uvie Ọghẹnẹ ọvo o wo ẹgba nọ ọ sae rọ rehọ ae ze.

Oka ọ arao na

 Ebaibol na ọ ta nọ ahwo a wo “oka arao na” keme a je lele iei “avọ igbunu gaga,” te epanọ a rọ gọe dede. (Eviavia 13:3, 4; 16:2) Oghẹrẹ nọ a be rọ gọe enẹna họ adhẹẹ egagọ nọ a be kẹ orẹwho rai, obiala, hayo egbaẹmo rai. Encyclopedia of Religion o ta nọ: “Adhẹe nọ ahwo a be kẹ orẹwho rai o vi onọ a be rọ kẹ Ọghẹnẹ enẹna.” a

 Oghẹrẹ vẹ oka arao na o rọ rrọ obọze hayo aruezo ohwo? (Eviavia 13:16) Evaọ okenọ Ọghẹnẹ ọ kẹ emọ Izrẹl ijaje riẹ, ọ ta nọ: “Wha vẹ yọrọ ae họ obọ rai whọhọ oka, e vẹ jọ ẹgbelẹ-izi eva aruezo rai.” (Iziewariẹ 11:18) Orọnọ onana u dhesẹ nọ emọ Izrẹl a rẹ ginẹ ka oka họ obọ hayo aruezo rai hi, rekọ u dhesẹ nọ eme Ọghẹnẹ e rẹ kpọ owojẹ gbe iroro rai ẹsikpobi. Epọvo na re, orọnikọ a rẹ ka oka 666 na họ oma tao ho, rekọ ohwo kpobi nọ isuẹsu akpọ na e be kpọ o wo oka arao na. Ohwo kpobi nọ o wo oka arao na ọ be wọso Ọghẹnẹ.​—Eviavia 14:9, 10; 19:19-21.