Evaọ oke nọ u kpemu, nọ ohwo ọ tẹ rọ emamọ ẹjiroro siọ emuọriọ ba, Ọghẹnẹ ọ jẹ hae jẹe rehọ. Rekọ ohwo ọ tẹ rọ iroro iyoma ru ei, Ọghẹnẹ ọ rẹ jẹe rehọ họ. O make rrọ ere na, evaọ oke mai nana, Ebaibol na ọ ta ha inọ ma siọ emuọriọ ba hayo ma seba ha.

•   Nọ a tẹ be gwọlọ obufihọ Ọghẹnẹ hayo riẹ oware nọ Ọghẹnẹ ọ gwọlọ nọ a ru. Ahwo nọ a jẹ hai kpohọ obọ Jerusalẹm, a jẹ hae siọ emuọriọ ba ro dhesẹ nọ a be rọ eva efuafo gwọlọ obufihọ Ọghẹnẹ. (Ẹzra 8:21-23) Nọ Pọl avọ Banabas a jẹ rọ ekpako ukoko mu, ẹsejọ a jẹ hae siọ emuọriọ ba.​—Iruẹru Ikọ 14:23.

•   Nọ a tẹ gwọlọ tẹrovi ẹjiroro Ọghẹnẹ. Nọ Jesu ọ họ-ame no, ọ siọ emuọriọ ba edẹ udhuvẹ re ọ ruẹrẹ oma kpahe kẹ oreva Ọghẹnẹ nọ o ti ru evaọ iruo odibọgba riẹ.​—Luk 4:1, 2.

•   Nọ a te bi dhesẹ nọ a kurẹriẹ no izieraha rai no. Ọghẹnẹ ọ rọ ẹkwoma Joẹl ọruẹaro na ta kẹ ahwo Izrẹl aghẹmeeyo na nọ: “Wha rehọ udu rai kpobi zihe bru omẹ ze, avọ emuọriọ-ọseba gbe oviẹ gbe enu oviẹ okuo.”—Joẹl 2:12-15.

•   Evaọ Ẹdẹ Omavoro. Evaọ Uzi nọ Ọghẹnẹ ọ kẹ orẹwho Izrẹl na, ọ vuẹ rai nọ a siọ emuọriọ ba kukpe kukpe evaọ Ẹdẹ Omavoro. a (Iruo-Izerẹ 16:29-31) A jẹ hae siọ emuọriọ ba evaọ ẹdẹ nana keme o rẹ kareghẹhọ ahwo Izrẹl na inọ a gba ha, a tẹ jẹ rọ erahaizi nọ e gwọlọ erọvrẹ Ọghẹnẹ.

•   Ro dhesẹ oma kẹ amọfa. Jesu ọ ta nọ emuọriọ-ọseba fiki egagọ, yọ ẹme omobọ ohwo nọ ohwo na avọ Ọghẹnẹ ọvo a rẹ riẹ kpahe.​—Matiu 6:16-18.

•   Ro dhesẹ nọ a kiẹrẹe. Emuọriọ-ọseba u re dhesẹ ohwo nọ ọye ọ mai wo emamọ uruemu hayo ọye ọ be mae gọ Ọghẹnẹ hẹ.​—Luk 18:9-14.

•   A rẹ rehọ iẹe foma nọ a te keke aro fihọ raha izi no. (Aizaya 58:3, 4) Re Ọghẹnẹ ọ sae jẹ emuọriọ-ọseba ohwo rehọ, o gwọlọ nọ ohwo na o re yoẹme kẹe je kurẹriẹ no udu ze nọ ọ tẹ raha uzi.

•   A rẹ faki ru ei fiki egagọ nọ a rrọ. (Aizaya 58:5-7) Evaọ onana, Ọghẹnẹ ọ wọhọ ọsẹ hayo oni nọ eva e rẹ were he fikinọ emọ riẹ a be fake ta nọ a you rie kpakiyọ u bi no udu rai ze he.

 Ijo. Ọghẹnẹ o jie uzi kẹ ahwo Izrẹl nọ a rẹ siọ emuọriọ ba evaọ Ẹdẹ Omavoro, rekọ nọ Jesu ọ rọ omariẹ dhe idhe kẹ izieraha ahwo-akpọ no Ọghẹnẹ o te si uzi yena notọ. (Ahwo Hibru 9:24-26; 1 Pita 3:18) Ileleikristi a rrọ otọ Uzi Mosis na ha, onọ a je ro koko Ẹdẹ Omavoro. (Ahwo Rom 10:4; Ahwo Kọlọsi 2:13, 14) Fikiere, Oleleikristi kpobi ọ rẹ jiroro na kẹ omariẹ sọ ọ rẹ siọ emuọriọ ba hayo ọ rẹ seba ha.​—Ahwo Rom 14:1-4.

 Ileleikristi a riẹ nọ emuọriọ-ọseba họ ugogo oware nọ o mai wuzou evaọ egagọ rai hi. Ebaibol na ọ jọ oria ọvo ta ha inọ, nọ ohwo ọ tẹ siọ emuọriọ ba ẹsiẹ o re ro wo evawere. Fikinọ Ileleikristi uzẹme a be gọ Jihova, “Ọghẹnẹ evawere na,” a re wo evawere evaọ egagọ rai ẹsikpobi.​—1 Timoti 1:11; Ọtausiuwoma Na 3:12, 13; Ahwo Galesha 5:22.

 Eriwo ọthọthọ: Ileleikristi a rẹ siọ emuọriọ ba nọ a te bi ru ekareghẹhọ uwhu Jesu.

 Uzẹme: Jesu o jie uzi kẹ ilele riẹ hẹ inọ a siọ emuọriọ ba nọ a te bi ru ekareghẹhọ uwhu riẹ. (Luk 22:14-18) Nọ Jesu ọ ta nọ ilele riẹ a te siọ emuọriọ ba nọ o te whu no, orọnikọ o je juzi kẹ ae he, ukpoye ọ jẹ vuẹ ai oware nọ o te via. (Matiu 9:15) Ebaibol na ọ ta nọ taure Ileleikristi a te ti kpohọ ekareghẹhọ na, jọ ohwo nọ ohọo u bi kpe ọ jọ obọ uwou riẹ re emu no tao.​—1 Ahwo Kọrint 11:33, 34.