Jihova Ọghẹnẹ, Erumeru na, họ “Alfa gbe Omẹga.” Isiasa ẹme nana ọ romavia evaọ Ebaibol na.​—Eviavia 1:8; 21:6; 22:13. a

 Alfa gbe Omẹga yọ ubiẹme ọsosuọ gbe ọrọ urere ibieme ẹvẹrẹ Griki, ẹvẹrẹ nọ a ro kere abọ Ebaibol na nọ a re se Ọvọ Ọkpokpọ na, yọ obe Eviavia ọrọ usu ebe Ebaibol nana. Nọ orọnọ ibieme nana họ ọrọ ọsosuọ gbe ọrọ urere ibieme ẹvẹrẹ Griki na, onana u dhesẹ nọ Jihova ọvo họ emuhọ gbe ekuhọ. (Eviavia 21:6) Ọye họ Ọghẹnẹ Erumeru na, ọnọ o wo emuhọ gbe ekuhọ họ, yọ ọ te gbẹ jọ Ọghẹnẹ Erumeru bẹdẹ bẹdẹ. Ọye ọvo họ ọnọ ọ rrọ “no ebẹdẹ bẹdẹ rite ebẹdẹ bẹdẹ.”​—Olezi 90:2.

 Ebaibol na ọ rehọ ẹme nana ta kpahe Jihova Ọghẹnẹ avọ Ọmọ riẹ, Jesu, rekọ i wo otofa ovona ha. Joma ta kpahe iriruo ivẹ jọ.

•   Jihova ọ jọ Aizaya 44:6 ta nọ: “Mẹ họ ọrọ ọsosuọ, yọ mẹ họ ọrọ urere. Ọghẹnẹ ọfa ọ rrọ họ u te no omẹ no.” Jihova ọ jọ etenẹ na ta nọ ọye họ Ọghẹnẹ uzẹme na nọ ọ rẹ rria bẹdẹ bẹdẹ; yọ u te noi no Ọghẹnẹ ọfa ọ rrọ họ. (Iziewariẹ 4:35, 39) Fiki onana, ẹme na “ọrọ ọsosuọ gbe ọrọ urere na” avọ “Alfa gbe Omẹga” otofa ovona a wo.

•   Ofariẹ, ẹme na “ọrọ Ọsosuọ [pro’tos, orọnikọ alfa ha] gbe ọrọ Urere [e’skha·tos, orọnikọ omẹga ha]” o romavia evaọ Eviavia 1:17, 18 gbe 2:8. Eme nọ e wariẹ eria ikere nana họ i dhesẹ nọ ohwo nọ a rọ eme nana ta kpahe o whu yọ ọ wariẹ zihe ziọ uzuazọ uwhremu na. Fikiere, orọnikọ Ọghẹnẹ eria Ebaibol nana e be ta kpahe he, keme Ọghẹnẹ o re whu hu. (Habakọk 1:12) Rekọ, Jesu o whu yọ a kpare e riẹ ziọ uzuazọ. (Iruẹru Ikọ 3:13-15) Jesu họ ohwo ọsosuọ nọ a kpare kpobọ odhiwu avọ oma ẹzi nọ u re whu hu, yọ ọ rrọ uzuazọ “bẹdẹ bẹdẹ” evaọ obei. (Eviavia 1:18; Ahwo Kọlọsi 1:18) Evaọ obaro, Jesu họ ọnọ ọ te kpare ahwo kpobi nọ a whu no ziọ uzuazọ. (Jọn 6:40, 44) Fikiere, Jesu họ ohwo urere nọ Jihova omariẹ ọvo ọ kpare ziọ uzuazọ. (Iruẹru Ikọ 10:40) Fiki onana, a sae ta nọ Jesu họ “ọrọ ọsosuọ gbe ọrọ urere na.”

 Ijo. A fodẹ ohwo nọ ọ ta ẹme nọ ọrọ obe Eviavia 22:13 na gbiae he, keme amọfa a jọ uzou Ebaibol nana ta ẹme re. Nọ profẹsọ William Barclay ọ jẹ ta kpahe abọ nana obe Eviavia na, o kere nọ: “A kere eware nọ e rrọ oria nana othotha ha; . . . yọ evaọ ẹsejọ o rẹ jọ bẹbẹ re a riẹ ohwo nọ ọ be ta ẹme na dẹe.” (The Revelation of John, Uko 2, Revised Edition, ẹwẹ 223) Fikiere, a sae ta nọ omọvo na nọ a se “Alfa gbe Omẹga” evaọ Eviavia 22:13 na ọye ọvona a rehọ odẹ na se evaọ eria efa obe Eviavia na, yọ ohwo yena họ Jihova Ọghẹnẹ.