Eme Ebaibol na Ọ Ta Kpahe Ikpeyao nọ I re Vo?

KPORO

Uyo nọ Ebaibol na ọ kẹ

Ebaibol na ọ ruẹaro nọ ikpeyao (koyehọ eyao egaga nọ e rẹ vaha ruọ oria kpobi, gbe eyao nọ i re vo) i ti duwu lahwe evaọ edẹ urere na. (Luk 21:11) Dede na, orọnikọ Ọghẹnẹ họ ọnọ ọ be rehọ ikpeyao nọ i re vo rọ kẹ ahwo-akpọ uye he. Ọghẹnẹ ọ ya eyaa nọ kẹle na, ọ te rehọ ẹkwoma Uvie riẹ si ikpeyao gbe oghẹrẹ eyao nọ i re vo kpobi no.

Kọ Ebaibol na ọ ruẹaro kpahe eyao nọ i re vo?

Whọ rẹ ruẹ oria nọ a jọ fodẹ eyao wọhọ COVID-19, AIDS, hayo ẹyao ọtehekọ evaọ Ebaibol na ha. Rekọ Ebaibol na ọ ruẹaro kpahe “ikpeyao” gbe “ẹyao ọgaga.” (Luk 21:11; Eviavia 6:8) Eware nana yọ abọjọ oka nọ u bi dhesẹ nọ “edẹ urere na” ma rrọ na, onọ a re je se “oke urere uyero-akpọ na.”—2 Timoti 3:1; Matiu 24:3.

Kọ Ọghẹnẹ ọ rehọ ẹyao kẹ ahwo uye evaọ okenọ u kpemu?

Ma rẹ jọ Ebaibol na se kpahe iku ahwo jọ nọ Ọghẹnẹ ọ rehọ ẹyao kẹ uye. Wọhọ oriruo, Ọghẹnẹ o ru nọ ahwo jọ a ro wo ẹyao oti. (Ikelakele 12:1-16; 2 Ivie 5:20-27; 2 Iruẹru-Ivie 26:16-21) Rekọ eyao nana i vo ruọ amọfa oma ha, wọhọ epanọ ẹyao nọ o re vo ọ rẹ vaha ruọ oria kpobi na. Jihova họ ọnọ ọ rehọ eyao nana rọ kẹ ae uye fikinọ a wọso iẹe.

Kọ Ọghẹnẹ ọ be rehọ eyao nọ i bi vo enẹna kẹ ahwo-akpọ uye?

Ijo. Ahwo jọ a rẹ ta nọ Ọghẹnẹ họ ọnọ ọ be rehọ eyao nọ i re vo gbe oghẹrẹ eyao efa sa-sa kẹ ahwo-akpọ uye nẹnẹ. Rekọ whọ rẹ jọ oria ovo evaọ Ebaibol na ruẹ uwuhrẹ utioye na ha. Ẹvẹ ma rọ riẹ?

Idibo Ọghẹnẹ evaọ oke anwae a mọ eyao nana jọ, yọ ere ọvona o rrọ kẹ idibo Ọghẹnẹ nẹnẹ re. Wọhọ oriruo, Timoti ọ jọ odibo Ọghẹnẹ, ghele na o je “dhe ẹmẹmọ.” (1 Timoti 5:23) Rekọ whọ rẹ ruẹ oria ọvo evaọ Ebaibol na nọ o ta nọ fikinọ Timoti o gbe wo ọjẹrehọ Ọghẹnẹ hẹ oye o wha riẹ ze nọ ọ jẹ rọ mọ họ. Epọvo na o rrọ nẹnẹ re, idibo Ọghẹnẹ a rẹ mọ. Ẹsibuobu, oware uyoma o sae via kẹ idibo Ọghẹnẹ idudhe fiki oghẹrẹ oria nọ a rrọ.—Ọtausiuwoma Na 9:11.

Ofariẹ, Ebaibol na ọ vuẹ omai nọ okenọ Ọghẹnẹ ọ te rọ kẹ ahwo oyoma uye o gbẹ rrọ obaro. Enẹna ma be rria “ẹdẹ esiwo,” koyehọ okenọ Ọghẹnẹ o bi ro zizie ahwo kpobi re a si kele iẹe re a wo uzuazọ. (2 Ahwo Kọrint 6:2) Edhere jọ nọ Ọghẹnẹ o bi ro ru onana họ, ẹkwoma “usi uwoma Uvie na” nọ a bi whowho evaọ akpọ na soso.”—Matiu 24:14.

Kọ eyao nọ i re vo i ti kuhọ ẹdẹjọ?

Ee. Ebaibol na ọ ruẹaro nọ kẹle na ohwo ọvo ọ te gbẹ mọ họ. Okenọ Uvie Ọghẹnẹ u te mu otọakpọ na họ esuo no, Ọghẹnẹ o ti si oghẹrẹ eyao kpobi notọ no. (Aizaya 33:24; 35:5, 6) O ti je si uye-oruẹ, edada gbe uwhu no. (Eviavia 21:4) Ọ te kpare ahwo nọ a whu no zihe ziọ uzuazọ, re a wo omokpokpọ evaọ akpọ ọkpokpọ.—Olezi 37:29; Iruẹru Ikọ 24:15.

Eria Ebaibol jọ nọ e ta kpahe eyao

Matiu 4:23: “Kẹsena [Jesu] ọ tẹ nya Galili soso duwu, bi wuhrẹ evaọ isinagọgo rai jẹ be ta usi uwoma Uvie na, yọ o bi siwi oghoghẹrẹ eyao kpobi gbe oghoghẹrẹ emo kpobi evaọ udevie ahwo na.”

Oware nọ onana u dhesẹ: Eware nọ Jesu o je ru evaọ oke yena i dhesẹ amabọ jọ orọ eware nọ o ti ru nọ Uvie Ọghẹnẹ u te mu otọakpọ na họ esuo no.

Luk 21:11: “Ikpeyao . . . e te jọ.”

Oware nọ onana u dhesẹ: Eyao nọ i re vo nọ e da oria kpobi fia na yọ abọjọ oka nọ u dhesẹ nọ edẹ urere na ma be rria na.

Eviavia 6:8: “Mẹ tẹ ruẹ anyenya ọviẹviẹ, yọ odẹ ọnọ ọ keria ehru riẹ họ Uwhu. Yọ Uki u bi lele iei kpekpekpe. A kẹ rai udu . . . re a rehọ . . . ẹyao ọgaga . . . ro kpe ahwo.”

Oware nọ onana u dhesẹ: Eruẹaruẹ nọ e ta kpahe edhẹ-enyenya ene nọ a fodẹ evaọ obe Eviavia na i dikihẹ kẹ ikpeyao nọ i ti duwu lahwe evaọ oke mai na.