Eme Ebaibol na Ọ Ta Kpahe Ukio nọ A rẹ jọ Mahe Ugboma Ohwo nọ O Whu No?

KPORO

Uyo nọ Ebaibol na ọ kẹ

Ebaibol na ọ jọ oria ovo ta kpahe oghẹrẹ nọ a re ru ukio nọ a rẹ jọ rehọ erae mahe ugboma ohwo nọ o whu no ho. Yọ Ebaibol na o jie uzi ovuovo ho inọ ohwo o te whu a kie fihọ otọ hayo a rehọ erae mahe iẹe.

Rekọ Ebaibol na ọ ta kpahe idibo Ọghẹnẹ jọ nọ i ki ahwo rai nọ i whu fihọ otọ. Wọhọ oriruo, Abraham ọ dẹ ekẹ otọ nọ o ki aye riẹ Sera fihọ.—Emuhọ 23:2-20; 49:29-32.

Ebaibol na ọ tẹ jẹ ta kpahe idibo Ọghẹnẹ efa nọ e rehọ erae mahe ahwo rai nọ i whu. Wọhọ oriruo, okenọ a kpe Sọl ovie Izrẹl avọ emezae esa riẹ evaọ ẹmo, iri rai e tẹ gbẹ jọ ẹkwotọ ahwo Filistia na yọ a je ru oma vuọ ae. Nọ ahwo Izrẹl a yo kpahe oware nọ o via na, egbaẹmo rai a tẹ nyae wọ ori Sọl avọ emezae riẹ, a tẹ mahe ae, a tẹ rehọ igbenwa rai a te ki ai. (1 Samuẹle 31:8-13) Ebaibol na ọ ta nọ oware nọ u fo eruo egbaẹmo na a ru iri ezae nana.—2 Samuẹle 2:4-6.

Eriwo ọthọthọ nọ ahwo a wo kpahe ukio nọ a rẹ jọ rehọ erae mahe ugboma ohwo nọ o whu no

Eriwo ọthọthọ: Ukio nọ a rẹ jọ rehọ erae mahe ohwo nọ o whu no u re si ọghọ no ugboma na.

Uzẹme ẹme na: Ebaibol na ọ ta nọ ahwo nọ a whu no a re zihe kpohọ ẹkpẹ, yọ ere o rẹ jọ nọ ugboma ohwo na u te muhọ egbo no. (Emuhọ 3:19) Erae nọ a rẹ rọ mahe ugboma ohwo nọ o whu no na, u re ru nọ ugboma na u re ro zihe ruọ enwo hayo ẹkpẹ vẹrẹ vẹrẹ.

Eriwo ọthọthọ: Evaọ oke Ebaibol na, ahwo nọ a wo ọjẹrehọ Ọghẹnẹ hẹ ọvo a rehọ erae mahe ugboma rai okenọ a whu no.

Uzẹme ẹme na: A ginẹ rehọ erae mahe ugboma ahwo jọ nọ a yoẹme kẹ Ọghẹnẹ hẹ evaọ okenọ a whu no, ahwo wọhọ Ekan avọ uviuwou riẹ. (Joshua 7:25) Rekọ onana o jọ uzi hi, oware jọ o wha riẹ ze. (Iziewariẹ 21:22, 23) Wọhọ epanọ ma ta no vẹre na, makọ idibo Ọghẹnẹ jọ nọ i wo ẹrọwọ dede, wọhọ Jonatan, ọmọzae Sọl ovie na, a rehọ erae mahe ugboma rai evaọ okenọ a whu no.

Eriwo ọthọthọ: Erae nọ a rẹ rọ mahe ugboma ohwo nọ o whu no u re ru nọ Ọghẹnẹ ọ gbẹ sae rọ kpare ohwo na ze he.

Uzẹme ẹme na: Te a ki ohwo fihọ otọ, a rehọ erae mahe ugboma ohwo nọ o whu no na, te o whu fihọ ame, hayo arao ojihẹ ọ re ohwo na, o rrọ ẹbẹbẹ kẹ Ọghẹnẹ hẹ re ọ kpare ohwo na ze. (Eviavia 20:13) Ọghẹnẹ Erumeru na ọ rẹ sae wariẹ ma ugboma okpokpọ kẹ ohwo na lọlọhọ.—1 Ahwo Kọrint 15:35, 38.

Oghẹrẹ nọ Whọ Sae rọ Salọ Sọ Otọ A re Ki Ohwo Fihọ Hayo Erae A rẹ rọ Mahe Ugboma Ohwo nọ O Whu No

Nọ whọ tẹ gwọlọ salọ oghẹrẹ nọ who re ro ki ohwo ra nọ o whu no, roro kpahe eware nana.

Oghẹrẹ nọ ohwo ọ ta nọ a re ro ki ei nọ o te whu no. Ebaibol na ọ ta kpahe epanọ ahwo uviuwou ohwo nọ o whu no a ro ru lele oghẹrẹ nọ ohwo na ọ ta nọ a re ro ki ei evaọ okenọ o te whu no.—Emuhọ 50:4, 5; Ọnyano 13:19.
Uruemu ẹwho. Ẹsibuobu uruemu ẹwho u re kpomahọ oghẹrẹ nọ a re ro ki ohwo nọ o whu no. (Jọn 19:40) Wọhọ oriruo, evaọ oke Ebaibol na, otọ a jẹ hai ki ahwo nọ a whu fihọ. (Emuhọ 49:31; 1 Samuẹle 28:3) Epọvo na re nẹnẹ, nọ uruemu ẹwho nọ ma rrọ o gbẹ wọso uzi Ọghẹnẹ hẹ, ohwo ọ sae salọ nọ o re ki ohwo riẹ nọ o whu no wọhọ epaọ uruemu ẹwho na.
Uzi egọmeti. Ebaibol na ọ ta nọ ma romakpotọ kẹ udu-esuo egọmeti. (Ahwo Rom 13:1) Evaọ erẹwho jọ, egọmeti o fi izi jọ họ kpahe oghẹrẹ nọ a re ru ori ohwo nọ o whu no. Wọhọ oriruo, rọ kpahe ugboma ohwo nọ o whu no nọ a mahe, egọmeti o wo oria nọ a re fi enwo ohwo nọ a mahe na fihọ.
Oghẹrẹ nọ o rrọ amọfa oma. Ebaibol na ọ ta nọ ma hae gwọlọ ewoma amọfa. (Ahwo Filipai 2:4) Nọ ma tẹ gwọlọ jiroro oghẹrẹ nọ a re ro ki ohwo mai nọ o whu, u fo nọ ma roro kpahe enọ nana: Ẹvẹ o te jọ amọfa evaọ uviuwou na oma nọ a tẹ rọ erae mahe ugboma ohwo nọ o whu no na hayo nọ a te ki ei fihọ otọ? Ẹvẹ ahwo ẹwho na a re rri oghẹrẹ ukio utionana?