Eme Ebaibol Ọ Ta Kpahe Orukele?

KPORO

Uyo nọ Ebaibol na ọ kẹ

Ẹsejọ oware nọ a ru ohwo o rẹ da te epanọ ohwo na o re ro roro nọ u fo re a ru ohwo ọdekọ na kele. Ghele na, Ebaibol ọ ta nọ: “Whọ ta ha inọ: ‘Me ti ru ei epanọ o ru omẹ na; me ti ru ei kele.’” (Itẹ 24:29, ẹme-obotọ) Ahwo buobu nọ a jẹ gwọlọ epanọ a re ro ru amọfa kele, Ebaibol na o fiobọhọ kẹ ae nwene iroro.

Ma te jọ uzoẹme nana ta kpahe eware nana

Fikieme u gbe ro fo re ma ru ohwo kele he?

Nọ ohwo o te ru omai oware nọ o kẹ omai uye, ma rẹ gwọlọ nọ ohwo na ọ reoja oware nọ o ru na. Rekọ Ebaibol ọ ta nọ ma kioja kẹ omamai hi. Fikieme?

Ọghẹnẹ ọ tẹ ruẹ nọ ma be kioja kẹ omamai, eva e rẹ dhae. Jihova a Ọghẹnẹ ọ jọ Ebaibol na ta nọ: “Orukele ọmẹ; mẹ te hwa zihe.” (Ahwo Rom 12:19) Nọ ohwo o te ru omai thọ, ukpenọ ma ru ei kele, Ebaibol ọ ta nọ ma gwọlọ edhere kpobi nọ ma re ro ku ẹme na họ dhedhẹ. (Ahwo Rom 12:18) Kọ eme ma re ru otẹrọnọ edhere ọvo ọ riẹ nọ ma re ro ku ẹme na họ dhedhẹ hẹ, hayo ohwo na ọ be kẹ omai uzou sokpọ họ? Ebaibol ọ ta nọ ma nyasiọ iẹe ba kẹ Jihova, ọye ọvo ọ te ruẹrẹ eware nọ e thọ kpobi họ.—Olezi 42:10, 11.

Idhere vẹ Ọghẹnẹ ọ rẹ rọ kẹ ahwo oyoma uye?

Evaọ obọnana, Ọghẹnẹ ọ kẹ egọmeti uvẹ re a kẹ ahwo nọ a ru thọ uye. (Ahwo Rom 13:1-4) Rekọ oke o be tha nọ ọ te rọ raha ahwo omuomu no, je si eware nọ e be kẹ omai uye kpobi no bẹdẹ bẹdẹ.—Aizaya 11:4.

Ẹvẹ mẹ sai ro si orukele no eva?

Whọ rọ ofu ru oware ovo ho. (Itẹ 17:27) Ẹsibuobu, nọ ohwo ọ tẹ rọ ofu ru oware, ọ rẹ vioja oware nọ o ru na. Rekọ nọ ohwo ọ tẹ romatotọ roro kpahe oware, o re ru oware nọ u kiehọ.—Itẹ 29:11.
Daoma riẹ oware nọ o lẹliẹ ohwo na ru oware nọ o ru na. (Itẹ 18:13) Ohwo jọ o te ru oware nọ o kẹ owhẹ uye, nọ omara nọ: ‘Kọ o sae jọ nọ oware jọ o lẹliẹ ohwo na ru oware nọ o ru na? Kọ o wo ẹbẹbẹ jọ? Kọ ibiaro ogbori o ro ru oware na?’ Ẹsejọ ma rẹ sai roro nọ ohwo na o kekaro fihọ ru omai oware odada, kpakiyọ o thọe obọ.

Eware nọ ahwo a re rri thọ kpahe orukele

Orithọ: Ebaibol ọ ta nọ orukele o rrọ ziezi, keme o ta nọ “ubiẹro rọkẹ ubiẹro.”—Iruo-Izerẹ 24:20.

Uzẹme ẹme na: Nọ a jie uzi kẹ ahwo Izrẹl nọ “ubiẹro rọkẹ ubiẹro,” orọnikọ a be ta kẹ ae nọ ae ọvo a kioja ha. Ukpoye, uzi nana u re fiobọhọ kẹ ibruozie na riẹ oware nọ a re ru ohwo nọ o ru oware uyoma na. b—Iziewariẹ 19:15-21.

Orithọ: Nọ orọnọ Ebaibol ọ ta nọ mai ọvo ma ru kele he na, a tẹ be maki kpe omai no ma rẹ kpọ obọ họ.

Uzẹme ẹme na: Nọ ohwo ọ tẹ gwọlọ nwa omai oma, ma re fiomahọ otọ kẹe he. Ma sai tube bo bru egọmeti. Rekọ Ebaibol na ọ ta nọ ma daoma kpobi re ma whaha ẹwhọ gbe ohọre.—Itẹ 17:14.

a Ebaibol na o dhesẹ nọ Jihova họ odẹ Ọghẹnẹ.

b Re who gbe se kpahe uzi nana, rri uzoẹme na, “Eme họ Otofa Ẹme na ‘Ubiẹro Rọkẹ Ubiẹro’”?